00:00:00 IGIHE NETWORK KN KINYARWANDA EN ENGLISH FR FRANCAIS

COVID-19 yubuye umutwe mu Burayi

Yanditswe na IGIHE
Kuya 5 Ugushyingo 2021 saa 08:50
Yasuwe :
0 0

Ishami ry’Umuryango w’Abibumbye ryita ku Buzima (OMS) ryaburiye umugabane w’u Burayi rivuga ko icyorezo cya COVID-19 cyongeye kubura umutwe ku buryo bishobora kugeza muri Gashyantare 2022 kimaze guhitana abarenga ibihumbi 500.

Ibi byatangajwe n’Umuyobozi wa OMS mu Burayi, Hans Kluge binyuze mu kiganiro yagiranye n’itangazamakuru.

Kugeza ubu hirya no hino mu Burayi hari impungenge z’uko hashobora kwaduka inkundura ya kane ya COVID-19 kuko imibare y’abandura yongeye kuzamuka. Mu byumweru bine bishize imibare y’abandura COVID-19 kuri uyu mugabane yazamutse ku kigero cya 55%.

Mu bihugu byongeye kugaragaramo ubwandu bwinshi harimo u Budage bwanduyemo abarenga ibihumbi 34 mu masaha 24 n’u Bwongereza bwanduyemo abarenga ibihumbi 37.

Umubare w’abahitanwa na COVID-19 kandi wongeye kuzamuka mu bihugu nk’u Burusiya bwapfushije abantu 8100 mu cyumweru kimwe ndetse na Ukraine yapfushije 3800.

Hans Kluge yavuze ko uku kongera kubyutsa umutwe kwa COVID-19 mu Burayi kwatewe n’uko bimwe mu bihugu byo kuri uyu mugabane bisa n’ibyadohotse mu bijyanye na gahunda yo gukingira iki cyorezo.

Yavuze ko ibihugu nk’u Burusiya bumaze gukingira 32% gusa by’abaturage babwo, u Bufaransa 68% mu gihe u Budage ari 66%. Indi mpamvu yagaragaje nk’iyateye kongera kuzamuka ku bwandu ngo ni uko abaturage bo mu Burayi badohotse ku ngamba zo kwirinda iki cyorezo, aho batakibuka guhana intera, gukaraba intoki n’ibindi.

Muri Ukraine ni hamwe mu ho icyorezo cya COVID-19 cyongeye kubura umutwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .