Amerika n’u Bushinwa byasubiye mu biganiro ku ntambara y’ubucuruzi bimazemo igihe

Yanditswe na Sekamana Mathias
Kuya 31 Nyakanga 2019 saa 04:44
Yasuwe :
0 0

Abayobozi bo mu nzego zishinzwe ubucuruzi ku ruhande rwa Amerika n’u Bushinwa, barahurira mu mujyi wa Beijing kuri uyu wa Gatatu, barebera hamwe uko barangiza intambara y’ubucuruzi imaze umwaka hagati yabyo ikaba ikomeje guhungabanya ubukungu bw’isi.

Ibi biganiro bije mu gihe Perezida Trump akomeje kumvikana avuga amagambo agaragaza ko ubwumvikane hagati y’ibihugu byombi busa n’ubudashoboka aka kanya.

Umuyobozi ushinzwe ubucuruzi muri Amerika, Robert Lighthizer n’umunyamabanga w’ibiro bishinzwe imari Steven Mnuchin, bageze mu Bushinwa ejo kuwa kabiri, gusa birinze kuvugana n’itangazamakuru.

Iyi nama ikurikiye ibiganiro Perezida Trump yagiranye na mugenzi we Xi Jinping, ubwo bahuriraga mu nama y’ibihugu 20 bikize, i Tokyo mu kwezi gushize.

Isuzuma ry’u Bushinwa ryagaragaje ko iki gihugu cya kabiri mu bukungu cyahungabanyijwe cyane n’intambara y’ubucuruzi Trump akomeje kugishoraho.

Visi Perezida wa mbere w’u Bushinwa Liu He, yahuye n’izi ntumwa za Amerika uyu munsi mu gitondo ariko birinze kugira icyo babwira itangazamakuru ako kanya.

Intambara y’ubucuruzi imaze umwaka hagati y’ibi bihugu bikize kurusha ibindi ku isi, aho buri kimwe cyazamuraga akayabo k’amadolari y’imisoro ku bicuruzwa bituruka mu kindi bikaba bimaze guhungabanya ubukungu ku isi yose.

Reuters yatangaje ko u Bushinwa bufite ubushake bwo guhagarika iyi ntambara bugatangira kugura ibikomoka k’ubuhinzi bikomoka muri Amerika, kugira ngo nayo ibukurireho bimwe mu bihano yafatiye amakompanyi yo mu Bushinwa akora iby’itumanaho by’umwihariko uruganda rwa Huawei.

Trump aherutse kwandika ku rukuta rwe rwa Twitter ko nubwo u Bushinwa bushaka kwisubiraho bukagura ibikomoka ku buhinzi byo muri Amerika, anavuga ko bushobora kuba bwifuza ko atatsinda amatora yo muri 2020 ariko ko ngo umubano hagati y’ibihugu byombi warushaho kuba mubi.

Ati “Ikibazo kuri bo ni uko bategereje ko ntatsinda, ariko byahita bikomera kurusha ibyo turi kuganiraho uyu munsi …cyangwa bikanahagarara burundu byose.”

Bimwe mu bitangazamakuru byo mu Bushinwa bivuga ko intumwa za leta zunze ubumwe za Amerika zikwiye kuba abanyakuri, bagashakira hamwe umuti w’ibibazo nta gushakira inzitwazo ku bihungabanya ubusugire bw’u Bushinwa.

Ikigo gishinzwe ubucuruzi muri Leta zunze Ubumwe za Amerika cyashyize Huawei y’Abashinwa ku rutonde rw’ibigo bibangamiye umutekano wa wazo kuva muri Gicurasi uyu mwaka, kinabuza inganda zose zo muri iki gihugu kugira ibyo zigurisha na Huawei.

Ibi byarakaje ubutegetsi bw’u Bushinwa. Huawei nayo iherutse kuvuga ko igiye gusezerera abakozi 750 b’Abanyamerika bakoraga muri uru ruganda

Trump yemeye ko azareka zimwe mu nganda zikajya zigurisha ikoranabuhanga ryazo na Huawei mu kwezi gushize ubwo yahuraga na Xi Jinping ariko na nubu nta kigaragaza ko bizakorwa.

Ushinzwe ubucuruzi muri Amerika Robert Lighthizer asuhuzanya na Visi Perezida wa Mbere w'u Bushinwa Liu He mbere y'ibiganiro byasubukuwe i Beijing

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza