Kwamamaza

Ikiganiro n’Umuhinzi mworozi w’i Burayi(Amafoto)

Yanditswe kuya 9-09-2016 saa 15:42' na Karirima A. Ngarambe


Hirya no hino ku migabane yose igize Isi,hari abantu benshi batunzwe n’ubuhinzi n’ubworozi kandi bakabikora kinyamwuga ku buryo umuntu yabigiraho.

Abanyaburayi na bo bagira abahinzi borozi bashyira imbaraga nyinshi muri uru rwego bakaba ari byo bahugiramo mu buzima bwabo bwa buri munsi.

IGIHE yasuye Umubiligi, Kairet Marcel w’imyaka 62 y’amavuko utuye mu karere ka Thimeon, muri ’Province’ ya Hainaut mu majyepfo y’u Bubiligi, ukora ndetse agatungwa n’umwuga w’ubworozi bw’inka n’ubuhinzi, atubwira imikorere ye ya buri munsi mu cyanya cye akoreramo iyo mirimo.

Twamusuye atwakira neza, tumarana umwanya mu nini tureba uko umunsi we ugenda, maze turaganira birambuye atubwira byinshi ku mirimo ye.

IGIHE : Umunsi w’akazi wanyu utangira ryari? Utangirira ku kahe kazi ?

Kairet Marcel : Mbyuka saa kumi n’imwe, nkatangira gukama inka, ariko mbere yaho kuko ari nyinshi ngenda ninjiza izigera kuri makumyabiri aho zikamirwa, zikavamo hajyamo izindi kugeza zirangiye. Icyo gice kirangira nka saa mbiri n’igice z’igitondo, hagakurikiraho kuzitaho, kureba niba nta zifite ikibazo runaka, kuzicishaho inkuyo, no gukomeza kuzigaburira ubwatsi uko bushize, kugeza saa yine n’igice.

Nyuma ya saa yine hakurikiraho kujya gufata ibikoresho by’ubuhinzi tukagana mu mirima, mpinga ibigori bigenewe kugaburirwa amatungo, Ingano zivamo ifarini ikorwamo umugati n’ibindi bitandukanye, Escourgeon igihingwa gikoreshwa mu gukora byeri cyangwa kugaburira amatungo, gihingwa cyane mu gihe cy’ubukonje na Betterave, igihingwa kivamo isukari.

Ku mugoroba ntashye, ni bwo nkora ibijyanye n’icungamutungo, gukora gahunda mu nyandiko, ibyo umuntu yakwita (gestion & comptabilité) ibyo nkora byose mbifatanya n’umugore wanjye.

IGIHE: Mu maze igihe kingana iki mukora Ubuhinzi n’Ubworozi ?

Kairet Marcel : Mu muryango wanjye guhera ku myaka 12 ni bwo utangira kubitwozwa, ni ibintu navukiyemo nkunda ubu nkaba maze rwose imyaka 45 ari jye ushinzwe iki cyanya.

Nagiye kandi nkora amahugurwa mu bjyanye no gukanika imashini z’Ubuhinzi n’ubworozi zitandukanye, gukora amashanyarazi n’ibindi bikenerwa muri aka kazi. Ni akazi gasaba kuba wihagije kuko niba imashini ihinga ipfuye nirwanaho, niba habaye ikibazo runaka, mu bikoresho bikoreshwa amashanyarazi, ngerageza kwirwanaho, imodoka impfiriyeho mva gushaka ubwatsi bw’inka cyangwa gusarura, ni jye wirwanaho, nta muntu n’umwe njya mpamagara byose ndabyikorera.

IGIHE : Mufite inka zingana iki ?

Kairet Marcel: Mfite inka 170, nkagira na Hectare 60 z’ubutaka bugize icyanya cyanjye.

IGIHE : Muri aka kazi n’iki cyiza kirimo, n’iki kandi kibagora ?

Kairet Marcel : Ibyiza navuga ni uko ari akazi nkora nkunda kandi nakuriyemo, nta wuntegeka, ndigenga, bipfa byakira ni jye bireba, na ho ibigorana, ni uko ari akazi katagira ikiruhuko, kuko buri munsi ndakora haba ku wa Gatandatu cyangwa ku Cyumweru kuri twe ni kimwe.

IGIHE : None se kuki mutaruhuka ?

Kairet Marcel : Ni akazi gasaba guhozaho buri munsi kuko inka zisaba kwitabwaho igihe cyose, guhinga na byo usanga bidahagarara, turuhuka n’ijoro, ubuzima bwacu n’ubu ni akazi kandi ntacyo bidutwaye twarabimenyereye.

IGIHE : Ukorana ute n’umuryango wawe ?

Kairet Marcel: Nakubwiye ko mfite imyaka 62, abana batatu, umukobwa wize ibijyanye no kuvura amatungo manini, (vétérinaire) adufasha muri byinshi bijyanye n’ibyo yize, undi mukobwa umukurikira akora mu nganda z’imyenda, akagira n’igihe aza gukora hano, nkagira n’umuhungu ufite imyaka 33 we akorera i Bruxelles yigiriye mu mujyi ibi abivamo, akora mu bijyanye n’amahoteri.

Icyo nakongeraho ni uko akazi kacu usanga 95% by’abatuye u Bubiligi batabyitayeho, ntibashaka kumenya imibereho y’abakora aka kazi, kandi gatanga umusaruro utunga benshi.Hashize imyaka 45 mbona uko bigenda bikendera. Kandi ni twe duhinga tukorora, abantu bakabona ibyo barya, bakabona amata n’ibiyakomokaho byose, inyama n’ibindi, ariko usanga imisoro Leta iduca n’agaciro gake baduha biteye agahinda.

Abantu b’ino usanga benshi bari mu murengwe basa nk’aho batazi aho biva, badashaka kumenya uko umuntu aba yiyushye icyuya, buriya uwabashyira rimwe ku murongo basabiriza ibyo kurya ni bwo basobanukirwa n’agaciro k’aho biva.

Ariko rimwe na rimwe amashuri n’ababyeyi batuzanira abana kugira ngo bamenye uko aka kazi gakorwa ngo uzabikunda azabikore.

IGIHE : Inka zanyu zikamwa litiro zingahe ku munsi ?

Kairet Marcel : Mu nka 170 zirenga, harimo 45 zikamwa litiro 400 ku munsi, izisigaye ni izikiri nto. Harimo n’Imfizi imwe yabyaye nyinshi muri zo.Litiro imwe igura 0,88€ hafi 1€.

IGIHE: Amata mukama atunganywa ate ?

Kairet Marcel: Uko inka zikamwa amata ahita ajya mu itanki (tank)wabonye hariya, anyuze mu matiyo yabigenewe, akabikwa kuri dogre (degre) ebyiri z’ubushyuhe, nyuma y’iminsi 2 hari ikigo gitunganya amata kiza kuyatwara akajya gutunganywa ku rundi rwego, aho ava ajya kugurishwa ku isoko.

IGIHE: Kairet Marcel, mwakoze kuduha umwanya wanyu.

Kairet Marcel: Mwakoze kuza kudusura mukamenya ibyo dukora.

Kairet Marcel atunzwe no korora ndetse no guhinga
Itanki ijyamo amata mu gihe bakama
Ikizingo cy'ubwatsi agaburirwa inka z'uyu mworozi
Atelier akoreramo ibijyanye n'ibikoresho by'ubuhinzi n'ubworozi, imashini zihinga, moteri z'imodoka akoresha, ibyo gusudira, amashanyarazi n'ibindi
Kairet Marcel afatanya aka kazi n'abo mu muryango we
Imashini akoresha mu mwuga we w'ubworozi
Mu duce tumwe na tumwe tw'ibyaro hari aho bagira umuco wo gururiza aho batuye ibivuye mu musaruro wabo
Si ukorora gusa kuko anahinga ibigori ndetse n'ibindi bihingwa

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved