00:00:00 IGIHE NETWORK KN KINYARWANDA EN ENGLISH FR FRANCAIS

Abarwanyi bo muri Tigray barototera Addis Ababa, Ebola yishe batandatu muri RDC,...Avugwa mu mahanga

Yanditswe na IGIHE
Kuya 4 Ugushyingo 2021 saa 10:20
Yasuwe :
0 0

Itsinda ry’abarwanyi bo mu bwoko bwa ‘Oromo’ bifatanyije n’abakomoka mu Ntara ya Tigray mu kurwanya ubutegetsi bwa Minisitiri w’Intebe wa Ethiopia, Abiy Ahmed ryatangaje ko bashobora kwigarurira Umurwa Mukuru w’iki gihugu, Addis Ababa mu minsi mike ibarirwa mu mezi cyangwa ibyumweru.

Ibi uyu mutwe wabitangaje nyuma y’uko ku wa Gatatu, tariki 4 Ugushyingo 2021, ubuyobozi bw’Ishyaka TPLF rihanganye na Minisitiri w’Intebe Abiy ritangaje ko abarwanyi baryo bari gusatira ibice bya Kemissie na Amhara, biherereye muri kilometero 325 uvuye mu Murwa Mukuru Addis Ababa.

Kugeza ubu aba barwanyi bo muri Tigray batangiye gufatanya n’abandi bakomoka mu moko atandukanye yo muri Ethiopia kugira ngo bahirike ubutegetsi bwa Minisitiri w’Intebe Abiy. Abari ku isonga ni abo mu Mutwe uzwi nka ‘Oromo group allied (OLA)’ ugizwe n’abaturage bo mu bwoko bw’Aba-Oromo.

Ubu bwoko ni bwo bufite abaturage benshi muri Ethiopia kuko basaga miliyoni 35, aho bihariye 34.5% by’abaturage bose bagize iki gihugu.

Umuvugizi wa OLA, Odaa Tarbii, yavuze ko intego yabo ari uguhirika ubutegetsi bwa Minisitiri w’Intebe, Abiy.

Yakomeje avuga ko ibi bishobora kuba mu minsi mike ibarirwa no mu byumweru.

Ati “Ibintu nibikomeza mu nzira birimo, aha twaba tuvuga igihe kingana n’amezi niba atari ibyumweru.”

Umuvugizi wa TPLF, Getachew Reda, yatangaje ko bazakomeza gufatanya n’aba barwanyi bo mu Mutwe wa OLA no mu minsi iri imbere.

Mu gihe aba barwanyi bavuga ibi, Minisitiri Abiy we akomeje gusaba Abanya-Ethiopia by’umwihariko abatuye Addis Ababa kwitegura kurwana.

Abiy yavuze ko aba barwanyi ari abanzi ba Ethiopia bashaka kuyitezamo umutekano muke nk’uko byagenze kuri Libya na Syria.

Kugeza ubu, Inama y’Abaminisitiri muri Ethiopia yashyizeho ibihe bidasanzwe mu gihe ingabo z’Umutwe w’Inyeshyamba wa TPLF urwanira ukwigenga kw’Intara ya Tigray zikomeje gufata imijyi imwe n’imwe.

Abarwanyi bo muri Tigray barototera Addis Ababa

===========================================================

Tanzania: Ikibazo cy’indege n’umupilote waburiwe irengero gikomeje kuba agatereranzamba

Inzobere mu by’indege muri Tanzania zatangaje ko kubona irengero ry’indege n’umupilote wari uyitwaye bishobora kurushaho kugorana ngo kuko ubu bwoko bw’indege yari atwaye bugendera ku butumburuke buri hasi ku buryo zidakurikiranwa cyane na ‘radar’.

Ku wa 18 Ukwakira 2021 ni bwo Umupilote witwa Samwel Gibuyi yaburanye n’indege yari atwaye. Gibuyi yabuze atwaye indege yarimo wenyine ubwo yari aturutse ahitwa Matemanga mu gace ka Ruvuma, yerekeza mu Cyanya cyahariwe Inyamaswa cya Selous Game Reserve. Yari agiye kuhashaka Inkura zirabura.

Kuva iki gihe ibikorwa byo kumushaka byahise bitangira ariko ntaraboneka ndetse n’icyizere cyo kumubona kigenda kiyoyoka.

John Njawa, Inzobere mu by’Indege yaganiriye na The Citizen yavuze ko ibikorwa byo gushakisha uyu mugabo n’indege yari atwaye bishobora kugorana kurenza uko benshi babikeka ngo kuko indege yari atwaye zitajya zipfa kubonwa na radar kuko zigurukira ku butumburuke bwo hasi.

Samwel Gibuyi w’imyaka 31 yatangiye gukorera uwo Muryango mu 2014. Afite impamyabushobozi yo gutwara indege yakuye muri Tanzania n’indi yo muri Afurika y’Epfo.

Umupilote Samwel Gibuyi akomeje kuburirwa irengero

===========================================================

RDC: Ebola yishe batandatu

Ishami ry’Umuryango w’Abibumbye ryita ku Buzima (OMS) ryatangaje ko muri Repubulika Iharanira Demokarasi ya Congo habonetse abarwayi umunani ba Ebola.

OMS ibinyujije kuri Twitter yatangaje ko aba barwanyi babonetse mu Ntara ya Kivu y’Amajyaruguru, aho batandatu muri bo bahise bicwa n’iki cyorezo.

Ebola yongeye kubura umutwe muri Repubulika Iharanira Demokarasi ya Congo nyuma y’uko muri Gicurasi 2021 yari yatangaje ko yabashije kuyihashya.

Kuva mu 2018 ni bwo Repubulika Iharanira Demokarasi ya Congo yatangiye kwibasirwa na Ebola, aho kuva muri uwo mwaka kugeza mu 2020 yari imaze guhitana abarenga 2000 mu gihe abayanduye nabo barenga 3000.

Kugeza ubu Ishami ry’Umuryango w’Abibumbye ryita ku Buzima ryatangije ibikorwa byo gukingira iki cyorezo muri RDC.

Ebola imaze kwica batandatu muri Repubulika Iharanira Demokarasi ya Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .