00:00:00 IGIHE NETWORK KN KINYARWANDA EN ENGLISH FR FRANCAIS

Dr Tedros yatanzwe nk’umukandida rukumbi ku mwanya w’Umuyobozi wa OMS

Yanditswe na Muhonzire Sylvine
Kuya 29 Ukwakira 2021 saa 11:47
Yasuwe :
0 0

Umuyobozi w’Ishami ry’Umuryango w’Abibumbye ryita ku Buzima, Dr. Tedros Adhanom Ghebreyesus, ashobora kongera kuyobora OMS muri manda ya kabiri y’imyaka itanu nyuma yuko kugeza ubu ari we mukandida wenyine watanzwe kuri uyu mwanya.

Aya makuru yatanzwe n’abadipolomate bo mu bihugu byo mu Burengerazuba bw’Isi, avuga ko ibihugu 28 mu 194 by’ibinyamuryangwo by’iri shami bimaze kumutora nk’umukandida ku mwanya w’Umuyobozi wa OMS.

Inkuru dukesha Reuters ivuga ko muri ibyo bihugu 28 hatarimo igihugu cye cy’inkomoko cya Ethiopia, bikekwa ko ari ukubera uruhande yahagazeho mu kibazo cy’umutekano muke muri Tigray, aho byavuzwe ko yari ashyigikiye inyeshyamba za TPLF nubwo yabihakanye akavuga ko we icyo ashaka ari amahoro gusa.

Mu bindi bihugu byamwemeje nk’umukandida harimo ibihugu bitatu gusa byo muri Afurika birimo u Rwanda, Kenya na Botswana mu gihe i Burayi yatowe n’u Bufaransa, u Budage ndetse n’ibindi bihugu byo mu Muryango w’Ubumwe bw’u Burayi, EU. Gusa Leta Zunze Ubumwe za Amerika ntizamutoye.

Amatora y’Umuyobozi wa OMS ateganyijwe kuba mu Nama Rusange ya 75 ya OMS izaba muri Gicurasi 2022.

Ibikorwa byo gutanga umukandida kuri uyu mwanya byatangiye muri Mata 2021, aho ibihugu binyamuryango bya OMS byohererejwe amabaruwa atangwamo umukandida bishyigikiye, igikorwa cyatangiye ku itariki 23 Nzeri 2021.

Mbere y’uko ayobora OMS, Dr. Tedros yari Minisitiri w’Ubuzima ndetse na Minisitiri w’Ububanyi n’Amahanga wa Ethiopia, aho muri manda ye kuri uyu mwanya yagize uruhare rukomeye mu guhangana n’icyorezo cya COVID-19 cyateye Isi mu 2019, ikibazo cya mbere cy’ubuzima cyahangayikishije Isi muri iki kinyejana.

Umuvugizi wa OMS, Margaret Harris, yatangaje ko ku wa 29 Ukwakira 2021 aribwo hazamenyekana amakuru yose ajyanye y’abakandida babonetse kuri uyu mwanya.

Dr. Tedros ashobora kuyobora OMS muri manda ya Kabiri y'imyaka itanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .