EU yemeje ko izihimura kuri Amerika niyongera imisoro kuri divayi z’u Bufaransa

Yanditswe na IGIHE
Kuya 24 Kanama 2019 saa 03:23
Yasuwe :
0 0

Umuryango w’Ubumwe bw’u Burayi (EU), wavuze ko nawo witeguye kuzamura imisoro ku bicuruzwa bya Leta zunze Ubumwe za Amerika, mu gihe zaramuka zishyizeho imisoro ku mivinyu y’u Bufaransa zihimura kuri gahunda yabwo yo gusoresha ibigo by’ikoranabuhanga.

Perezida w’Akanama ka EU, Donald Tusk, kuri uyu wa Gatandatu mu nama y’ibihugu birindwi bikize, G7, iteraniye i Biarritz mu Bufaransa, yavuze ko Perezida Donald Trump, azamura imisoro ku mpamvu za politiki kandi bishobora kugira ingaruka ku Isi yose harimo na EU.

Ati “EU izongera imisoro ku bicuruzwa bya Amerika, mu gihe Trump yakongera umusoro kuri divayi z’u Bufaransa”.

Mu gitondo cyo kuri uyu wa Gatandatu Trump yanenze umusoro w’u Bufaransa ku bigo by’ikoranabuhanga avuga ko ugamije kubangamira ibigo byo muri Amerika ndetse atera ubwoba ko ashobora gushyira umusoro kuri divayi yabwo.

Ubwo yavuganaga n’itangazamakuru muri White House, mbere yo kujya mu nama ya G7, Trump yavuze ko atari umufana ukomeye w’ibigo by’ikoranabuhanga ariko ari ibigo bikomeye bya Amerika, bityo akaba adashaka ko u Bufaransa bubyigirizaho nkana mu kubisoresha.

Nk’uko Reuters yabyanditse, Trump yagize ati “Nibaramuka babikoze natwe tuzasoresha divayi zabo kurenza uko byigeze bibaho mbere”.

U Bufaransa bwemeje itegeko ry’umusoro wa 3% muri Nyakanga ku bigo binini 30 by’ikoranabuhanga birimo; Facebook, Amazon na Google. Uyu musoro uzajya ucibwa ibigo byinjiza hejuru ya miliyoni 750 z’amayero ku mwaka avuye mu bikorwa byabyo by’ikoranabuhanga harimo miliyoni 27 z’amayero bikura mu Bufaransa.

Perezida w’Akanama ka EU, Donald Tusk yavuze ko Amerika niyongera imisoro kuri divayi z'u Bufaransa nabo bazongera imisoro ku bicuruzwa byayo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza