Brésil: Covid-19 iravuza ubuhuha, abishwe nayo barenze ibihumbi 400

Yanditswe na Ntabareshya Jean de Dieu
Kuya 30 Mata 2021 saa 01:02
Yasuwe :
0 0

Brésil ni kimwe mu bihugu bikomeje kwibasirwa cyane n’icyorezo cya Covid-19 aho umubare w’abandura n’abapfa ukomeje kwiyongera, aho muri iki gihugu abicwa nayo bamaze kurenga 400 000.

Brésil iri kugorwa cyane n’inkundura yo guhangana na Covid-19 aho mu masaha 24 usanga abantu barenga 3000 bapfa kubera iki cyorezo.

Mu minsi 14 ishize muri iki gihugu umubare w’abapfa bishwe na Coronavirus wagendaga utumbagira cyane ku buryo buteje impungenge.

Iri tumbagira ryatumye Perezida Jair Bolsonaro wakunze kwamaganira kure gahunda za Guma mu rugo no kwambara agapfukamunwa ndetse agatangaza ibinini nk’umuti wa Covid-19 ashyirwa mu majwi ko nta musanzu ari gutanga ku gihugu cye.

Ukwezi kwa Mata 2021 kwashaririye Brésil cyane kuko mu minsi 37 gusa ishize hapfuye abantu 100.000.

Kugeza ubu muri icyo gihugu habarurwa abantu basaga miliyoni 14.5 banduye Covid-19, abahitanwe nayo ni 400 000. Nicyo gihugu cya kabiri mu kugira abapfuye benshi.

Brésil kandi iracyaseta ibirenge mu gukingira abaturage kuko 13% by’abaturage aribo bonyine bamaze gukingirwa muri miliyoni 212.

Abicwa na Covid-19 muri Brésil bakomeje kwiyongera/ Ifoto: Getty Images

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .