00:00:00 IGIHE NETWORK KN KINYARWANDA EN ENGLISH FR FRANCAIS

Biden yasabye imbabazi ku bikorwa bya Trump

Yanditswe na Muhonzire Sylvine
Kuya 3 Ugushyingo 2021 saa 06:31
Yasuwe :
0 0

Mu ijambo yagejeje ku bitabiriye inama ya 26 ya Loni yiga ku mihindagurikire y’ibihe, COP 21, Joe Biden yasabye imbabazi z’uko Trump yakuye Leta Zunze Ubumwe za Amerika mu masezerano ya Paris yo kugabanya imyuka ihumanye yoherezwa mu kirere, mu gihe iki gihugu ari cya kabiri ku Isi cyohereza myinshi.

Iyi nama yabaye ku itariki ya 1 na 2 Ugushyingo 2021 i Glasgow muri Écosse, yari yateranyije abakuru b’ibihugu barenga 100 ndetse n’abandi bahagarariye ibihugu byabo harebwa uruhare rwa buri gihugu mu kugabanya iyi myuka ikomeza kwangiza Ozone, bigatuma ubushyuhe bwiyongera cyane ku Isi.

Mu 2020 nibwo Donald Trump yavanye Leta Zunze Ubumwe za Amerika burundu mu masezerano ya Paris ya 2015, nyuma y’imyaka itatu atangaje ko atayashyigikiye.

Aya amasezerano yari yaremejwe na Barack Obama mu 2016 yasabaga iki gihugu kuba cyagabanyije imyuka ihumanye yoherezwa mu kirere, nibura kuri 30% bitarenze 2025.

Joe Biden ubwo yagezaga ijambo ku bitabiriye COP 21 yabisabiye imbabazi.

Ati “Ndakeka ntagakwiye gusaba imbabazi, ariko ndasaba imbabazi z’uko ubutegetsi bwavuyeho bwakuye Amerika mu masezerano ya Paris […] Turi mu bihe bibi by’imihindagurikire y’ibihe bitigeze ibaho mu mateka y’Isi, kubirwanya ubwabyo ni umuco mwiza kandi bizazahura n’ubukungu.”

Muri iyi nama Biden yasabye ibihugu bikize kugira iki kibazo nk’icyabo bigashyiraho ingamba zigamije kugabanya iyi myuka, aho yiyemeje ko mu 2030 igihugu cye kizaba cyaragabanyije imyuka ya ‘gaz methane’ yoherezwa mu kirere ku kigero cya 30%. Iki cyemezo kikaba cyasinyweho n’ibindi bihugu 15 bya mbere ku Isi byohereza iyi myuka mu kirere.

Ibihugu nka Brésil n’u Bushinwa bifite 87% by’amashyamba yose yo ku Isi byo byiyemeje ko mu 2030 bizaba byarakuyeho burundu itemwa ry’amashyamba rituma umubare w’ibiti ugabanuka, bikaba intandaro y’ubwiyongere bw’ubushyuhe ku Isi.

Icyegeranyo cyakozwe na BBC giherutse gutangazwa muri Nzeri 2021, cyagaragaje ko kuva mu 1980 kugera mu 2019, umubare w’ibice by’Isi bigira ubushyuhe bugera kuri dogere 50 Celsius wikubye hafi kabiri, bikava ku bice 14 mu 1980, bikagera ku bice 26 mu 2019.

Ubu bushyuhe bukomeje kwiyongera gutya, iki cyegeranyo kigaragaza ko mu 2100 abantu barenga miliyari 1,2 bazaba batuye ahantu hashyuha cyane ku buryo umubiri wabo utazaba ukibasha kubwihanganira.

Raporo ya World Population Review yo 2020 igaragaza ko 78% by’imyuka ihumanye yoherezwa mu kirere n’ibihugu 10, aho u Bushinwa ari bwo buri ku mwanya wa mbere kuko bwohereza ungana na 28% by’iyoherezwa yose, bugakurikirwa na Amerika yohereza 14%, mu gihe ibindi bihugu birimo u Buhinde, u Burusiya, u Buyapani, u Budage, Koreya y’Epfo, Iran, Canada na Arabie Saudite byohereza 36%.

Joe Biden yasabye imbabazi z'uko Trump yakuye igihugu cye mu masezerano ya Paris asaba ibihugu kugabanya imyuka ihumanye yoherezwa mu kirere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .