00:00:00 IGIHE NETWORK KN KINYARWANDA EN ENGLISH FR FRANCAIS

Arabie Saoudite yemereye abakobwa kwibana mu nzu

Yanditswe na Muhonzire Sylvine
Kuya 3 Nyakanga 2021 saa 05:52
Yasuwe :
0 0

Muri Arabie Saoudite abakobwa bagejeje imyaka y’ubukure batarashaka, bahawe uburenganzira bwo kwibana mu nzu batarinzwe n’abagabo, mu gihe ubusanzwe barindwaga n’abagabo bakabagenzura umunsi ku wundi, aho bajya ndetse n’ibyo bakora.

Umwanzuro wo guhindura iri tegeko ni kimwe mu bigize umugambi mugari Igikomangoma Mohammed bin Salman cyihaye wo guhindura Arabie Saoudite igihugu kimakaza uburinganire bw’abagabo n’abagore.

Mu itegeko rishya ryasohotse rigira riti “Umukobwa utarashaka, uwatandukanye n’umugabo we cyangwa uwapfakaye ubu yemerewe gutura ahantu aho ari hose ashaka, bitabaye ngombwa ko ahabwa uburenganzira n’umugabo babana, yaba papa we, musaza we cyangwa umwana we.”

Iryo tegeko rikomeza rivuga ko umugore yemerewe guhitamo aho ashaka kuba, bityo hakaba nta muryango uzongera gutanga ikirego uvuga ko umukobwa wawo ashaka kwibana, gusa ryarumye rihuha kuko umugabo ushinzwe kurinda umukobwa runaka azajya amurega igihe cyose afite gihamya ko hari icyaha yakoze.

Iki gihugu kiri muri bimwe byimakaza ubusumbane ndetse no muri raporo iheruka y’Ihuriro Mpuzamahanga ry’Ubukungu (World Economic Forum) ya 2021 y’ibihugu byimakaza uburinganire n’iterambere ry’abagore yashyize Arabie Saoudite ku mwanya wa 147 mu bihugu 156.

Nubwo uyu myanya ari uwa kure ariko hari impinduka cyakoze nyinshi mu bijyanye no guha uburenganzira abagore kuko mu myaka yashize cyari inyuma cyane.

Zimwe mu ziheruka gukorwa harimo kuba umukobwa cyangwa umugore yemerewe kwiyandikisha kujya mu rugendo rutagatifu i Mecca bitabaye ngombwa ko ajyana n’umugabo umurinda.

Abagore kandi bazemererwa kwinjira mu myanya imwe n’imwe ya gisirikare batari bemerewe kujyamo harimo iy’ubuvuzi ndetse no kujya mu mirwano ikomeye y’intambara.

Muri Kanama 2019 kandi iki gihugu cyemereye umugore gusohoka mu gihugu atiriwe asaba uruhushya umugabo umushinzwe kuko mbere uwabikoraga yahanwaga n’amategeko.

Hari gutekerezwa ko hashyirwaho itegeko ryemerera abakobwa bakiri bato bafite imyaka 17 kugira uruhushya rwo gutwara imodoka.

Muri Kanama 2018 nibwo iki gihugu cyahaye uburenganzira umugore bwo gutwara imodoka nyuma y’umwaka wose bisabwe. Mu ntangiriro za 2021 ababyeyi b’abagore bemerewe gufungurira konti ya Banki babo wabo kuko mbere bagomba kwerekana ko babyemerewe n’abagabo.

Kugeza ubu bimwe mu bikorwa abagore bateremerwa gukora muri iki gihugu harimo kuba atemerewe gushyingirwa cyangwa gutandukana n’umugabo atabiherewe uburenganzira n’umugabo umushinzwe, ntibemerewe kwambara imyenda bashaka cyangwa kwisiga ibirungo byerekana ubwiza bwabo, gushyikirana n’abahungu ni ikizira cyereka ari uwo mu muryango, nta mukobwa wemerewe kuba umucamanza n’ibindi.

Arabie Saoudite yemereye abagore kwibana bitabaye ngombwa ko barindwa n'abagabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .