00:00:00 IGIHE NETWORK KN KINYARWANDA EN ENGLISH FR FRANCAIS

Ibikomangoma by’u Bwongereza byanenze BBC ku kiganiro yagiranye na ’Princess Diana’ cyabaye imbarutso y’urupfu rwe

Yanditswe na Ndahayo Emmanuel
Kuya 21 Gicurasi 2021 saa 10:45
Yasuwe :
0 0

Kuwa 20 Ugushyingo 1995, BBC, ibinyujije muri porogaramu yayo izwi nka ‘Panorama’ yatambukije ikiganiro kirambuye umunyamakuru wayo, Martin Bashir, yari yagiranye n’umufasha w’Igokomangoma Charles, ’Princess Diana’.

Ni ikiganiro cyari gikomeye cyane, kuko ari ubwa mbere umuntu w’imbere cyane mu Bwami bw’u Bwongereza yari agiranye ikiganiro n’itangazamakuru avuga ku buzima bugoye abayemo mu Ngoro y’u Bwongereza, ubuzima bwarimo kugambanirwa, gucibwa inyuma, kugenzurwa cyane, kugirirwa urwango n’ibindi biteye amatsiko.

Mu Bwongereza ubwaho abantu barenga miliyoni 23 bakuriye iki kiganiro, ariko ntibyacira aho kuko ibitangazamakuru mpuzamahanga byakiguze ku bwinshi bikacyereka amahanga, bituma BBC izamura izina ryayo ariko umunyamakuru Martin Bashir, wari umaze amezi arenga atatu yiruka kuri iki kiganiro, abyungukiramo bikomeye.

N’ubwo iki kiganiro cyavugishije amahanga ku rwego rukomeye, raporo ya y’Umucamanza Dyson, yaje kugaragaza ko Bashir yakoresheje amanyanga kugira ngo yemererwe iki kiganiro, ndetse ko ikinyamakuru cye cyabimenye mu iperereza cyakoze mu 1996, ariko kikanga kubitangaza bitewe n’uburyo iki kiganiro cyarimo kwifuzwa cyane ku rwego mpuzamahanga.

Dyson yagaragaje ko urugendo rw’iki kiganiro rwatangiye ubwo Bashir yahuraga na musaza wa ‘Princess Diana’, Earl Spencer, kuwa 31 Kanama 1995, bagakomeza gucudika kugeza ubwo amubwiye ko afite ibimenyetso simusiga by’uko hari abantu bakomeye mu Bwami bw’u Bwongereza badakunda Diana.

Ayo makuru yari agizwe ‘n’inyandiko mpimbano’ Bashir yahaye Spencer, zemeza ko hari abantu bishyuwe kugira ngo bavuge nabi ‘Princess Diana’ ndetse bamuneke mu byo akora byose.

Ibi byaje mu gihe n’ubundi Diana atari afitanye umubano mwiza n’uwari umugabo we, ’Igikomangoma Charles’ ari nawe uzasimbura Umwamikazi Elizabeth II, dore yari asigaye afitanye umubano wihariye n’undi mugore witwa Camilla Parker Bowles, ari nawe yaje kubana nawe nyuma yo gutandukana na ‘Princess Diana’.

Ibi rero byose nibyo byatumye ‘Princess Diana, wari waragizweho ingaruka zikomeye n’umugabo we wamucaga inyuma, yemera kuganira na Bashir, ndetse muri icyo kiganiro aza kuvugiramo zimwe mu mvugo zamenyekanye cyane ku Isi, nk’aho yagize ati “[Uru rukundo] tururimo turi batatu.”

Diana yanavuze ko afite ubwoba bw’uko hari abantu batamwifuriza ineza mu Ngoro y’u Bwongereza, ndetse anagaruka ku buzima bwaho butamunyuze cyane nk’uko yari abyiteze, dore ko yanashatse mu muryango w’abami akiri muto, kuko yari afite imyaka 20 gusa.

Nyuma y’iki kiganiro, ibintu byarushijeho gukomerera Diana, arushaho kwiheba kuko abenshi mu bagize Umuryango w’Ubwami bw’u Bwongereza banenze ikiganiro yatanze, bamwe bamushinja kubabeshyera abandi bavuga ko yakabije.

Byaje kurangira Diana atandukanye n’Igikomangoma Charles mu 1996, akomeza kubaho mu buzima bwigunze ariko agakundwa cyane n’itangamakuru ndetse n’abaturage, ku buryo hari abafotozi bari bafite akazi ko kuneka aho ari hose bakamukurikira no mu ngendo zo mu mahanga, kuko ifoto ye yakoshaga akayabo muri ibyo bihe.

Diana yakomeje kubaho ubuzima bwa wenyine ahunga itangazamakuru, kugeza ubwo yinjiye mu rukundo na Dodi Fayed ndetse kuwa 31 Kanama 1997, aba bombi baguye mu mpanuka y’imodoka bari kumwe, ubwo barimo kwiruka bahunga abanyamakuru barimo kubafotora mu Mujyi wa Paris.

Nyuma ya raporo ya Dyson, Ibikomangoma Williams na Harry, abana ba ‘Princess Diana’ banenze BBC ku buryo yitwaye muri iki kibazo kuko yahishe ukuri, kandi iki kiganiro cyarabaye intangiriro y’ibibazo byagejeje nyina ku rupfu.

Abana ba 'Princess Diana' banenze BBC ku kiganiro yagiranye na nyina cyamushyize mu bibazo byanaje kuvamo urupfu rwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .