Bill Gates yagumanye ikuzo ry’umuherwe wa mbere ku Isi, Trump asubira inyuma

Yanditswe na Cyprien Niyomwungeri
Kuya 20 Werurwe 2017 saa 05:25
Yasuwe :
0 0

Umuherwe w’Umunyamerika washinze uruganda rwa Microsoft, Bill Gates, yongeye kuza ku isonga ry’abaherwe ba mbere ku Isi, mu gihe Perezida wa Leta Zunze Ubumwe za Amerika, Donald Trump, yigijwe inyuma ho imyanya irenga 200.

Urutonde rushya rwashyizwe ahagaragara n’ikinyamakuru, Forbes Magazine, kuri uyu wa mbere, rugaragaza ko umutungo wa Bill Gates ubarirwa muri miliyari 86 z’amadolari, avuye kuri miliyari 75 umwaka ushize, bituma amaze imyaka ine yikurikiranya ntawe umuhigika.

Kuri uru rutonde rwiganjeho Abanyamerika cyane cyane abakora ibijyanye n’ikoranabuhanga, Gates akurikiwe na Warren Buffett washinze ikigo Berkshire Hathaway Inc, ugeze kuri miliyari 75.6$.

Abandi bari mu 10 ba mbere ni uwashinze Amazon, Jeff Bezos, uri ku mwanya wa gatatu, akaba yariyongereyeho miliyari $27.6 bigatuma umutungo we ugera kuri miliyari $72.8.

Mark Zuckerberg washinze Facebook wongereye miliyari $ 11.4 ari ku mwanya wa gatanu naho Larry Ellison washinze Oracle akaba ku mwanya wa karindwi. Umunya- Espagne, Amancio Ortega washinze ikigo Inditex SA gifite ibindi bikora imyenda bigishakimiyeho bizwi ku izina rya Zara, ari ku mwanya wa kane.

Umunya-Mexique, Carlos Slim ni uwa gatandatu, abavandimwe ba Koch, aribo Charles na David, ku mwanya wa munani na Michael Bloomberg ku wa 10.

Umubare w’abaherwe ku Isi wiyongereyeho 13% ugereranyije n’umwaka ushize bagera ku 2,043 bavuye ku 1,810, bikaba ari ubwa mbere uyu mubare wiyongereye gutya mu myaka 31 ishize.

Leta zunze ubumwe za Amerika, USA, nizo zifite abaherwe benshi ku Isi bagera kuri 565, u Bushinwa ni ubwa kabiri n’abaherwe 319 naho u Budage ni ubwa gatatu n’abaherwe 114.

Gusubira inyuma kwa Trump uri ku mwanya wa 544 n’umutungo ubarirwa muri miliyari $3.5, Forbes ivuga ko kwatewe no gusubira inyuma kw’isoko ry’inyubako ze ziri Manhattan, nka kimwe mu bifite uruhare runini ku mutungo we.

Bill Gates, yongeye kuza ku isonga ry’abaherwe ba mbere ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza