Cathédrale Notre-Dame de Paris igiye kuberamo Misa bwa mbere nyuma yo gushya

Yanditswe na Sekamana Mathias
Kuya 15 Kamena 2019 saa 05:14
Yasuwe :
0 0

Ku mugoroba wo kuri uyu wa Gatandatu Cathédrale Notre-Dame de Paris, iraberamo Misa ya mbere nyuma y’uko ifashwe n’inkongi mu mezi abiri ashize.

Iraza kwitabirwa n’abantu bagera kuri 30, ibere muri shapeli yitiriwe Bikira Mariya utarasamanywe icyaha, ikaba iri mu ruhande rw’iburasirazuba bw’iyi kiliziya.

Abaza kwitabira iyi misa bose baraza gusabwa kwambara ingofero z’ubwirinzi (Casquets) mu mutwe.

Iyi Misa irayoborwa na Arkiyepiskopi wa Pari, Michel Aupetit, ikaba iri buze gutambuka kuri televiziyo.

Kuva igisenge cy’iyi kiliziya cyasenyuka kuwa 15 Mata uyu mwaka, abakozi bakomeje kugerageza kuyisukura imbere no hanze ndetse no gusana bimwe mu bice by’iyi kiliziya yo mu kinyejana cya 12.

Kuri uyu wa Gatanu, Minisitiri w’umuco mu Bufaransa Franck Riester yavuze ko iyi kiliziya ikimeze nabi cyane ndetse ko igisenge cyayo gishobora kugwa igihe icyo ari cyo cyose.

Ikiguzi cyo gusana iyi kiliziya kibarirwa muri miliyoni 850 z’amayero, ni ukuvuga agera kuri miliyoni 955 z’amadolari ya Amerika, bikazafata imyaka igera ku 10 kongera kuyubaka.

Perezida w’u Bufaransa Emmanuel Macron, yasezeranye kongera gusana iyi kiliziya mu myaka itanu ariko abahanga mu by’ubwubatsi bavuze ko bisa n’ibidashoboka.

Uburyo buhamye iyi kiliziya izasanwa busa nk’aho butaramenyekana kuko abaherwe bemeye inkunga batarazitanga. Minisitiri Riester yabwiye Radio France, ko agera kuri miliyoni 80 z’amayero ari yo amaze gutangwa, akaba yarakusanyijwe mu nkunga ntoya z’abantu boroheje.

Abaherwe b’abashoramari mu mideli Bernard Arnault na Francois-Henri Pinault bemeye gutanga agera kuri miliyoni 300 z’amayero, kompanyi ikomeye mu by’ingufu ya Total yemera gutanga miliyoni 100 naho ikigenga cya Bettencourt Schueller cyitwa L’Oreal cyemera agera kuri miliyoni 200 z’amayero.

Minisitiri Reister yavuze ko impamvu inkunga zitatanzwe zishoboka ari ebyiri.

Yagize ati "Iya mbere, hari abashobora kwemera inkunga ariko mu by’ukuri ntibayitange. Ikindi gishoboka nzi ko ari gishoboka cyane ni uko wenda bazagenda batanga izo nkunga bemeye uko imirimo izajya igenda ikorwa.”

Abaterankunga b’ingenzi nabo bavuze ko bagifite gahunda zo gutera inkunga nk’uko babyemeye ariko ko bashaka kureba uko gahunda zo kongera kubaka iyi kiliziya ziteguwe n’uko leta iteganya gukoresha izo nkunga.

Cathédrale Notre-Dame de Paris igiye kongera gusomerwamo Misa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza