Kwamamaza

Havumbuwe inyandiko zihamya ko Gaddafi yafashije Sarkozy uri mu bamwivuganye

Yanditswe kuya 29-09-2016 saa 10:53' na Niyonsenga Schadrack


Urukiko rwo mu Bufaransa rwavumbuye igitabo cy’uwahoze ari Minisitiri muri Libya ku butegetsi bwa Col Muammar Gaddafi, cyerekana ko Gaddafi yahaye Nicolas Sarkozy akayabo ka miliyoni 6.5 z’amayero zo gukoresha mu bikorwa byo kwiyamamariza kuyobora u Bufaransa mu 2007.

Urubuga rwa Mediapart rusanzwe rukora inkuru z’ubucukumbuzi, ku wa Kabiri w’iki cyumweru ni bwo rwatangaje ibi.

Umwe mu bakozi b’uru rukiko yahamirije ikinyamakuru Le Monde cyo mu Bufaransa ko icyo gitabo ari icya Shukri Ghanem, wahoze ari Minisitiri ushinzwe ibikomoka kuri Peteroli muri Libya kuva mu mwaka wa 2006 kugeza mu 2011,ubwo Gaddafi yahirikwaga ku butegetsi n’abamurwanyaga bashyigikiwe n’ibihugu by’ibihangange birimo n’u Bufaransa bwari buyobowe icyo gihe na Nicolas Sarkozy,yateye inkunga mu kwiyamamaza kwe.

Uyu muyobozi wahunze igihugu mu 2011, ngo yanditse muri iki gitabo inama zose zagiye zihuza abayovozi batandukanye mu rwego rwo kunoza umugambi wo gushaka inkunga yari iyo gushyigikira Sarkozy.

Bashir Saleh, wari umujyanama ukomeye wa Gaddafi yageneye Sarkozy miliyoni 1.5 z’amayero, umuhungu wa Muammar Gadaffi, Saif al-Islam, we yatanze miliyoni 3 z’amayero ndetse na Abdullah Senussi wari ushinzwe urwego rw’iperereza yatanze miliyoni 2 z’amayero.

Mediapart itangaza ko nibura miliyoni 6.5 z’amayero zavanywe mu murwa mukuru Tripoli zoherezwa i Paris mu Bufaransa kujya gufasha Sarkozy.

Gusa ngo ikibabaje ni uko Shukri Ghanem yitabye Imana atagize ibyo asobanura kuri izi nyandiko ze, kuko ngo yapfiriye muri Autriche tariki 29 Mata 2012 arohamye mu mugezi witwa Danube.

Urupfu rwe kandi ngo rwabaye nyuma gato y’uko Mediapart isohoreye imwe mu nyandiko yanditswe na Leta ya Libya yandikirwa Perezida Sarkozy ariko ngo yuzuyemo amagambo ateye agahinda.

Inyandiko yanditswe mu Ukuboza 2006, yagaragazaga amasezerano ya Leta ya Libya yo gutera inkunga ibikorwa byo kwiyamamaza bya Nicolas Sarkozy, ingana na miliyoni 50 z’amayero. Gusa iyi nyandiko yamaganiwe kure na Nicolas Sarkozy agaragaza ko nta kuri na mba ifite.

Mu 2012 Perezida Sarkozy yareze Mediapart kuba yaragaragaje inyandiko mpimbano, gusa uru rubanza Sarkozy yararutsinzwe kuko urukiko rwemeje izo nyandiko atari impimbano nk’uko Sarkozy yabivugaga.

Mu 2013, Abacamanza mu by’ubukungu batangiye gukora iperereza kuri iyo nkunga yatanzwe mu buryo buvuga ko butemewe nyuma y’ibirego byatanzwe n’abayobozi bo muri Libya ndetse n’umunyemari Ziad Takieddine. Muri iri perereza, Claude Gueant wahoze ari umunyamabanga mu biro by’umukuru w’igihugu ku bwa Sarkozy yahaswe ibibazo ku birego byo kunyereza imisoro ingana n’ibihumbi 500 by’amayero, ibirego yatangiye ibisobanuro ariko ntibyanyura abacamanza.

Nubwo Col Muammar Gaddafi yateye inkunga Sarkozy mu kwiyamamariza kuyobora u Bufaransa, ntiyamurebeye izuba mu 2011 ubwo yahirikwaga, kuko afatanyije na David Cameron wari Minisitiri w’Intebe w’u Bwongereza bateye inkunga abarwanya Gaddafi bari muri Benghazi birangira anishwe urupfu rw’agashinyaguro. Gusa Aba bayobozi bavugaga ko ari umwanzuro wafashwe na Loni n’ishyirahamwe ry’ibihugu by’Abarabu.

Ibi bije bikurikira kandi amagambo akomeye aherutse gutangazwa na komite y’ububanyi n’amahanga y’Inteko Ishinga Amategeko y’u Bwongereza yagaye bikomeye umwanzuro wa David Cameron wo mu 2011 ubwo yari Minisitiri w’Intebe wo kujyana igihugu mu ntambara muri Libya, umwanzuro bavuze ko wari ugendeye ku mafuti akabije.

Aba badepite bavugaga ko igitekerezo gipfuye cya David Cameron cyo kohereza ingabo muri Libya cyavuyemo gusenya igihugu, bikurikirwa n’abimukira benshi no kugira imbaraga kw’iterabwoba na Islamic State muri kiriya gihugu n’agace ka Afurika y’Amajyaruguru.

Gaddafi ngo yashyigikiye Sarkozy mu bikorwa byo kwiyamamaza mu 2007

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved