00:00:00 IGIHE NETWORK KN KINYARWANDA EN ENGLISH FR FRANCAIS

Belarus: Indege yahagaritswe by’igitaraganya hashakishwa umunyamakuru utavuga rumwe na Leta

Yanditswe na Ndahayo Emmanuel
Kuya 24 Gicurasi 2021 saa 07:08
Yasuwe :
0 0

Leta ya Belarus iri mu mazi abira nyuma y’aho itegetse indege ya Sosiyete ya Ryanair yari inyuze mu kirere cyayo, guparika ku kibuga cy’indege cyo mu Murwa Mukuru wa Minsk, maze inzego z’umutekano zita muri yombi umunyamakuru Roman Protasevich w’imyaka 26 n’umukunzi we, Sofia Sapega.

Ahagana saa Moya n’iminota 29 z’igitondo cyo kuri uyu wa 24 Gicurasi 2021, ni bwo indege ya Ryanair yahagurutse i Athens mu Bugiriki yerekeza muri Lithuania, irimo abagenzi 126. Mu rugendo rwayo yagombaga guca hejuru y’ikirere cy’ibihugu birimo Ukraine na Belarus.

Ubwo rero yendaga gusohoka mu kirere cya Belarus ngo yinjire mu cya Lithuania, ari naho yagombaga gusoreza urugendo, abari batwaye indege basabwe n’indi ndege yari ibakurikiye, guhindura icyerekezo cy’urugendo rwabo kubera ikibazo cy’umutekano. Bikekwa ko ubu bwoba bwazamuwe n’abakozi b’inzego z’ubutasi muri Belarus bari muri iyi ndege, ndetse bakaba bari bamaze iminsi bakurikirana Protasevich mu Bugiriki aho yari yaritabiriye inama.

Ibi bibazo byose by’umutekano byari ibihimbano, kuko inzego zo muri Belarus zishakiraga Protasevich wahoze ari umunyamakuru w’ikinyamakuru cya Nexta gikorera ku mbuga nkoranyambaga.

Uyu musore wimukiye muri Lithuania mu mwaka wa 2019, ni umwe mu barwanyije bikomeye amatora ya Perezida aherutse gutsindwa na Alexander Lukashenko w’imyaka 66, akaba amaze imyaka 27 ku butegetsi.

Protasevich yakunze kunenga uyu muyobozi ufatwa ‘nk’umunyagitugu wa nyuma usigaye mu Burayi’, ndetse akaba yari afitanye imikoranire n’abarwanya ubutegetsi bwa Perezida Lukashenko.

Ubwo yamenyaga ko indege ikatishijwe igiye kujyanwa mu Murwa Mukuru wa Belarus, Protasevich ngo yabwiye bagenzi ko agiye gukatirwa urwo gupfa, dore ko Belarus igitanga icyo gihano.

Umuryango w’Ubumwe bw’u Burayi watangaje ko ugiye gufatira ibihano bikarishye Belarus birimo gukumira icyo gihugu kidakora ku nyanja, uburenganzira bwo gukoresha ikirere cyabwo ndetse no gukaza ibihano by’ubukungu kuri imaze iminsi ihanganye n’imyigaragambyo y’abaturage batifuza Perezida Lukashenko.

Bivugwa ko Perezida Lukashenko, usanzwe yarafatiwe ibihano na EU, ari we ubwe wategetse ko Protasevich atabwa muri yombi.

Ryanair yaje kugera muri Lithuania ikererewe amasaha atandatu yose, ariko mu bagenzi 126 bahagurutse Athens, 121 ni bo basoje urugendo, bivuze ko uretse Protasevich n’umukunzi batawe muri yombi, hari abandi bagenzi batatu basigaye muri Belarus ku bushake bwabo.

Umunyamakuru Protasevich utavuga rumwe na Leta ya Belarus yatawe muri yombi nyuma y'uko indege yari arimo itegetswe guhagarara mu Murwa Mukuru wa Belarus, Minsk

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .