Chirac wayoboye u Bufaransa yapfuye: Imyitwarire y’ubutegetsi bwe ku Rwanda

Yanditswe na IGIHE
Kuya 26 Nzeri 2019 saa 12:24
Yasuwe :
0 0

Jacques Chirac, wabaye Perezida w’u Bufaransa hagati ya 1995 na 2007 yapfuye ku myaka 86.

Umukwe wa Chirac, Frederic Salat-Baroux, niwe watangaje iby’urupfu rwe avuga ko ‘yapfuye mu gitondo cyo kuri uyu wa Kane aguye mu maboko y’abantu be kandi mu mahoro’.

Ubutegetsi bwe bwaranzwe na ruswa cyane. Gusa yakoze amavugurura muri politiki aho yakuye manda ya Perezida ku myaka irindwi ikaba itanu.

Chirac, wayoboye manda ebyiri nk’Umukuru w’Igihugu w’u Bufaransa, yibukirwa cyane ku kurwanya igitekerezo cya Leta Zunze Ubumwe za Amerika cyo kugaba ibitero muri Iraq mu 2003.

Uburwayi yigeze kugira mu 2005 ubwo yari Perezida bwamuciye intege bituma atangira kugaragara mu ruhame inshuro nke muri iki gihe.

Mu Ukuboza 2015, yamaze ibyumweru bibiri mu bitaro arwaye ibyo umuryango we wise umunaniro.

Imyitwarire ya Jacques Chirac ku Rwanda

Muri Gicurasi 1995, Jacques Chirac, wo mu ishyaka ry’aba-Républicains yasimbuye Mitterand ku butegetsi bw’u Bufaransa. Ubutegetsi bwe bwahuhuye umubano w’u Rwanda n’u Bufaransa bwari bumaze kugira uruhare muri Jenoside yakorewe Abatutsi.

Kubana neza n’u Rwanda Chirac byamusabaga kubanza kwemera uruhare rw’igihugu cye muri Jenoside yakorewe Abatutsi. Ibyo ntiyashoboraga kubikora kuko ayo mateka mabi na we yayagizemo uruhare kuko yakoranye na Mitterrand amubereye Minisitiri w’intebe kuva mu 1986 kugeza mu 1988.

Chirac agifata ubutegetsi yahise agaragaza uruhande rwe ku buyobozi bushya bw’u Rwanda kuko mu nama yahuje u Bufaransa n’ibihugu bya Afurika bikoresha Igifaransa yabereye muri Bénin mu 1995, yanze gutumira u Rwanda ahubwo inama ifungurwa n’umunota wo kwibuka Perezida Habyarimana.

Kuva mu 1994 kugeza mu 2000, abayobozi batandukanye bo mu bihugu byo hirya no hino bagiye baza mu Rwanda bamwe bagasaba imbabazi zo kuba ntacyo bakoze ngo bahagarike Jenoside ariko nta muyobozi w’u Bufaransa wahageze cyangwa ngo yemere urwo ruhare.

Chirac kandi mu 1999 yashyigikiye ko hatangizwa iperereza ku rupfu rwa Perezida Habyarimana.

Chirac yakomeje gukina mu ibanga amacenga agamije kugaragaza isura mbi y’abayobozi b’u Rwanda nyuma ya Jenoside.

Umubano w’u Rwanda n’u Bufaransa wari usanzwe ucumbagira wahumiye ku mirari mu 2006 ubwo umucamanza Jean-Louis Bruguière yasohoraga impapuro zita muri yombi abayobozi bakuru b’u Rwanda abashinja kugira uruhare mu ihanurwa ry’indege ya Habyarimana. Byarakaje cyane u Rwanda ruhita rucana umubano n’u Bufaransa.

Mu 2010 hari amakuru y’ibanga yasohowe na Wikileaks avuga ko Jean-Louis Bruguière mbere yo gusohora izo mpapuro yabanje kubiganiraho n’abayobozi barimo Perezida Chirac. Ngo we na Chirac bacuze umugambi bemeranya igihe izo mpapuro zagombaga gusohokera.

Chirac yashatse kwirukanisha u Rwanda muri OIF

Kuva ku itariki ya 2-4 Ukuboza 1995, i Cotonou muri Benin habereye inama ya gatandatu ya OIF, Umuryango w’ibihugu bikoresha Igifaransa, ubu uyobowe n’Umunyarwanda, Louise Mushikiwabo.

Gutangizwa kw’inama y’abakuru b’ibihugu byabaye ku ya 3 Ukuboza. Muri uko gutangira hasomwe imyanzuro yari yaraye ifashwe mu nama y’Abaminisitiri harimo uwo guhagarika no kuzirukana u Rwanda muri OIF.

Jacques Chirac wari Perezida w’u Bufaransa ni we wafashe ijambo risobanura impamvu u Rwanda rugomba kwirukanwa.

Icya mbere ngo ni uko u Rwanda rwari rutagikoresha igifaransa nk’ururimi rwemewe mu gihugu, icya kabiri kikaba ko ngo Perezida Pasteur Bizimungu w’u Rwanda yari yabeshyeye u Bufaransa ko bushaka kugarura abakoze Jenoside mu butegetsi.

Aza kuvuga ko Perezida Bizimungu yahubutse akaba atanashyira mu gaciro. Ikibabaje ni uko yikomye Perezida Bizimungu nkaho hari icyo yabeshye mu byo yavuze.

Perezida Chirac akimara kuvuga, uwari uyoboye intumwa z’u Rwanda, Minisitiri w’Intebe Pierre Celestin Rwigema, yasabye ijambo yerekana ko ibyo Perezida w’u Bufaransa yavuze harimo kubeshya kuvanze no gutukana. Yavuze ko u Rwanda rutigeze ruca igifaransa anabaza aho ibyo yabikuye ntibyasubizwa.

Rwigema yageze n’aho abaza Chirac niba yumva akeneye umusemuzi ku byo avuga kuko yakoreshaga ururimi rw’igifaransa. Ku byo Chirac yari yashinje Perezida Bizimungu, Rwigema yasabye abakuru b’ibihugu bari muri iyo nama kwamagana imvugo ya Chirac yo gutuka umukuru w’ikindi gihugu, anababwira ko ntawe ukwiye kubyemera.

Chirac yayoboye u Bufaransa manda ebyiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza