Byahishuwe! Minisitiri mu Bwongereza uherutse gucyeza amatora yo muri Uganda akorana ubucuruzi n’icyegera cya Museveni

Yanditswe na IGIHE
Kuya 29 Mutarama 2021 saa 07:46
Yasuwe :
0 0

Ubwo byatangazwaga ko Yoweli Kaguta Museveni ari we wongeye gutorerwa kuyobora Uganda, Minisitiri w’u Bwongereza ushinzwe Afurika, James Duddridge, ari mu ba mbere bamwifurije ishya n’ihirwe muri uyu murimo amaze kugiramo uburambe bw’imyaka 35, mu gihe abandi bayobozi bo kuri uyu mugabane w’u Burayi basaga n’abaruciye bararumira.

Mu itangazo James Duddridge yashyize hanze rigenewe abanyamakuru ku wa 16 Mutarama yagize ati “Guverinoma y’u Bwongereza yishimiye imigendekere myiza y’amatora muri Uganda kandi iraha agaciro kongera gutorwa kwa Nyakubahwa Yoweri Museveni nka Perezida.”

Kwandika ibi byatumye benshi batangira kwibaza icyatumye James Duddridge ashimagiza amatora Leta Zunze Ubumwe za Amerika zasabye ko akorwaho iperereza kubera imvururu zayavuzwemo ndetse Robert Kyagulanyi wari uhanganye na Museveni akemeza ko yabayemo amanyanga.

Ikindi cyateye abantu kwibaza byinshi ni ukuntu Duddridge yavuze ko amatora yaranzwe n’amahoro mu gihe ibikorwa byo kwiyamamaza byaguyemo abantu barenga 50.

Mu itohoza ibinyamakuru byo mu Bwongereza byakoze, byasanze James Duddridge afite umubano wihariye na Uganda ku buryo iyo benshi baza kuwumenya batari gutungurwa n’amagambo ye.

James Duddridge yakoreye igihe kinini ikigo cy’imari gifite icyicaro mu Bwongereza kizwi nka TLG Capital Investments. Aha James Duddridge yahakoze nk’umujyanama.

Inama y’Ubutegetsi y’iki kigo iyobowe na Emmanuel Katongole, umwe mu bakire bakomeye muri Uganda akaba n’inshuti y’akadasohoka ya Perezida Museveni.

Umubano wa Perezida Museveni na Katongole ugaragarira mu myanya yagiye amuha. Ubugira Kabiri Museveni yahaye Katongole kuba Umuyobozi w’ikigo cya Leta gikora ubucuruzi bw’ibikomoka kuri Peteroli, Uganda National Oil Company, umwanya akirimo no kugeza uyu munsi.

Museveni kandi yashyize Katongole ku ruhembe rw’abayoboye gahunda ya Uganda yo gushaka amafaranga yo guhangana n’icyorezo cya COVID-19, byongeye kandi Katongole ni umuyobozi wa Cipla Quality Chemicals, ikigo gikora imiti n’ibindi bikoresho byo kwa muganga.

Iki kigo cya Cipla Quality Chemicals cyatangiye ari ikigo kigenga ariko gifite imikoranire ya hafi na Guverinoma ya Museveni, mu mwaka ushize Minisiteri y’Ubuzima ya Uganda yatangaje ko yagihaye isoko ryo gukora imiti ya malaria izajya yifashishwa ku barwayi ba COVID-19 izwi nka hydroxychloroquine, riba irindi soko ryagutse Katongole yegukanye kubera umubano wihariye afitanye na Museveni.

Hagendewe kuri ibi, birumvikana ko Duddridge ko atari kubura gushimagiza intsinzi y’inshuti y’umukoresha we nubwo abayobozi bakuru b’igihugu cye n’ab’ibindi bikomeye bari baruciye bakarumira. Amasezerano y’akazi ya Duddridge muri TLG Capital Investments agaragaza ko yagombaga gukora amasaha umunani mu kwezi agahembwa 3 427$

Amakuru agaragaza ko Duddridge yahagaritse gukorera TLG Capital Investments muri Gashyantare ubwo yiteguraga gufata umwanya wa Minisitiri w’u Bwongereza muri Afurika nubwo hari abandi bemeza ko n’ubu agikorana n’iki kigo mu ibanga rikomeye.

Nubwo umuntu ashobora kuvuga ko umubano wa Uganda na Duddridge ushingiye cyane kuri Katongole, ku rundi ruhande uyu mugabo asobanukiwe isoko ry’iki gihugu mu bijyanye n’ishoramari, kimwe n’ibindi bihugu byinshi byo muri Afurika akuramo umugati.

Mu 2015 bwa mbere ubwo Duddridge yari mu mwanya wa Minisitiri w’u Bwongereza ushinzwe Afurika mbere y’uko awuvaho mu 2016 akaza kongera kuwusubiraho mu 2020, yasuye Uganda ahura n’abayobozi bakomeye muri Guverinoma ya Museveni.

Mu ijambo yahavugiye yemeje ko “u Bwongereza bwiteguye gufatanya na Uganda mu bijyanye n’ubucuruzi aho bashobora gufasha ibigo bya leta n’iby’abikorera biri mu bijyanye n’imari ndetse no gutanga inguzanyo.”

Nyuma y’igihe gito Duddridge atangaje ibi, abantu batunguwe no kubona ahawe umwanya w’ubujyanama muri TLG Capital Investments aho kugira ngo ubufatanye bw’u Bwongereza na Uganda yasezeranyije bushyirwe mu bikorwa.

Muri Nzeri 2016 Duddridge yari umwe mu bashyitsi b’Imena bitabiriye ibiganiro ku ishoramari muri Uganda (Uganda Investment Convention) byabereye i Londres.

Si Uganda gusa, ahubwo uwavuga ko Afurika yabereye Duddridge isoko y’umugati ntiyaba abeshye. Uyu mugabo amaze igihe kinini asarura amafaranga atagira ingano muri Afurika, yakoze igihe kinini muri Barclays Bank yo muri Côte d’Ivoire n’iyo muri Botswana.

Mu 2013 yabwiye ibinyamakuru byo mu Bwongereza ko agiye kugura imigabane mu bigo by’ubucuruzi byo hirya no hino muri Afurika. Kugeza mu 2014 Duddridge yari amaze gushora imari mu Isoko ry’imari n’imigabane rya Nigeria, mu ruganda rwenga inzoga rwo muri Kenya, mu bucukuzi bw’amabuye y’agaciro muri Sierra Leone no mu bukerarugendo bwo muri Botswana.

James Duddridge asanzwe afitanye imikoranire ikomeye n'abantu b'inkoramutima za Museveni

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .