00:00:00 IGIHE NETWORK KN KINYARWANDA EN ENGLISH FR FRANCAIS

Ibihugu bikize byikubiye inkingo za Covid-19 none bigiye kuzijugunya

Yanditswe na Muhonzire Sylvine
Kuya 30 Nzeri 2021 saa 08:11
Yasuwe :
0 0

Prof. Agnes Binagwaho wahoze ari Minisitiri w’Ubuzima ubu akaba ari Umuyobozi wa Kaminuza Mpuzamahanga y’Ubuvuzi, University of Global Health Equity, UGHE, iherereye i Butaro, yanenze bikomeye ibihugu bikize byimanye inkingo za Covid-19 none bikaba bigiye kuzijugunya kuko zarangije igihe.

Prof. Binagwaho yagaragaje ko mu Ukuboza 2021 ibi bihugu bizajugunya doze miliyari 1,2 z’inkingo mu gihe byari byarahakaniye ibihugu bikennye ko nta nkingo zihari zo kugura.

Abinyujije ku rukuta rwe rwa Twitter yagize ati “Ibihugu bikize byabitse inkingo, tugiye kuzigura biraduhakanira ngo nta nkingo bifite mu bubiko. Mu Ukuboza 2021 bazaba bafite doze zirenga miliyari 1,2 mu bubiko bazajugunya kuko zizaba ziri hafi kurangiza igihe, ndetse ntibigeze baha igihe ibihugu bikennye ngo bitegure uko zabageraho [zitararangiza igihe] Biteye ikimwaro!”

Leta Zunze Ubumwe za Amerika ni zo ziri ku isonga mu bihugu bifite doze nyinshi z’inkingo za Covid-19 zizapfa ubusa ndetse leta zimwe na zimwe muri iki gihugu zamaze kuzijugunya.

Leta ya Alabama yajugunye doze zigera ku 60.000, mu gihe leta ya Arkansas yajugunye doze 80.000 zarangije igihe muri Nyakanga.

NBC News yatangaje ko raporo y’Ikigo cya Amerika gishinzwe kurinda no kurwanya indwara, CDC, yerekanye ko kuva muri Werurwe kugeza muri Kanama 2021, iki gihugu cyajugunye doze miliyoni 15,1 z’inkingo.

Sharifah Sekalala, Umwarimu w’amategeko mpuzamahanga mu byerekeye ubuzima muri Kaminuza ya Warwick mu Bwongereza yavuze ko bibabaje kubona hari ibihugu bijugunya inkingo hari ibindi bizikeneye cyane.

Ati “Birababaje cyane kuba hari aho inkingo zijugunywa mu gihe ibihugu byinshi muri Afurika bitaranakingira 5% by’abaturage babyo. Benshi mu batuye Amajyepfo y’Isi ntabwo bakingiye. Umugabane wa Afurika uracyari munsi ya 10%. Ibi bintu ni ubusumbane bukabije kandi biteye ikibazo.”

Sekalala akomeza avuga ko ibihugu bikize byaguze inkingo nyinshi zo guha abaturage babyo bititaye ku bikennye ndetse bitanatekereje ku bashobora kuzanga kuziterwa ari byo byateye zimwe kurenza igihe.

Nubwo bimeze gutya ariko Leta Zunze Ubumwe ziherutse gutangaza ko zizatanga doze miliyoni 80 z’inkingo zitazakoresha aho 75% byazo zizatangwa muri gahunda ya Covax yo guha inkingo ibihugu bikennye.

Muri Amerika 65% by’abaturage bahawe nibura doze imwe y’urukingo rwa Covid-19, mu gihe abakingiwe doze ebyiri ari 56%. Ibihugu bikennye byo bimaze guha doze imwe y’urukingo 2,3% by’abaturage.

Leta Zunze Ubumwe z’Abarabu [UAE] ni yo ya mbere yakingiye abaturage benshi ku Isi bangana na 82,16% bahawe inkingo zombi, na ho Tanzania ni yo imaze gukingira bake bangana na 0,57%.

Ibihugu bikize bizajugunya inkingo za Coronavirus zirenga miliyari 1,2 kuko zarengeje igihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .