Angela Merkel aragirana ibiganiro na Trump uherutse kumwibasira

Yanditswe na Mukaneza M.Ange
Kuya 17 Werurwe 2017 saa 12:22
Yasuwe :
0 0

Chancellière w’u Budage, Angela Merkel, kuri uyu wa Gatanu, aragirira uruzinduko muri Leta Zunze Ubumwe za Amerika, aho agirana ibiganiro na Perezida Donald Trump wigeze kumwibasira akimara gutorerwa kuyobora iki gihugu.

Urugendo rwa Merkel rubaye nyuma yo gusubikwa mu gihe gishize bitewe n’ikirere kitari kimeze neza, rwitezweho gushimangira umubano w’u Budage na Amerika wari umeze neza ku buyobozi bwa Barack Obama.

Umubano w’ibihugu byombi kandi ngo niwo witezweho gufungurira amarembo, imikoranire ya Amerika n’ibindi bihugu byo mu Burengerazuba bw’Isi.

CNN dukesha iyi nkuru ivuga ko Merkel afite gahunda yo guhamya umubano na Trump nk’uko byagenze kuri Obama na George W Bush bamubanjirije.

Ni mu gihe ariko aba bombi hari byinshi batumvikanaho birimo ibijyanye n’ubucuruzi n’abimukira.

Muri Mutarama 2017 nibwo Trump yagiranye ikiganiro n’ikinyamakuru Bild cyo mu Budage, anenga byeruye Merkel kubera ko yemeye kwakira abimukira batari bake mu gihugu cye, ahamya ko byabaye inzira y’iterabwoba mu Burayi.

Ikibazo cy’impunzi n’abimukira ni kimwe mu bigarukwaho mu kiganiro cy’aba bombi, hakaba hari icyizere ko ayo magambo yo mu bihe byashize atari bwitambike mu biganiro byabo, ahubwo bikorwa mu bwumvikane nk’uko abayobozi ku ruhande rwa Trump babitangaje.

Aba bayobozi bombi bagiye guhura imbona nkubone nyuma y’aho baganiriye kuri telefone muri Mutarama uyu mwaka. Merkel avuga ko uru rugendo ruzongera umubano mwiza hagati ye na Trump.

Aba bombi kandi ngo bashobora no kuganira ku Burusiya buvugwaho kwivanga mu matora ya Amerika, bugamije gushyigikira Trump, dore ko hari impungenge ko bushobora kubangamira ay’u Budage ateganyijwe muri Nzeri uyu mwaka.

Baranagaruka kandi ku kijyanye no gushyigikira Umuryango wo gutabarana mu bihugu byo mu Majyaruguru ya Atlantique (NATO), Trump yigeze kuvuga ko ntacyo umaze ariko nyuma akaza kwisubiraho.

Muri uru ruzinduko Merkel yaherekejwe n’abayobozi ba BMW na Siemens, bimwe mu bigo by’ubucuruzi bikomeye mu Budage no ku isi, baza kumufasha mu kiganiro ku bucuruzi na Amerika.

Merkel yavuze ko ibiganiro bye na Trump bizazamura umubano mwiza hagati yabo/Ifoto: Internet

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244