Kwamamaza

Trump yatangaje ibyo azakora mu minsi 100 ya mbere aramutse atorewe kuyobora Amerika

Yanditswe kuya 23-10-2016 saa 12:14' na Philbert Hagengimana


Mu gihe habura iminsi 17 ngo habe amatora y’Umukuru w’Igihugu muri Leta Zunze Ubumwe za Amerika, Donald Trump, umwe mu bakandida, yatangaje ibyo azakora mu minsi 100 ya mbere aramutse atorewe kuyobora icyo gihugu.

Kuri uyu wa Gatandatu tariki ya 22 Ukwakira, Donald Trump yiyamamarije ahantu hatatu hatandukanye, aho yabanje muri Leta ya Pennsylvania, nyuma ajya muri Virginia asoreza muri Ohio.

Mu ijambo yavugiye i Gettysburg muri Leta ya Pennsylvania, Donald Trump yavuze ibyo azibandaho mu minsi 100 ya mbere ku butegetsi, aho ateganya impinduka zitandukanye.

Bimwe mu by’ingenzi Trump azibandaho mu minsi 100 ya mbere ku butegetsi bwe, harimo kuvugurura imikorere mu ngoro y’Umukuru w’Igihugu, aho abayobozi bayikoreyemo bagira uruhare mu gufata ibyemezo nyuma yo kurangiza imirimo yabo.

Trump ateganya no gushyiriraho manda abagize Inteko Ishinga Amategeko, guhagarika amafaranga ahabwa Umuryango w’Abibumbye muri gahunda zo kwita ku mihindagurikire y’ikirere, ayo mafaranga akayashora mu bikorwa remezo bya Leta Zunze Ubumwe za Amerika.

Uwo mugabo ukirushwa amahirwe na Hillary Clinton bahanganye, aramutse atowe, mu minsi 100 ya mbere ngo azihatira kwirukana abimukira b’abanyabyaha basaga miliyoni ebyiri n’ababa muri Amerika mu buryo bunyuranyije n’amategeko, no kwima Visa abaturuka mu bihugu byanze gukura abaturage babyo muri Amerika.

Anateganya kandi guhanga imirimo mishya miliyoni 25 mu myaka 10, kugabanya imisoro, kugabanya amafaranga yishyurwa muri Kaminuza, gukuraho gahunda ya Obamacare, kubaka urukuta rutandukanya icyo gihugu na Mexique n’ibindi.

Yanakomeje avuga ko abagore bamushinje ihohotera rishingiye ku gitsina, azabakurikirana mu butabera.

Amatora y’Umukuru w’Igihugu muri Amerika ateganyijwe ku wa 8 Ugushyingo. Kugeza ubu Hillary Clinton akomeje kuza imbere ya Donald Trump mu mahirwe yo kwegukana intsinzi, ku gipimo cya 47% mu gihe Trump afite 43%.

Ubwo yavugiraga ijambo i Gettysburg, Trump yabwiye Abanyamerika ko bakwiye kurangwa no gutekereza kure mu byo bakora.

Trump kandi yongeye kwikoma itangazamakuru avuga ko mu gihe hitegurwa amatora rikomeje kurangwa no kubogama.

Trump yavuze ko azahindura byinshi namara kuba Perezida wa Amerika

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved