Kwamamaza

Edward Snowden wamennye amabanga y’Amerika yasabye kwemererwa gusubira iwabo

Yanditswe kuya 15-09-2016 saa 15:55' na Niyonsenga Schadrack


Umunyamerika Edward Snowden washyize ahagaragara amabanga y’ubutasi bwa Leta Zunze Ubumwe za Amerika mu kumviririza ibivugirwa kuri telefoni z’abayobozi bakomeye ku Isi, yagaragaje ko ashaka gusubira mu gihugu cye cy’amavuko ndetse asaba Perezida Barack Obama kutazava ku butegetsi atamuhaye imbabazi.

Umuhanga mu by’ikoranabuhanga, Snowden Edward wahoze akorana n’urwego rw’ubutasi muri Leta Zunze Ubumwe za Amerika yahunze mu 2013 nyuma yo gushyira hanze amwe mu mabanga y’uru rwego.

Mu mashusho y’iminota mike yafashwe n’umunyamakuru wa Guardian, yagaragaje Edward Snowden asaba imbabazi zo kwemererwa gusubira muri Leta Zunze Ubumwe za Amerika nyuma y’imyaka itatu ari mu buhungiro.

Yagize ati “Ndashaka gusubira mu gihugu cyanjye cy’amavuko kandi mfite icyizere ko igihe kizagera nkongera gukandagiza ikirenge mu rugo.”

Snowden yakomeje agira ati "Ndakeka ko abantu barebye inyungu ibyatangajwe byazanye, biragaragara ko kuva mu mwaka wa 2013 amategeko y’igihugu cyacu yahindutse. Inteko Ishinga Amategeko, inkiko, Umukuru w’igihugu n’undi muturage wese yahinduye imyumvire ye nyuma yo kugaragaza aya mabanga. Muri icyo gihe kandi nta gihamya n’imwe yagaragazaga ko hari abagizweho ingaruka n’ibyabaye.”

Leta Zunze Ubumwe za Amerika yateye utwatsi abasabira Snowden imbabazi

Umuryango Mpuzamahanga urengera uburenganzira bw’ikiremwamuntu, Amnesty International ndetse n’abanyapolitiki bakomeye ku Isi bakunze kumvikana basabira Snowden imbabazi akongera kwemererwa kuba muri Amerika ariko igihugu cye cyakomeje kubitera utwatsi.

Muri Nyakanga, Perezidansi ya Amerika yatangaje ko idashobora kubabarira Snowden washyize ahagaragara amabanga y’uburyo iki gihugu cyakoresheje ikoranabuhanga ry’ubutasi mu kumviririza ibiganiro bikorerwa kuri telefone z’abayobozi bakomeye muri 2013.

Icyo gihe, Umujyanama wa Perezida Obama mu bijyanye n’umutekano w’imbere mu gihugu no gukumira iterabwoba, Lisa Monaco yagize ati “Edward Snowden agomba kugaruka agacirwa urubanza na benewabo, ntagomba gukomeza kwihisha mu mahanga. Kuri ubu ari mu buhungiro kubera ingaruka z’ibyo yakoze.”

Snowden ashobora gufungwa imyaka 30

Uyu mugabo wamennye amabanga y’ubutasi bwa Amerika kuri ubu uri mu buhungiro mu Burusiya ashobora guhanishwa igifungo cy’imyaka 30.

Ikinyamakuru Le Parisien gitangaza ko Snowden yatorokanye izindi mpapuro z’amabanga y’ Ikigo cy’Ubutasi bwa Amerika yakoreraga, kimwe mu bibitse amabanga akomeye y’igihugu cyane ajyanye n’ubutumwa bunyuzwa mu buryo bw’ikoranabuhanga.

Oliver Stone wafashe aya mashusho ya Snowden asaba imbabazi yizeraga ko bishobora gutuma Obama ahindura imyumvire akamubabarira.

Uyu munyamakuru wa The Guardian yagize ati "Nyakubahwa Obama akwiye kubabarira Snowden kandi ndabyizeye."

Ari gutegura filime ndende izashyirwa ahagaragara ku wa 26 Ukwakira, igaragaramo Snowden atanga ibitekerezo bimugaragaza nk’ukunda igihugu cye.

Iyi filime igiye gusohoka nyuma y’icyegeranyo cyashyizwe ahagaragara na Laura Poitras wafashe amashusho ya Snowden ahereza umugenzuzi wa The Guardian amabanga y’ubutasi bw’Amerika mu cyumba cya hoteli mu mujyi wa Hong Kong.

Snowden yagaragaye mu kiganiro cya televiziyo asaba imbabazi Perezida Barack Obama
Edward Snowden yamennye amabanga y'Ikigo cy'Ubutasi muri Amerika

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 29 Nzeri 2016
Copyright © 2009 -2014 - IGIHE Ltd - All Rights Reserved