Christine Lagarde uyobora IMF agiye kugezwa imbere y’urukiko

Yanditswe na Uwishyaka Jean Louis
Kuya 15 Nzeri 2016 saa 07:50
Yasuwe :
0 0

Umuyobozi w’Ikigega Mpuzamahanga cy’Imari, (IMF), Christine Lagarde, azagezwa imbere y’urukiko mu Bufaransa aho agomba kwisobanura ku makosa yakoze ubwo yagaragazaga uburangare mu kwishyura amayero miliyoni 400 Bernard Tapie, umuherwe wahoze ari nyiri sosiyete ya Adidas ikora ibikoresho bya siporo.

Iki cyaha Lagarde akurikiranweho, yagikoze ubwo yari Minisitiri w’Imari mu Bufaransa mu mwaka wa 2008.

Biteganyijwe ko uyu mufaransakazi azitaba urukiko rwashyiriweho kuburanisha abari abamisitiri bakoze ibyaha bakiri ku mirimo yabo mu kwezi kwa 12/2016 nk’uko byatangajwe n’uru rukiko.

Urukiko rw’ubujurire mu Bufaransa rwatesheje agaciro ubujurire bwa Lagarde wasabaga kutajyanwa mu rubanza mu mpera z’uyu mwaka.

Umunyamategeko wa Lagarde, Patrick Maisonneuve na we yemereye Reuters ko umukiriya we yiteguye kujya mu rukiko icyo gihe urukiko rwemeje.

Uyu muyobozi w’ikigega mpuzamahanga cy’imari wakomeje kugaragaza ko ari umwere, aramutse ahamwe n’iki cyaha yazahanishwa igifungo cy’umwaka umwe n’ihazabu y’amayero ibihumbi 15.

RFI dukesha iyi nkuru ivuga ko uru rubanza ruzaburanishwa kugeza tariki 20 Ukuboza ruzaba ari urwa mirongo itanu ruciwe n’uru rukiko rugizwe n’abacamanza batatu n’abagize Inteko Ishinga amategeko batandatu bose baturuka mu mitwe yombi y’Inteko Ishinga Amategeko y’iki gihugu.

Lagarde, w’imyaka 60 y’amavuko, ashinjwa uburangare no kudaha agaciro indishyi ya miliyoni 400 z’amayero yagombaga guhabwa Bernard Tapie, byatumye Leta igwa mu gihombo.

Iki kirego gikomoka ku bikorwa by’ubucuruzi by’umunyemari Bernard Tapie byagurishwaga na banki ya Leta yitwa Credit Lyonnais, avuga ko yamuriye amafaranga bitewe n’uko ngo yamuhaga amafaranga make ugereranyije n’ayabaga yacurujwe.

Lagarde wagombaga gushyiraho itsinda rigomba gukemura ikibazo mu maguru mashya, yatereye agati mu ryinyo kugeza bigeze mu nkiko, ariko we akavuga ko yakoreraga mu nyungu za Leta kandi akurikiza amategeko.

Christine Lagarde ashobora gufungwa umwaka wose agatanga n'amande

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza