AT&T igiye kwegukana ikompanyi ya Time Warner kuri miliyari 86 z’amadorali

Yanditswe na Ishimwe Israel
Kuya 24 Ukwakira 2016 saa 09:54
Yasuwe : XX
0

Ikigo AT&T gikora ibijyanye n’Itumanaho muri Leta Zunze Ubumwe za Amerika cyatangaje ko kigiye kugura ikompanyi ikora ibijyanye na filime, Time Warner, kuri miliyari 86 z’amadorali.

AT&T niramuka yegukanye Time Warner dore ko bitaremezwa neza, izahita ihuzwa n’ibikorwa bitandukanye bisanzwe bikorerwa mu nzu ya Warner birimo gutunganya filime, ndetse n’uruhererekane rwa televiziyo ya HBO (Home Box Office Inc), CNN ndetse n’izindi mbuga za Internet.

AT&T iza ku mwanya wa gatatu mu bigo by’itumanaho bikomeye muri Leta Zunze Ubumwe za Amerika.

Bitegerejwe ko igurwa rya Time Warner ryemezwa n’abashinzwe kugenzura ibijyanye n’itumanaho muri Amerika.

Umuyobozi Mukuru wa AT&T, Randall Stephenson yavuze ko nta mpungenge ko bazabyemererwa kandi ko imbogamizi zose biteguye kuzikura mu nzira.

Yakomeje avuga ko guhuza biriya bigo bibiri bizatuma habaho guhuza imbaraga, itangazamakuru n’itumanaho bikarushaho gukorwa neza mu buryo bunogeye abakiliya, abamamaza ndetse n’abategura ibinyuraho.

BBC dukesha iyi nkuru ivuga ko AT&T izajya yishyura amadorali 107.50 kuri buri mugabane wa Time Warner, yose hamwe ikazagurwa miliyari 85.4 z’amadorali. Nta gihindutse izaba yamaze kuyegukana mu mpera za 2017.

AT&T ifite agaciro ka miliyari 238 z’amadorali ikomeje gushyira imbaraga mu guhinduka ikigo gikomeye gikora ibijyanye n’itangazamakuru, umwaka ushize yaguze ikigo cya DirecTV kuri miliyari 48.5 z’amadorali.

Igiye kugura Time Warner mu gihe mu bihe byashize Umuyobozi wayo, Jeff Bewkes yari yaranze ko igurishwa, aho indi nzu ya Twenty-First Century Fox Inc ikora ibijyanye na filime yigeze gushaka kuyigura kuri miliyari 80 z’amadorali muri 2014.

Ni mu gihe kandi indi sosiyete yitwa Verizon ihanganye na AT&T nayo iri muri gahunda zo kugura Yahoo, ndetse ikaba yaramaze kwigarurira AOL (American Online) ibarizwamo ikinyamakuru Huffington Post.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza