FBI yongeye gushimangira ubuziranenge bwa Hillary Clinton ku kibazo cya email

Yanditswe na Philbert Girinema
Kuya 7 Ugushyingo 2016 saa 08:41
Yasuwe : XX
0

Ibiro by’Abanyamerika bishinzwe iperereza, FBI, byatangaje ko nta cyaha Hillary Clinton afite nyuma y’iperereza rishya ryakozwe ubwo hari hamaze gutahurwa ubundi butumwa bwa Email uyu mugore uri kwiyamamariza kuyobora Amerika yabitse akoresheje mudasobwa itari iy’akazi.

Hari hashize iminsi igera ku munani FBI itangaje ko yabonye ubundi butumwa bwa email Hillary Clinton yabitse mu buryo bunyuranyije n’amategeko.

Ni ubutumwa bwavumbuwe muri mudasobwa ya Huma Abedin umuyobozi wungirije ushinzwe ibikorwa bye byo kwiyamamaza, akaba yaranabaye uwungirije ushinzwe abakozi mu gihe Hillary Clinton yari Umunyamabanga wa Leta.

Hahise hatangira iperereza kuri ubwo butumwa, ari ryo ryagaragaje ko nta mpinduka ugereranyije n’ibyo ibyo biro byari byatangaje muri Nyakanga uyu mwaka nk’uko bigaragara mu butumwa James Comey, Umuyobozi wa FBI yahaye Abagize Inteko Ishinga Amategeko kuri iki cyumweru.

Nk’uko CNN dukesha iyi nkuru ibitangaza, James Comey ati “Dushingiye ku isubiramo twakoze, nta cyahindutse ku mwanzuro wacu twatangaje muri Nyakanga.”

Umukandida uhanganye na Clinton mu matora ategerejwe kuri uyu wa Kabiri, Donald Trump yamaganye ibyavuye muri iri perereza agira ati “ Ntushobora gusubira mu butumwa bushya 650,000 mu minsi umunani gusa. Hillary Clinton akwiye kubiryozwa kandi na we arabizi, FBI irabizi, abaturage barabizi, rero ubu ni ahanyu abanyamerika ngo mugaragaze ubutabera mu matora yo kuwa 8 Ugushyingo.”

Umuyobozi wa FBI,James Comey

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza