Kwamamaza

Ibyiza bya Obama n’ibibi bye mu gihe yitegura gusohoka muri White House

Yanditswe kuya 6-11-2016 saa 05:00' na Cyprien Niyomwungeri


Mu myaka umunani Obama amaze ku buyobozi bwa Amerika, yakoze byinshi byiza binashimwa n’amahanga ndetse agaragaza n’itandukaniro mu bayobozi benshi bayoboye iki gihugu kimaze imyaka isaga 145 kiyoboye Isi mu ngeri zose kuva mu bukungu, igisirikare n’izindi nzego.

Ni umuyobozi kuva ku ikubitiro waranzwe no kumenya uko yitwara mu bihe byiza n’ibibi aho mu mvugo ze yasetsaga abababaye akabaryoshyaryoshya bagacururuka, bagakomeza bakamwiyumvamo nubwo yari kuba yakoze amahano.

Gusa uyu muyobozi hari ibikorwa bitandukanye yakoze byatumye igihugu cye kijya mu myenda myinshi itarigeze ibaho mu mateka, kigwiza abanzi mu bice bitandukanye bw’isi nubwo cyabashije kwigarurira ibihugu byari bimaze igihe bidacana umubano nacyo birimo nka Cuba; ibyo byose ni ibyo gushimira no kugayira Umunyafurika, Barack Hussein Obama umuperezida wa 44 uyoboye Leta Zunze Ubumwe za Amerika.

Ku mwaka we wa gatandatu nka Perezida, 79% by’Aba-Democrates n’Aba-Republicains 9%, bemezaga ko Barack Obama arimo gukora akazi neza. Aba-Democrates benshi bemezaga ko ubuyobozi bwa Obama bwazahuye igihugu.

Aho biri ngombwa ko arira Obama yarabikoraga n’abashidikanya ku miyoborere ye bagatungurwa

Ibyiza Obama yakoze

- Obamacare

Nubwo ku ikubitiro butavuzweho rumwe, ubu buryo bw’ubwishingizi bw’ubuzima ni imwe muri gahunda nziza ziranga ubutegetsi bwa Perezida Obama. Yabashije gufasha abagera kuri miliyoni 17 z’abaturage ndetse na bamwe mu ba guverineri batayumvaga neza batangira kuyisingiza ndetse baniyemeza kuyishyigikira kugira ngo ikomeze gusagamba.

Mbere abaturage bo muri leta zikennye bagorwaga n’ikiguzi cy’ubuzima, buriya bwishingizi bwagabanyije ibyo umuturage yasabwaga kuri serivisi z’ubuzima, zigera kuri benshi ugereranyije na mbere.

- Yahagaritse ihungabana ry’ubukungu

Nkuko umusesenguzi mu by’ubukungu n’umwanditsi wa New York Times, Paul Krugman yabitangaje, Perezida Obama yatowe hari ihungabana ry’ubukungu ku Isi. Muri Gashyantare 2009, Inteko Ishinga Amategeko yemereye Perezida Obama gushora miliyari 787 z’amadolari mu bikorwa byo guhangira abantu imirimo n’ibindi byo kuzahura ubukungu.

Ibi byatumye agabanya imisoro, ahanga imirimo, anatera inkunga imishinga y’imirimo rusange. Amatora aherutse gukoreshwa n’ibiro ntaramakuru by’Abanyamerika, Associated Press, yagaragaje ko hari abateye imbere kubera politiki z’ubukungu yashyizeho, nk’aho 51% zabakuye mu bushomeri.

Politiki ya Obama ku bukungu zatumye ihungabana ryabwo rirangira mu mezi atandatu n’umusaruro mbumbe wongera kuba mwiza. Mu mezi arindwi ubukungu bwari bumaze kwiyongeraho miliyari 241.9 z’amadolari, umusaruro mbumbe wiyongeraho 3.9% muri 2010.

Guverinoma ya Obama yahanze imirimo miliyoni eshatu, ikangurira ibigo gukora neza no guhangana ku ruhando mpuzamahanga. Ibi byatumye ubushomeri bugabanuka buva ku 10.1% mu 2009 bugera kuri 4.9% muri 2016.

- Gutsura umubano

Intambara Abanyamerika bagabye muri Irak, yatumye umubano wayo n’ibindi bihugu uzamo agatotsi. Perezida Obama yabashije kongera kwigarurira imitima y’ibihugu byinshi, atsura umubano n’icyubahiro igihugu cye cyahoranye i Burayi n’ahandi.

Nubwo atabashije kurangiza ibibazo bya Israel na Palestine, Perezida Obama yazuye umubano na Cuba, asinya amasezerano na Iran ku bitwaro bya kirimbuzi mu 2015.

Kuri iyi ngingo ntawakwirengagiza ko yanahawe igihembo cy’amahoro cyitiriwe Nobel muri 2010 kubera imbaraga zidasanzwe yashyize mu kuzahura umubano mpuzamahanga n’ubutwererane hagati y’igihugu cye n’ibindi.

Yakuye ingabo muri Iraq mu 2011, agabanya 10% ku bubiko bw’intwaro za kirimbuzi.


- Abimukira n’ibidukikije

Obama kandi afite amanota meza mu gukemura ibibazo by’abimukira no kurengera ibidukikije, aho yagiye adahwema kugaragaza ko ashyigikiye amasezerano yo kugabanya imyuka ihumanya ikirere.

Amatora aheruka kuri iyi ngingo yagaragaje ko 55% by’abatoye bari bashyigikiye politiki ya Obama ku bimukira.

- Kurangiza burundu Bin Laden n’intambara ya Iraq na Afghanistan

Mu 2011 Perezida Barack Obama yaciye imizi umutwe wa al Quaeda yivugana umuyobozi wawo Ossama Bin Laden, agerageza no gushyira akadomo ku ntambara yo muri Iraq na Afghanistan, icyakora hari umutwe wa ugendera ku matwara y’idini ya Islam asize adatsinsuye.

Kurangiza intambara ya Iraq na Afghanistan bizatuma Amerika izigama miliyari zirenga 800 z’amadolari yakoreshaga mu bikorwa bya gisirikare buri mwaka.

Obama asize Amerika na Cuba bibanye neza

Aho Obama ajyanye umugayo

- Ikibazo cya Libya

Ubwo yaganiraga na Fox News, Perezida Obama yavuze ko aticuza kuba Amerika yaragiye mu ntambara yo muri Libya, ahubwo icyo yicuza ari ukuba atarateganyije ikizakurikiraho nyuma yayo.

Perezida Obama yemeye ko kuba ataragize icyo akora nyuma y’ibitero Amerika yagizemo uruhare muri Libya byahiritse Muammar Gaddafi muri 2011 ari ikosa ribi kurusha ayandi yakoze mu gihe cy’ubuyobozi bwe.

Perezida Obama yavuze ko kugaba ibitero muri Libya byari ngombwa ariko kuba yarananiwe kugira icyo akora nyuma yabyo ari ikintu yicuza.

Leta Zunze Ubumwe za Amerika hamwe n’ibindi bihugu zagabye ibitero muri Libya bigamije kurinda abasivile mu mvururu zo muri 2011.

- Gushyingiranwa kw’abahuje ibitsina

Perezida Obama yashyigikiye ndetse akorera ubuvugizi ababana bahuje ibitsina, abaha rugari bemererwa gushyingiranwa byemewe n’amategeko. Niwe mukuru wa Leta Zunze Ubumwe za Amerika wa mbere wagaragaje gushyigikira uku kubana.

Mu kwiyamamariza gutorerwa manda ya kabiri, Obama yakunze gusura ingo z’ababana bahuje ibitsina babaga bateguye inama zo gukusanya inkunga yo kumushyikira. Ikinyamakuru Washington Post cyatangaje ko umwe kuri batandatu mu bateye inkunga y’amafaranga Obama, usanga abana n’uwo bahuje ibitsina.

- Gutsinsura abarwanyi bagendera ku matwara y’idini ya Islam

Perezida Obama ashinjwa kugenda biguru ntege mu mugambi wo guhosha intambara y’umutwe wa Islamic State iri mu bice bimwe bya Iraq na Syria ndetse ukomeje no kuyogoza ibindi bice by’isi.

- Gufunga gereza ya Guantanamo

Mu 2008 yiyamamaza, Perezida Obama yasezeranyije gufunga gereza ya Guantanamo iri muri Cuba. Ni intego yagiye ananizwamo cyane n’Inteko Ishinga Amategeko yiganjemo ishyaka ry’Aba- républicain.

Aherutse gutangaza ko iki gikorwa azakigeraho mbere y’uko ava ku butegetsi. Yavuze ko gukomeza gukoresha iyo gereza binyuranye n’indangagaciro z’abanyamerika kandi bibangamiye umutekano w’icyo gihugu. Gusa amahirwe yo kugera kuri iyi ntego arasa n’ayayoyotse.

Iyo gereza irimo imfungwa zirenga 90, zimwe zizajya gufungirwa muri Amerika.

Nk’umuperezida ufite inkomoko muri Afurika, benshi bari bazi ko mu gihe cye azatuma uyu mugabane utera intwambwe kurushaho. Ariko mu bigaragara, nta tandukaniro riri mu miyoborere ye n’iy’abamubanjirije mu bijyanye no guteza imbere Afurika.

Uburyo yabaye umuperezida usabana ni kimwe mu bitazibagirana mu myaka umunani ye muri White House

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved