Basangira ubusa bakitana ibisambo; Ibihugu by’u Burayi mu ntambara n’uruganda rukora inkingo za Covid-19

Yanditswe na Muhonzire Sylvine
Kuya 29 Mutarama 2021 saa 08:27
Yasuwe :
0 0

Intambara y’amagambo hagati y’Umuryango w’Ubumwe bw’ u Burayi (EU) n’uruganda rukora imiti n’inkingo rwa AstraZeneca rufite icyicaro mu Bwongereza, ikomeje gufata indi ntera nyuma y’uko rwishe amasezerano rwagiranye n’uyu muryango.

Guterana amagambo ku mpande zombi byatangiye ku wa mbere w’iki cyumweru ubwo umwe mu bayobozi ba EU yatangazaga ko uru ruganda rwavuze ko ruzagemura inkingo nke ku zo rwagombaga kugemura kubera ibibazo rwagize mu itunganywa zaryo.

CNN ivuga ko kuwa Gatatu aribwo byafashe indi ntera, Komiseri ushinzwe ubuzima muri EU, Stella Kyriakides, abwira itangazamakuru ko inganda zikora inkingo zikwiye gukora inshingano zazo zo kuramira ubuzima bw’abantu, kandi ko abicwa na Covid-19 ari abantu nya bantu atari imibare yandikwa gusa.

Ati “Turi hagati mu cyorezo. Tubura abantu buri munsi. Ntabwo ari imibare twandika gusa, ni abantu bafite imiryango, bafite inshuti, bafite n’abo basangiye ubuzima.”

Komisiyo y’Umuryango w’Ubumwe bw’u Burayi yagiranye amasezerano n’uru ruganda yo kuwukorera inkingo miliyoni 400, zo gutera abaturage baba mu bihugu bigize EU.

Umuyobozi Mukuru wa AstraZeneca, Pascal Soriot, yiyemerera ko bari barasezeranyije EU ko bazakoresha imbaraga zose kugira ngo izi inkingo ziboneke, ariko batigeze bemeranya igihe runaka cyo kuzitanga.

Uyu muyobozi akomeza avuga ko uru ruganda ruteganya guha EU miliyoni nyinshi z’inkingo muri Gashyantare na Werurwe.

Ku wa kabiri, Soriot yabwiye ikinyamakuru gikorera mu Butaliyani, la Republica, ko impamvu yatumye inkingo zitabonekera igihe EU yazishakaga, ari ukubera ko ibihugu nk’u Bwongereza [buherutse kuva muri uyu muryango] byatanze komande y’inkingo hakiri kare mbere y’uko EU iyitanga.

Uyu muyobozi akomeza avuga ko babanje gukora inkingo z’u Bwongereza kubera ko bwo bwasinye kontaro n’uru ruganda mbereho amezi atatu, umuryango wa EU utarasaba uruganda kuwukorera inkingo.

Avuga kandi ko kandi uruganda rwagize ibibazo mu bijyanye no gukora inkingo nyinshi kubera ko uburyo bazikoramo bugoye, ndetse ko ugereranyije n’ibyo bari biyemeje basigaye inyuma ho amezi abiri.

Ku ruhande rwa EU, Kyriakides avuga ko uyu muryango wari waramaze kwishyura miliyoni 406 $ kugira ngo uru ruganda rwihutishe iki gikorwa. Muri make ntashaka kumva ngo uwaje mbere aba ari we uhabwa mbere.

Kyriakides ku wa mbere yanditse ku rukuta rwe rwa Twitter ko ubutaha inganda zikora inkingo za Covid-19 muri EU zizajya zibanza kubamenyesha mbere y’igihe niba hari ikindi gihugu zigiye gutangamo inkingo.

Umuyobozi w’uruganda avuga ko yumva akababaro k’uyu muryango kubera igitutu uriho cyo gutanga inkingo kuri uyu migabane wugarijwe kuruta indi, ndetse ko vuba bishoboka bagiye gukora uko bashoboye bagafasha EU.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .