Amerika yatangaje ko ishobora kugaba igitero kuri Korea ya Ruguru

Yanditswe na Rabbi Malo Umucunguzi
Kuya 17 Werurwe 2017 saa 02:14
Yasuwe :
0 0

Umunyamabanga wa Leta Zunze Ubumwe za Amerika ushinzwe ububanyi n’amahanga, Rex Tillerson, yavuze ko gahunda y’igihugu cye yo kwihangana cyane yarangiye, ku buryo kiri gusuzuma izindi nzira zishoboka haba muri dipolomasi, umutekano cyangwa ubukungu.

Yabivugiye mu ruzinduko arimo muri Korea y’Epfo, mu gihe Korea ya Ruguru ikomeje gusuzuma ibisasu bya missile kandi igakomeza n’umugambi wayo wo gucura intwaro za kirimbuzi.

Nk’uko BBC yabitangaje, ayo magambo Tillerson yayavuze amaze gusura agace katabamo abasirikare gatandukanya Korea zombi, kashyizweho hirindwa amakimbirane ashobora kuvuga umunota uwo ariwo wose, nyuma y’intambara ya Korea yabaye hagati ya 1950-1953.

Yabajijwe niba igihugu cye gitekereza kwifashisha intwaro mu guhangana n’inkeke Korea ya Ruguru iri guteza kubera gucura intwaro za kirimbuzi, arasubiza ati “ubusanzwe ntitwifuza ko ibintu byagera aho biba amakimbirane ashingiye ku gisirikare.”

Yongeyeho ati "Nibazamura igipimo babangamyeho kuri gahunda yabo yo gucura intwaro, bikagera aho tubona ko tugomba kugira icyo dukora, uwo mwanzuro nawo urateganyijwe.”

Tillerson yageze muri Korea y’Epfo aturutse mu Buyapani, aho yavugiye ko ibintu bimaze imyaka 20 bigeragezwa ngo Korea ya Ruguru ice ukubiri n’intwaro za kirimbuzi byananiranye.

Tillerson kandi yagize n’umwanya wo kubonana n’umuyobozi w’agateganyo wa Korea y’Epfo, Hwang Kyo-ahn.

Umunyamabanga wa Leta Zunze Ubumwe za Amerika ushinzwe ububanyi n’amahanga, Rex Tillerson,ubwo yari muri Korea y'Epfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza