Havumbuwe umwotsi kuri kamwe mu tubumbe tugaragiye Jupiter

Yanditswe na Ndayikunda Josué
Kuya 2 Ukuboza 2019 saa 06:35
Yasuwe :
0 0

Ikigo cy’Abanyamerika gikora Ubushakashatsi ku Bumenyi bwo mu Kirere n’Isanzure (NASA) cyavumbuye umwotsi kuri Europa, kamwe mu tubumbe duto tugaragiye Jupiter, bigaragara ko hari n’amahirwe ko ibivejuru bishobora kuhaba.

Europa ni kamwe mu tubumbe 79 tugaragiye umubumbe wa Jupiter. Ni aka gatandatu mu minini iri mu isanzure rigaragiye izuba.

NASA yatangaje aya makuru kuri uyu wa Mbere tariki ya 2 Ukuboza 2019 ubwo hapimwaga umwotsi wagaragaye kuri Europa ku nshuro ya mbere. Ni ikimenyetso simusiga cy’uko ibinyabutabire n’inyanja y’umunyu iri munsi ya ‘Europa’ biha ubushobozi bwose ibivejuru kuhabonera ubuzima.

Uyu mwotsi wabanje kuvumburwa kuri Europa mu 2013 gusa kuva icyo gihe nta bundi bushakashatsi bwari bwarigeze bwongera gukorwaho.

Umwe mu bahanga ba NASA ukora mu by’ubumenyi bw’imibumbe, Lucas Paganini, yavuze ko ibinyabutabire byagaragaye kuri Europa ari muri bimwe by’ingenzi ku kuba haba hari ubuzima.

Ati “Ibinyabutabire by’ingenzi [birimo carbone, hydrogène, Oxygène, Nitrogène, n’ibindi] bigize bimwe bigaragaza ko hashobora kuboneka ubuzima. Ibikiri ikibazo ni ukubona amazi hejuru y’umubumbe w’Isi.”

Paganini yongeraho ko nubwo bikigoranye kubona icyitwa amazi bari hejuru y’umubumbe w’Isi, byibuze hari intambwe yatewe nyuma yo kubona amazi ari mu isura y’umwotsi.

Muri Kamena abahanga mu bya Siyansi babonye imyunyungugu izwi nka sodium chloride hafi ya Europa ku buryo bigaragara ko inyanja iri munsi yayo imeze nk’izo ku Isi bitandukanye n’uko babitekerezaga.

Ubusanzwe umubumbe ushobora kugira amazi akubye kabiri ari ku Isi. Ikigendajuru NASA iteganya kohereza mu kirere kizagera kuri Europa gushaka ibindi byangombwa bigaragaza ko hari amahirwe yo guturwa ku bivejuru.

Jupiter ni umubumbe wa gatanu uvuye ku zuba ndetse niwo mugari mu isanzure. Umurambararo wayo ukubye uw’Isi inshuro 11.2, naho ubunini bungana no gufata Isi dutuye ukayikuba inshuro 1321.3.

Abahanga bavumbuye umwotsi kuri kamwe mu tubumbe tugaragiye Jupiter
Abahanga mu bya Siyansi bamaze igihe bakeka ko munsi ya Europa hari inyanja ishobora gukuba kabiri ingano y'inyanja zo ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza