00:00:00 IGIHE NETWORK KN KINYARWANDA EN ENGLISH FR FRANCAIS

Donald Rumsfeld wabaye Minisitiri w’Ingabo muri Amerika yitabye Imana

Yanditswe na Bukuru JC
Kuya 1 Nyakanga 2021 saa 11:40
Yasuwe :
0 0

Donald Rumsfeld wabaye Minisitiri w’Ingabo muri Leta Zunze Ubumwe za Amerika ku butegetsi bwa George W Bush, agategura intambara iki gihugu cyarwanye muri Iraq na Afghanistan yitabye Imana afite imyaka 88.

Urupfu rwe rwemejwe n’abo mu muryango we bifashishije urubuga rwa Twitter, aho batangaje ko yitabye Imana azengurutswe n’umuryango we muri Leta ya New Mexico mu gace ka Taos, ariko ntibavuga icyamwishe.

Bagize bati “Amateka azahora yibuka uruhare rukomeye yagize mu myaka irenga 60 akora ibikorwa by’ubugiraneza. Ku bantu bamuzi neza ndetse n’abo ubuzima bwabo bwahindutse kubera we, tuzahora twibuka urukundo yakundaga umugore we Joyce, umuryango we n’inshuti ze ndetse n’ubwitange yagaragarije igihugu.”

Rumsfeld yabaye Minisitiri w’Ingabo kuva mu 2001 kugeza mu 2006 ku ngoma ya George W. Bush ndetse yigeze no kuba Minisitiri w’Ingabo ku butegetsi bwa Gerald Ford kuva 1975-1977. Icyo gihe yanaciye agahigo ko kuba ari we mu muntu ukiri muto uyoboye iyo Minisiteri mu mateka ya Amerika kuko yari afite imyaka 45.

Rumsfeld yagize uruhare rukomeye mu mwanzuro wa Bush wo gushoza intambara muri Afghanistan mu 2001 nyuma y’uko umutwe wa Al-Qaeda ugabye igitero muri Amerika mu 2001 kigahitana abarenga 3000.

Uyu mugabo kandi ni we wateguye intambara Amerika yagabye muri Iraq mu 2003 igamije gukuraho Saddam Hussein, ariko nyuma iyi ntambara ikaza guteza akavuyo muri iki gihugu katararangira.

Nubwo abanyamerika benshi babajwe n’urupfu rwe kubera ubwitange yagaragarije igihugu cyabo, abarabu bo bamuvumiye ku gahera bavuga ko yatumye hapfa inzirakarengane nyinshi.

Mu byo abanyamateka bamushinja ni uko imyanzuro yafashe yo gukuraho abayobozi n’ubutegetsi bwo mu bihugu bya Iraq na Afghanistan yatumye ibyo bihugu byangirika ndetse n’ubu bikaba bikibarizwamo intambara.

Donald Rumsfeld yavuye ku buyobozi bw’Ingabo yeguye nyuma y’aho ingabo yari ayoboye zihohoteye imfungwa mu gereza yo muri Iraq yitwa Abu Ghraib. Icyo gihe yavuze ko ari byo bihe bibi yagize kuruta ibindi ubwo yari umuyobozi.

Apfuye asize umugore we, Joyce, abana batatu, abuzukuru barindwi n’abuzukuruza.

Donald Rumsfeld wabaye Minisitiri w'Intebe wa Amerika yitabye Imana afite imyaka 88

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .