Boeing yatanze impozamarira ya miliyoni $100 ku miryango yaguye mu mpanuka z’indege zayo

Yanditswe na HABIMANA James
Kuya 4 Nyakanga 2019 saa 12:54
Yasuwe :
0 0

Sosiyete ikora indege yo muri Leta zunze Ubumwe za Amerika, Boeing, yatanze impozamarira ya miliyoni 100 z’amadorali ku miryango y’abaguye mu mpanuka ebyiri z’indege zayo, imwe muri Indonesia mu Ukwakira umwaka ushize, indi muri Ethiopia muri Werurwe uyu mwaka.

Tariki 29 Ukwakira 2018 indege ya Boeing 737 MAX 8 yakoreshwaga n’ikigo Lion Air Flight 610 cyo muri Indonesia, yakoze impanuka nyuma y’iminota 12 ihagururutse ku kibuga cy’indege cya Soekarno Hatta mu murwa mukuru Jakarta ijya ahitwa Pangkal Pinang igwa mu Nyanja ya Java, yica abagenzi 189 bose bari bayirimo.

Nyuma y’amezi ane, indege ya Boeing 737 MAX 8 y’ikigo cya Ethiopian Airlines cyo muri Ethiopia, nayo yakoze impanuka tariki 10 Werurwe 2019 ubwo yajyaga i Nairobi muri Kenya, yica abagenzi 157 bose bari bayirimo.

Muri rusange izi mpanuka zahitanye abantu 346, byatangajwe ko zatewe na porogaramu z’ubwo bwoko bw’indege zifasha abazitwaye kugenzura ibijyanye no kuzamuka cyane mu kirere.

Ibihugu bitandukanye hirya no hino ku Isi birimo n’u Rwanda byahise bihagarika gukoresha izi ndege no kongera kugura izindi.

Boeing yavuze ko impozamarira yatanze izafasha mu bijyanye no gutanga uburezi n’indi mibereho ku miryango y’abaguye muri ziriya mpanuka.

Boeing yavuze ko “Aya mafaranga azafasha gushyigikira mu burezi, mu buzima bw’imiryango yagizweho ingaruka no mu bindi bikorwa by’iterambere ry’iyi miryango...aya mafaranga azatangwa mu myaka itandukanye”.

Dennis Muilenburg, Umuyobozi Mukuru wa Boeing yagize ati “Twe nka Boeing twihanganishije abagizweho ingaruka n’ababuriye ababo muri izi mpanuka zombi, ubuzima bw’abazipfiriyemo buzakomeza kutuguma ku mitima no mu bitekerezo mu myaka yose.”

Yavuze ko yizeye ko ubu bufasha buzakomeza iyi miryango. Gusa abunganira abagizweho ingaruka n’izi mpanuka bamaganye aya mafaranga avugwa ko azatangwa na Boeing.

Nomi Husain yabwiye BBC ati “Bamwe mu bakiriya bacu ntabwo bashyize imbere uburyo bw’ubufasha, urabona ko Boeing ishyize imbere inyungu kurenza gutanga umutekano, ikabikora igamije kugurisha indege zayo”.

Husain yatanze ibirego by’imiryango irindwi, bamwe bashakaga miliyoni 276 z’amadorali. Yavuze kandi ko kugeza ubu imwe muri iyi miryango itegereje amakuru y’icyaba cyarateye izi mpanuka mbere yo gufata umwanzuro wo kujya mu mategeko.

Mu Ukwakira umwaka ushize indege ya Boeing 737 MAX 8 yakoreshwaga n’ikigo Lion Air Flight 610 cyo muri Indonesia yakoze impanuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza