00:00:00 IGIHE NETWORK KN KINYARWANDA EN ENGLISH FR FRANCAIS

EU igiye kongera ibihano yafatiye Belarus kubera ikibazo cy’abimukira

Yanditswe na Umwali Zhuri
Kuya 15 Ugushyingo 2021 saa 09:43
Yasuwe :
0 0

Umuryango w’Ubumwe bw’u Burayi (EU) watangaje ko ugiye gukaza ibihano wafatiye Belarus, nyuma y’uko icyo gihugu gishinjwe kuba intandaro y’ubwiyongere bw’abimukira baturutse mu Burasirazuba bwo Hagati bagana mu Burayi.

Ku mupaka wa Belarus na Pologne hari ibihumbi by’abimukira baturutse mu bihugu nka Iraq, Syria, Yemen, Afghanistan n’ibindi bitandukanye byiganjemo ibyo mu Burengerazuba bwo Hagati.

Aba bimukira benshi bageze kuri uwo mupaka baturutse muri Belarus, ariko naho bakaba barahageze bafite ibyangombwa by’uko ari abakerarugendo, gusa bikaza kurangira benshi bagiye ku mupaka wa Belarus na Pologne.

EU yatangaje ko uburyo abimukira bageraga muri Belarus ari ibintu byapanzwe neza, bifite gahunda ku buryo abimukira binjira mu gihugu bazi ko ikibazanye ari ukwerekeza ku mupaka wa Pologne, na cyane ko Belarus ari Umunyamuryango wa EU.

Iki gihugu gishinjwa kuba cyaroroheje uburyo abaturage mu bihugu byo mu Burasirazuba bwo Hagati babona Visa yerekeza muri Belarus, amakuru akavuga ko ambasade z’icyo gihugu mu bihugu byakuwemo abimukira, zabaga zibizi neza ko ikibajyanye atari ubukerarugendo nk’uko byavuzwe, ahubwo ari ukubafasha kugana ku Mugabane w’u Burayi.

Abayobozi ba EU bavuga ko ibi bikorwa bya Belarus biri mu rwego rwo kwihimura kuri uyu Muryango, uherutse gufatira icyo gihugu ibihano by’ubukungu, kizira amatora aherutse kubayo, EU ivuga ko atanyuze mu nzira zikwiriye.

Ibi bihano byarakaje Perezida Alexander Lukashenko wa Belarus, wahise ashaka ikintu yakora kigahangayikisha EU. Bivugwa ko inzego zishinzwe gutanga ibyangombwa by’abinjira n’abasohoka muri Belarus, zakoranye n’ibigo bitembereza ba mukerarugendo muri icyo gihugu, ndetse n’ibigo bifasha abantu bava mu bihugu biri mu Burengerazuba bwo Hagati, kugira ngo bashyireho umugambi umwe w’uburyo abimukira bazajya bagera mu Burayi mu buryo bworoshye.

Ibi byakurikiwe n’ubwiyongere bw’ingendo zikorwa n’ikigo cya Leta ya Belarus gikora ubwikorezi bwo mu kirere, Belavia, zihuza Belarus n’ibihugu birimo abimukira.

Nko muri Gashyantare, iki kigo cyari cyakoze ingendo 28 mu Burasirazuba bwo Hagati, ariko zageze kuri 65 muri Nyakanga uyu mwaka.

Leta ya Belarus yahakanye uruhare rwayo muri ibi bikorwa.

Bikekwa ko ibihano bishya, dore ko bigiye gutangwa ku nshuro ya gatanu, bizibanda cyane kuri iki kigo cya Belavia n’ibindi bitandukanye.

Hagati aho, Belarus yatangaje ko ishobora kwihimura, ikaba yakumira ko gas ituruka mu Burusiya igana mu Burayi ishobora kunyura muri icyo gihugu.

Kugeza ubu abantu umunani bamaze gupfira ku mupaka uhuza Belarus na Pologne, benshi bakaba bari kwicwa n’ubukonje ndetse n’umunaniro.

img479539|center>


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .