00:00:00 IGIHE NETWORK KN KINYARWANDA EN ENGLISH FR FRANCAIS

Cuba yatangiye gukingira Covid-19 abana b’imyaka ibiri

Yanditswe na Ntabareshya Jean de Dieu
Kuya 19 Nzeri 2021 saa 11:02
Yasuwe :
0 0

Cuba yatangiye gukingira abana bato guhera ku myaka ibiri icyorezo cya COVID-19 yifashishije urukingo rwakorewe muri icyo gihugu rwa Soberana.

Nubwo guhabwa urukingo ku mwana muri Cuba atari itegeko, ababyeyi n’abana bajyanwe ku mavuriro ari benshi, mu rwego rwo kubakingiza icyorezo gikomeje gukangaranya abatuye Isi.

Ababyeyi bazanye abana babo nyuma yo gukingirwa bavuze ko bishimiye kubona n’abana nabo bahawe uru rukingo nk’uko Laura Tijeras yabwiye CNN ubwo yari amaze gukingiza umukobwa we w’imyaka ine.

Ati " Ubu ndatekanye, abantu benshi bakomeje kurwara ariko kubera urukingo, ubu turarinzwe cyane."

Ku munsi umwe mu bitaro byo muri Havana hakingiriwe abana 230 bafite hagati y’imyaka itatu n’itanu.

Minisitiri w’ubuzima muri iki gihugu, Jose Miranda, yavuze ko Coronavirus yihinduranya ya Delta yabaye intandaro yo kwiyongera k’ubwandu bw’abana bato muri iki gihugu.

Nubwo nta mibare igaragaza abana bahitanywe na COVID-19 muri Cuba, mu ntangiriro za Kanama 2021 abana 10 bari bamaze guhitanwa nayo, naho abagera 117,500 bamaze kuyandura.

Byari biteganyijwe ko amashuri muri Cuba afungurwa muri Nzeri 2021 cyane ko igiciro cya internet kiri hejuru ku buryo byagorana gukoresha uburyo bw’ikoranabuhanga mu kwiga nk’uko mu bindi bihugu bigenda. Ibi byatumye amasomo akomeza gutangwa binyuze kuri televiziyo ariko hari ababyeyi benshi bagaragaje ko abana babo bari gusigara inyuma kubera kutagira televiziyo.

Minisitiri wungirije ushinzwe uburezi Eugenio González Pérez yahamagariye ababyeyi gukingiza abana babo kugira ngo nibura amashuri azafungure bageze ku 100%.

Kugeza ubu inkingo zikoreshwa muri Cuba ntabwo ziremezwa n’Ishami ry’Umuryango w’Abibumbye gusa inzego z’ubuzima muri icyo gihugu zemeza ko zatangiye gutanga amakuru kuri zo muri OMS.

Cuba ni cyo gihugu cya mbere cyatangiye gukingira abana bafite munsi y’imyaka itanu kuko ibindi bihugu birimo n’u Bufaransa byakingiraga abana b’imyaka 12 kuzamura.

Cuba nicyo gihugu cya mbere cyatangiye gukingira abana bafite imyaka ibiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .