Haiti: Abantu 900 bamaze guhitanwa n’umuyaga wiswe ’Matayo’

Yanditswe na Uwishyaka Jean Louis
Kuya 9 Ukwakira 2016 saa 05:59
Yasuwe : XX
0

Kugeza ubu abantu bagera kuri 900 nibo bamaze kumenyekana ko bishwe n’umuyaga wiswe Matayo (Hurricane Matthew) wibasiye Haiti kuva ku wa kabiri w’iki cyumweru. Imiryango itabara yemeje ko 90% by’Amajyepfo y’iki gihugu byashegeshwe bikomeye n’uyu muyaga.

Hamwe mu hangiritse cyane ngo abantu barengewe n’ibisigazwa by’inyubako n’ibindi bintu ku buryo hari ubwoba ko hashobora no kuboneka indi mirambo myinshi y’abapfuye.

Ibice byinshi biherereye mu Majyepfo y’iki gihugu ni byo byagizweho ingaruka mu buryo bukomeye, nkuko abakozi b’imiryango ishinzwe ubutabazi babitangarije BBC.

Uyu muyaga wiswe ’Matayo’ watangiye no kugera muri zimwe muri leta za Amerika nka Carolina na Florida ku wa Gatanu w’iki cyumweru.

Ikigo cya Amerika gishinzwe iby’imiyaga (NHC) cyatangaje ko umuyaga wageze muri Florida, wari ku muvuduko wa kilometero 75 ku isaha. Byitezwe ko uyu muyaga ushobora no kugera muri Leta ya Carolina y’Amajyaruguru mu gihe cya vuba.

Abantu bagera kuri 877 nibo bamaze kwemezwa ko bishwe n’umuyaga wa Matayo muri Haiti nk’uko ubuyobozi bw’iki gihugu bwabitangarije Ibiro Ntaramakuru by’Abongereza, Reuters ku wa Gatanu.

Jean-Pierre Jean-Donald, Umutarage utuye mu gace ka Chantal, aganira n’iki kinyamakuru yagize ati “Inzu yaratugwiriye, sinabashaga gusohoka, abantu baje kudukuraho ibisigazwa, nibwo twabonye umugore wanjye wari wamaze gupfa.”

Umuhanda munini uhuza Umurwa Mukuru wa Port-au-Prince n’agace k’Amajyepfo y’igihugu na wo wangiritse bikomeye.

Leta ya Haiti n’Umuryango w’Abibumbye batangaje ko nibura abantu 350,000 ari bo bakeneye ubufasha bwihuse.

Imiryango itegamiye kuri leta yo yatangaje ko ibyangijwe n’uyu muyaga ari byinshi ku buryo ngo itumanaho muri Haiti ryangiritse cyane bitewe n’insinga z’amashanyarazi zaguye hasi.

Guverinoma ya Amerika yihutiye kohereza ubufasha muri Haiti burimo indege icyenda za gisirikare zifasha kugeza ibiribwa mu duce twibasiwe bikomeye n’uyu muyaga, ndetse n’umuryango utabara imbabare (Croix Rouge) watangaje ko hakenewe Miliyoni 6.9 z’amadorali ya Amerika yo kwifashisha mu kugeza ubutabazi bw’ibanze ku baturage ibihumbi 50, burimo amahema yo kubamo, amazi ndetse n’ibindi bikoresho by’isuku.

Ubu butabazi buhamagajwe nyuma y’uko bigaragaye ko Haiti ishobora guhita yibasirwa bikomeye n’icyorezo cya korera yaterwa n’umwanda, bitewe n’ibikorwa by’isuku n’isukura byamaze kwangirika.

Haiti isanzwe ibarizwa mu bihugu bikennye cyane ku isi, yibasiwe n’iki kibazo mu gihe yari itarigobotora ibibazo bikomeye yasigiwe n’umutingito wayibasiye mu 2010, ukica abatari bake ndetse ukanakurikirwa n’icyorezo cya korera.

Umuyaga “Matayo” wibasiye Haiti wanageze muri Cuba ariko nta bantu batangajwe ko wahitanye, icyakora abantu bane nibo bemejwe ko bishwe na wo ubwo wageraga muri leta ya Florida muri Leta Zunze Ubumwe za Amerika kuri uyu wa gatanu ndetse ingo zirenga miliyoni zabuze umuriro w’amashanyarazi.

Ku wa gatanu kandi Perezida wa Leta Zunze Ubumwe za Amerika, Barack Obama, yatangaje ko kuba uyu muyaga wageze muri Florida ari ikimenyetso ko ugifite imbaraga ndetse ko ushobora no kwangiza ibindi bintu byinshi.

90% by'igice cy'Amajyepfo ya Haiti cyashegeshwe n'uyu muyaga
Imihanda yaratengutse ku buryo ahenshi hari gukoreshwa indege mu gutabara abaturage
Uyu muyaga wageze no mu bice bimwe byo muri Leta Zunze Ubumwe za Amerika
Uyu muyaga wanaguyemo imvura nyinshi yangije ibitari bike inatwara ubuzima bw'abantu n'amatungo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza