Kwamamaza

Donald Trump yakomoje ku byo gushyira Clinton muri gereza

Yanditswe kuya 10-10-2016 saa 11:38' na Jean Pierre Tuyisenge


Donald Trump,umukandida w’ishyaka ry’aba-Republicain ku mwanya wa Perezida wa Leta Zunze Ubumwe za Amerika,kuri iki Cyumweru yavuze ko iyo aza kuba ari Perezida aba yarashyize Hillary Clinton bahanganye muri gereza, ahiga ko naramuka atowe azamukurikirana ku byaha ashinjwa byo gukoresha konti ye bwite ya ‘email’ mu kazi ka Leta ubwo yari Umunyamabanga wa Leta hagati y’umwaka wa 2009 na 2013.

Mu kiganirompaka cyo mu ijoro ryakeye, Donald Trump yavuze ko azashyiraho umushinjacyaha wihariye uzakurikirana ubutumwa Clinton yohereje kuko ngo yashyize umutekano w’igihugu mu kaga.

Reuters yanditse iyi nkuru, ivuga ko icyo kiganirompaka cyamaze iminota 90 cyibanze ahanini ku mashusho (Video) yafashwe mu mwaka wa 2005, aho Trump yumviswe avuga amagambo y’urukozasoni ku bagore.

Trump yavuze ko iyo video yamubabaje ariko ko we yiganiriraga. Yagize ati “ Bill Clinton ni we wakoze ibibi, ibyanjye byari amagambo ariko ibye ni ibikorwa”.

Trump yagaragaye mu kiganiro mpaka ari kumwe n’abagore bashinja Bill Clinton kubahohotera ubwo yari ku butegetsi kuva 1993-2001.Trump yashinje Hillary Clinton gutoteza abo bagore.

Hillary Clinton yashubije Trump ko adakwiye kuba Perezida wa Leta Zunze Ubumwe za Amerika. Ati “ Yavuze ko video itagaragaza uwo ari we, ariko ndahamya ko kuri buri wese wayibonye igaragaza neza uwo ari we”.

Trump yakomeje kunenga Clinton ku butumwa bw’ibanga bwa email amubwira ko “ na we ubwe yagakwiye kwinenga”.

Muri icyo kiganiro Clinton yavuze ko " bitunguranye cyane kubona umuntu ufite imyitwarire nk’iya Trump adashinjwa icyaha na kimwe muri iki gihugu” undi na we amusubiza agira ati " nawe uba uri muri gereza".

Iperereza ryakozwe n’Ibiro by’Ubutasi bya Leta Zunze Ubumwe za Amerika,FBI muri uyu mwaka, ryashojwe nta cyaha gihamye Clinton nubwo Umuyobozi Mukuru wa FBI James Comey, yavuze ko yagize ubushake buke mu kwitondera ibyahungabanya umutekano w’igihugu.

Clinton yakomeje avuga ko nta “gihamya” ko ububiko bwe bwaba bwaribasiwe na ba rushimimusi ndetse ko nta makuru yigeze atesha agaciro.

Donald Trump na Hillary Clinton mu Kiganiro Mpaka

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved