Kwamamaza

Barack Obama yapyinagaje Sudani mu minsi ye ya nyuma nka Perezida

Yanditswe kuya 1-11-2016 saa 19:45' na Cyprien Niyomwungeri


Perezida Barack Obama ubura iminsi mike ngo asezere ku butegetsi bwa Leta Zunze ubumwe za Amerika, USA, yongeye gushegesha Sudani ya Bashir yongera umwaka ku bihano yayifatiye.

Itangazo ry’ibiro bishinzwe ububanyi n’amahanga bya USA ryo kuri uyu wa Kabiri, ryagaragaje interuro ya Perezida Obama avuga ko yafashe iki cyemezo kuko politiki za Sudani zikomeje kuba ikibazo kirenze ku mutekano wa Leta Zunze Ubumwe za Amerika.

Igira iti “Ibikorwa na politiki za Guverinoma ya Sudani bikomeje guteza ikibazo kidasanzwe umutekano w’igihugu na politiki y’Ububanyi n’Amahanga ya Leta Zunze Ubumwe za Amerika.”

Ambasade ya Sudani i Washington muri USA, yatangaje ko yababajwe n’iki cyemezo ivuga ko kidasobanutse kandi gishyira mu kaga uburenganzira bwa muntu by’umwihariko abaturage ba Sudani.

Ibyo bihano birimo ibyo mu rwego rw’ubucuruzi, ubwikorezi, imiyoborere. Aha twavuga nko guhagarika ubucuruzi hagati y’ibihugu byombi, ubufasha, inguzanyo, imigenderanire n’ibindi.

Perezida Obama yongereye ibi bihano nyuma ya raporo y’umuryango mpuzamahanga urengera uburenganzira bwa muntu ‘Amnesty International’, iherutse gutangaza ko Sudani yagabye ibitero by’ubumara 30 ku barwanyi bo mu gace ka Jebel Marra kuva muri Mutarama kugeza muri Nzeri 2016 bigahitana abasivili 367 barimo abana 95.

Iyi raporo yamaganiwe kure na Guverinoma ya Sudani ivuga ko hari abayihishe inyuma. Sudani yizeraga ko ibihano yafatiwe bishobora koroshywa igendeye ku ngendo ebyiri intumwa idasanzwe ya Leta Zunze Ubumwe za Amerika yagiriye muri kiriya gihugu, no kuba mu kwezi gushize barujuje imyaka ibiri baganira n’abo batavuga rumwe.

Ibi bihano byagize ingaruka nyinshi ku bukungu bwa Sudani aho nka mbere y’ibihano umusaruro mbumbe (GDP) wazamukaga ku kigero cya 7% none ukaba uzamukaho 1%, izamuka ry’ibiciro ku masoko ryari 7%, ubu rirarenga 20%.

Mu 1997 nibwo USA yafatiye ibihano Sudani nyuma yo kuyishinja ko itera inkunga ibikorwa by’iterabwoba guhera mu 1993.

Abasesenguzi bavuga ko Amerika yaba yarafatiye ibihano Sudani ndetse igakomeza kubyongera, kuko Bashir yabimye peteroli ikayihera Abashinwa.

Perezida Bashir aherutse kugaruka ku ngaruka zatewe n’ibyo bihano agira ati “Urugero dufite inzira ya gari ya moshi nini muri Afurika, ariko uru rwego rwarangiritse cyane kuko 90 % ry’ibyo gari ya moshi yacu yikorera bikorerwa muri USA n’u Burayi. Abashoramari batekereza kabiri mbere yo gushora imari yabo muri Sudani, kuko Abanyamerika babagora mu kuvana urwunguko rwabo muri Sudani bifashishije amabanki yo muri Amerika”.

Yavuze ko ibyo bihano byageze ku rwego rw’ubuzima, aho Sudani idashobora gutumiza imiti muri Amerika cyangwa mu Burayi, ndetse ntizasiga amashuri makuru n’inzego z’ubushakashatsi kuko igihugu kidashobora kuzana ikoranabuhanga gikeneye.

Perezida wa Sudani Omar el Beshir

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved