Kwamamaza

Brazil: Dilma Rousseff yakuriye inzira ku murima abasenateri bamushinja uburiganya

Yanditswe kuya 31-08-2016 saa 06:39' na Gonzalde Nshimiyimana


Perezida wa Brazil wahagaritswe by’agateganyo, Dilma Rousseff ubwo yari imbere ya Sena yisobanura ku birego byo guhombya igihugu, yavuze ko ntacyo umutima umushinja kubyo aregwa byose ahubwo asaba abasenateri b’ibihugu cye kureba kure bagaharanira demokarasi.

Rousseff, Perezida wa mbere w’umugore uyoboye Brazil, ashinjwa gukoresha amafaranga ya leta nta burenganzira abiherewe ndetse no gufata inguzanyo mu buryo bunyuranije n’amategeko akazifata mu izina rya Leta ayoboye mu rwego rwo kuziba icyuho mu ngengo y’imari ahanini agamije kugira ngo abashe gutsinda amatora ya 2014.

Ubwo yari imbere y’Abasenateri kuri uyu wa Mbere tariki ya 29 Kanama 2016, Dilma yavuze ko nubwo ashinjwa ibi byaha, kuri we ngo ni umwere kuko nta cyo yishinja.

Yagize ati: ‟Yego ndabizi nzashinjwa, ariko nta nkomanga mfite ku mutima, nta cyaha na kimwe nzi naba narigeze ngiramo uruhare.”

Rousseff yongeye kwibutsa abagize Sena ko we ubwe yatowe n’abaturage basaga miliyoni 54 mu mwaka wa 2014, kandi ngo kuva icyo gihe yakomeje kubahiriza ibyo Itegeko Nshinga riteganya, ayobora igihugu nk’uko bigomba.

Perezida Rousseff kandi yibukije iyicarubozo yakorewe n’ingabo za Leta zayobozaga igitugu mu myaka ya 1970, abwira abasenateri ko icyo gihe demokarasi muri Brazil yagerwaga ku mashyi.

Yagize ati "Kwigirira icyizere, kugira ishyaka, guhangana, ndakeka ayo ni amagambo asobanura imbwirwaruhame ya Dilma Rousseff."

Umunyamakuru wa France 24 yatangaje ko akurikije imvugo Pousseff yagiye akoresha, zigaragaza ko ikintu cya mbere yashakaga gukora ageze ku buyobozi ari ugushyiraho ubutegetsi bw’abaturage burwanya igisirikare kiyoboza igitugu, nk’uko yari yaragezweho n’ingaruka z’ubwo buyobozi mu myaka y’1970.

Dilma yavuze ko aje kwihurira n’abasenatera imbonankubone ngo ababwire byeruye ko nta cyaha yakoze dore ko yavugaga ko nta kintu na kimwe agomba guhisha, ahubwo ngo arashaka gusigasira demokarasi n’ubutabera nyabwo muri Brazil.

Mu ijambo rye ryafashe iminota 30, Rousseff yavuze ko mu ntangiriro z’umwaka wa 2015 amashyaka atavuga rumwe n’ubutegetsi, yatangiye kuzamura ibibazo by’umutekano mucye mu gihugu banze ubwumvikane ku igabanywa ry’imisoro.

Rousseff ni ubwa mbere ahuye n’abamushinja muri Sena ya Brazil. Imbere y’amajwi menshi y’abagize Sena, Dilma yavuganaga ikiniga cyinshi n’amarira azenga mu maso uko yibukaga ibyamubayeho.

Yagize ati "Inshuro ebyiri nabonye urupfu runsatiriye, ubwo nababazwaga iminsi n’iminsi, byatumaga nibaza nshidikanya ku bumuntu n’igisobanuro cy’ubuzima ubwacyo igihe nashoboraga kwicwa no kubura ubuzima biturutse ku buribwe nanyuzemo. "

Yakomeje agira ati ‟Ubu singitinya urupfu, ahubwo mfite ubwoba bwo gupfa kwa demokarasi."

Abari bamushyigikiye cyane biganjemo abo mu ishyaka ry’Abakozi, bari bakubise buzuye mu cyumba cya Sena, ari nako basakuriza icya rimwe bavuga bati "Dilma, indwanyi y’abanyabrazil".

Ubukungu bwa Brazil bwagabanutseho 3.8% mu mwaka ushize wa 2015 bikaba bishoboka ko muri uyu mwaka buzagabanukaho 3.3. Ukugwa gukabije ku bukungu kwaherukaga mu mwaka wa 1930. Ifaranga ryataye agaciro kugeza ku kigereranyo cya 9% naho ubushomeri buri ku kigereranyo cya 11%.

Uruhande rushyigikiye Rousseff ruvugako kugabanuka k’ubukungu bw’igihugu ntaho buhuriye n’uruhare rwa Perezida Rousseff ahubwo ngo ni izamuka ry’ibiciro by’ibicuruzwa ku isi yose.

Ibi ariko biterwa utwatsi n’abatavuga rumwe na we bashyigikiye ko yava ku butegetsi, umwanzuro byitezweho ko uva mu matora y’abasenateri aba kuri uyu wa Gatatu. Abasenateri batavuga rumwe n’ubutegetsi barahiye ko bagomba gukora ibishoboka byose kugira ngo 2/3 (amajwi 54 kuri 81) by’amajwi akenewe kugira ngo Perezida Rousseff yeguzwe aboneke.

Mu gihe byaba bigenze bityo, Perezida Dilma Rousseff yasimburwa ku mwanya w’umukuru w’iki gihugu na Michel Temer, Visi Perezida we kugeza ubwo hazaba amatora y’Umukuru w’Igihugu azabera mu 2018. Uyu Temer ubu ni nawe Perezida mu gihe Rousseff yahagaritswe.

Perezida Dilma Rousseff yabwiye Abasenateri ko nta cyaha yigeze akora

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved