Amerika:Sena yatoye itegeko rivuguruza Obama ku gitero cyo ku wa 11 Nzeri

Yanditswe na Ishimwe Israel
Kuya 30 Nzeri 2016 saa 01:08
Yasuwe : XX
0

Abasenateri bo mu Nteko Ishinga Amategeko ya Amerika batoye itegeko ryemerera imiryango yaburiye abayo mu gitero cyagabwe ku nyubako y’ubucuruzi, World Trade Center kuya 11 Nzeri 2001, gukurikirana Leta ya Arabie Saoudite ku ruhare yakigizemo.

Iri tegeko ryatowe ku wa Gatatu w’iki cyumweru, tariki ya 28 Nzeri 2016, nyuma y’umwanzuro wari wafashwe na Perezida Barack Obama wo kudakurikirana iki gihugu, Sena ikaza kuwutera utwatsi. Ni irya mbere rije rivuguruza icyemezo cy’Umukuru w’Igihugu.

Aba basenateri bahuriye mu mashyaka abiri ahora ahanganye muri Amerika, iry’aba- Démocrates n’aba-Républicains batoye bemeza ko imiryango yabuze abayo baguye muri ibi bitero ikurikirana mu mategeko Arabie Saoudite ku bwiganze bw’amajwi 97 %.

Iyi miryango ivuga ko Leta ya Arabie Saoudite yaba yaragize uruhare mu gutegura no gutera inkunga kiriya gitero cyahitanye abantu 2 996.

Kuba abantu 15 muri 19 bagabye igitero ari abanya-Arabie Saoudite, bakaba bari barababariwe na Komisiyo yigenga yashyizweho muri icyo gihugu, ntibyanyuze ababuriye ababo muri iki gitero kuko nyuma y’imyaka 15 bari bagikurikirana iki kirego.

Ibiro by’Umukuru w’Igihugu muri Leta Zunze Ubumwe za Amerika byemeje ko uyu mwanzuro uzashyira mu kaga ubuzima bw’Abanyamerika bari mu mahanga nk’Abadipolomate n’ abashinzwe umutekano kuko bashobora kuba bagiye guhura n’ibitero by’ubwihebe byinshi.

Yagize ati “Ntacyo nakora kuri Arabie Saoudite mu buryo bw’umwihariko, impuhwe zacu ku baburiye ababo mu gitero cyo ku wa 11 Nzeri nizo ntashaka ko ziduteranya n’amahanga, ibi ni ibintu bikomeye kandi ni urugero kuko rimwe na rimwe dusabwa gufata imyanzuro ikomeye. Kuri iki kirego nizeraga ko Inteko Ishinga Amategeko iri bufate uyu mwanzuro utoroshye. Nta gihambaye nari niteze kuko gutorera imiryango yaburiye abayo muri kiriya gitero bigakorwa mu mwaka uzabamo amatora! Ntabwo bintangaje ariko ibi nibyo yakabaye yarakoze.”

Umuyobozi w’Ikigo cy’Ubutasi cya Amerika (CIA) nawe yemeje ko uyu mwanzuro uteye ubwoba ndetse ko ari uwo kwitonderwa.

Senateri Peter King wo mu ishyaka ry’aba- Républicains wanagize uruhare rukomeye mu gukora ubukangurambaga bwo gutora iri tegeko avuga ko izi mpungenge za Leta nta shingiro zifite.

Yagize ati “Iyi ngingo nta mpungenge iteye ku budahangarwa bw’igihugu, dushobora gukomeza gukurikirana ibirego by’iterabwoba. Turavuga kuri zaLeta zikora iterabwoba, ndetse na Guverinoma zibishyira mu bikorwa, icyo ni cyo turi gukurikirana. Ababuriye abantu babo mu gitero cyo ku wa 11 bagomba kumenya ukuri, niba Arabie Saoudite ntacyo yishinja ntigomba kugira ubwoba.”

Arabie Saoudite yakomeje guhatiriza isaba ko iyi ngingo itakwitabwaho, kuko ishobora kudindiza umubano hagati y’ibihugu byombi byashyize umukono ku masezerano yo guhagarika ikorwa ry’intwaro za kirimbuzi.

Abasenateri mu Nteko Ishinga Amategeko muri Leta Zunze Ubumwe za Amerika batoye itegeko ryemerera imiryango yaburiye ababo mu bitero byo kuya 11 Nzeri muri 2001 gukurikirana Arabie Soaudite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza