Kwamamaza

Donald Trump yasabye imbabazi ku magambo y’urukozasoni yavuze ku bagore

Yanditswe kuya 8-10-2016 saa 13:04' na Emma-Marie Umurerwa [email protected]


Donald Trump, umukandida wo mu ishyaka ry’Aba-Republican muri Leta Zunze Ubumwe z’Amerika, uhatanira intebe y’Umukuru w’Igihugu mu matora ateganyijwe mu Ugushyingo uyu mwaka, yasabiye imbabazi amagambo y’urukozasoni yavuze ku bagore mu mwaka wa 2005.

Mu mashusho yashyizwe ahagaragara, Trump yumvikana yivuga ibigwi by’uburyo agerageza gusambanya abagore, hari n’aho yumvikana mu mvugo y’urukozasoni avuga ko yagerageje gusambanya umugore ufite umugabo ariko akamubera ibamba.

Inkuru dukesha BBC ivuga ko uyu mugabo agira ati " Ushobora gukora icyo ushaka cyose ku bagore iyo uri icyamamare".

Ayo magambo yahise yamaganwa n’abayobozi bakuru b’ishyaka ry’aba Republican barimo umukuru w’Inteko Ishinga Amategeko, Paul Ryan, wavuze ko ayo magambo yamuteye iseseme.

Mu itangazo yashyize ahagaragara mu gitondo cyo kuri uyu wa Gatandatu, Donald Trump, yasabye imbabazi.

Yagize ati "Narabivuze kandi ndabyicuza, buri wese unzi azi ko ariya magambo adasobanura uwo ndi we. Narabivuze, naribeshye kandi ndabyicuza. Sinigeze mvuga ko ndi intungane, cyangwa ngo ngerageza kwigira uwo ntari we. Mbijeje kuba mwiza ejo hazaza".

Trump yashinje Bill Clinton guhohotera abagore na Hillary Clinton bahanganye gukoza isoni abagore bahohotewe n’umugabo we.

Donald Trump ni umugabo uzwiho kuvuga amagambo atuma abantu bibaza uko politiki y’ubucuruzi, iya gisirikare na dipolomasi by’ Amerika bizamera naramuka atorewe kuba Perezida wa Leta Zunze Ubumwe za Amerika.

Abasesengura ibya Politiki ya USA baganiriye n’iki kinyamakuru, bemeza ko kuva intambara ya Kabiri y’Isi yarangira ari bwo bwa mbere babonye umukandida badasobanukiwe neza politiki mpuzamahanga ye, ngo kuko uburyo yiyamamazamo buteye urujijo.

Bavuga kandi ko badafite icyizere cyo gukomeza kwiringira Amerika mu gihe Trump yaba abaye Perezida, akanashyira mu bikorwa ibyo atangaza mu migabo n’imigambi ye.

Yakunze kugaragara mu bikorwa binenga, bisebya ndetse byibasira abandi bakandida, Abaperezida bayoboye Amerika, avuga ko bataye iki gihugu mu rwobo ariko ko ari we wenyine uzagicungura.

Yigeze avuga ko abona abatuye ibihugu by’Afurika badashoboye kwiyobora, ndetse ko bakwiriye kongera gukoronizwa mu gihe cy’imyaka 100 yose.

Umukandida Donald Trump yasabye imbabazi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved