00:00:00 IGIHE NETWORK KN KINYARWANDA EN ENGLISH FR FRANCAIS

El Salvador yabaye igihugu cya mbere ku Isi cyemeye ikoreshwa rya Bitcoin

Yanditswe na Bukuru JC
Kuya 10 Kamena 2021 saa 09:14
Yasuwe :
0 0

El Salvador yemeje umushinga w’itegeko wemeza ko ifaranga ry’ikoranabuhanga rya bitcoin, rikoreshwa mu kwishyurana mu buryo bwemewe n’amategeko, rikiyongera ku idolari rya Amerika risanzwe rikoreshwa muri icyo gihugu.

Bitcoin ni ifaranga ry’ikoranabuhanga rikoreshwa mu kwishyura ibintu bitandukanye, rikagira umwihariko w’uko ritagenzurwa n’urwego runaka, ahubwo agaciro karyo kagaterwa n’uburyo rikenewe ku isoko.

Bitcoin ni ryo faranga ry’ikoranabuhanga ryamenyekanye kurusha andi arenga 1000 ariho, akoreshwa hifashishijwe ikoranabuhanga rya blockchain.

El Salvador izajya yemera ko bitcoin ikoreshwa mu kwishyura ibintu byose kuva ku misoro kugera ku kugura ubutaka ndetse no kwishyura muri restaurant, icyakora ibiciro by’igurana rya bitcoin n’andi mafaranga bizajya bigenwa n’isoko, ntabwo ari Banki Nkuru y’Igihugu izabigena nk’uko bigenda ku yandi mafaranga.

Perezida wa El Salvador, Nayib Bukele, akaba n’umwe mu bashyigikiye uyu mushinga, yavuze ko uzatuma igihugu cye kiri mu bikennye ku Isi, kibasha gukurura abashoramari mpuzamahanga ndetse no gutuma abaturage 70% badakoresha serivise z’imari, babasha kuzikoresha.

Icyakora abanenga bitcoin bavuga ko ishobora guteza ibindi bibazo bikomeye mu bukungu na cyane ko El Salvador itashyizeho uburyo bwo kugenzura iryo faranga.

Icyo aba baheraho ni uburyo bitcoin ikunze gutakaza agaciro mu buryo buhoraho, ibishobora kugira ingaruka ku biciro ndetse no ku bwizigame bw’abantu.

Nk’ubu bitcoin 1 iri kugura ibihumbi 36$, nyamara mu mezi macye ashize, agaciro kayo karazamutse kagera ku bihumbi 65$, ibi bigatera impungenge ku bashoramari badashobora kwizera ubudahangarwa bw’iri faranga ku buryo ryabikwamo ubwizigame bwabo.

Bitcoin zigiye gutangira gukoreshwa muri El Salvador mu buryo bwemewe n'amategeko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .