Kwamamaza

Amerika n’u Burusiya bananiwe kumvikana ku kibazo cya Syria

Yanditswe kuya 5-09-2016 saa 08:47' na Rabbi Malo Umucunguzi


Mu biganiro bikomeye byaberaga mu Bushinwa hagati ya Leta Zunze Ubumwe za Amerika n’u Burusiya, byasojwe nta mwanzuro ufatika ugezweho wo guhagarika imirwano muri Syria, kugira ngo abasivili ntibakomeze gutakaza ubuzima.

Umuyobozi ku ruhande rwa Amerika kuri uyu wa Mbere yavuze ko muri ibyo biganiro byabereye mu Mujyi wa Hangzhou ahari kubera inama y’ibihugu 20 bikize ku Isi, G20, Umunyamabanga wa Leta Ushinzwe Ububanyi n’Amahanga muri Leta Zunze Ubumwe za Amerika, John Kerry na mugenzi we w’u Burusiya, Sergey Lavrov, bageragezaga gushaka uko bafatanya mu bya gisirikare bagahangana n’imitwe y’iterabwoba muri Syria, ariko abasivili ntibakomeze kwicwa.

Gusa ibiganiro byaje kunanirana kubera ibintu binyuranye batumvikanaho, bisozwa nta mwanzuro ufashwe n’ubwo ingingo zitumvikanweho zitatangajwe n’uruhande urwo arirwo rwose.

Uwo muyobozi yabwiye CNN ati "Haracyari ibibazo byo gukemurwa,’’. Ntibiratangazwa niba ibyo biganiro bishobora gusubukurwa.

Ku Cyumweru, byari byitezwe ko muri iyi nama hashobora kubaho ukumvikana hagati ya Washington na Moscow nyuma y’igihe batavuga rumwe ku kibazo cy’intambara ikomeje guhitana benshi muri Syria. Perezida Obama yari yabwiye itangazamakuru ko Kerry na Lavrov bari gukora ibishoboka byose ngo hagerwe ku masezerano.

U Burusiya buri kurwana inyuma ya Perezida wa Syria, Bashar al-Assad ngo abashe guhashya abamwigometseho bashyigikiwe na Leta Zunze Ubumwe za Amerika, abantu u Burusiya na Syria bita imitwe y’iterabwoba.

Iyi ntambara imaze guhitana abatagira ingano ndetse byanateje ikibazo gikomeye, kuko abakora ubutabazi batabasha kubugeza ku baturage bamerewe nabi, abandi barahunga ari benshi berekeza mu Burayi.

Leta Zunze Ubumwe za Amerika zirashaka kumvikana n’u Burusiya ku bakora iterabwoba bakwiye guhashywa, harimo umutwe wa Islamic State ndetse n’ishami rya al-Qaeda rikorera muri Syria ku izina rya Al-Nusra Front.

Byari bitegerejwe ko Perezida Obama na Putin bahura kuri uyu wa Mbere nk’uko bose bitabiriye inama ya G20, ariko inama yabo mu buryo bweruye ntiyigeze itangazwa.

Abayobozi bavuga ko guhagarika intambara byakwihutisha ibiganiro byihuta ku ngingo y’inzibacyuho mu bya politiki, bikanageze ku kwegura kwa Perezida Bashar al-Assad wa Syria, ariko ngo guhagarika imirwano byemeranyijweho muri Gashyantare ntibyashobotse nk’uko Obama yabishimangiye.

Ati "Gusa tugomba kugerageza, kugeza ubwo abana, abagore n’inzirakarengane z’abasivili bazaba babasha kubona ibiribwa n’ubuvuzi bw’ibanze, bakaruhuka ibisasu by’imitwe y’iterabwoba. Ni ibintu bikeneye imbaraga zacu.’’

Obama yakomeje agira ati "Ibiganiro byacu n’Abarusiya ni ingenzi kuko iyo bitaza kuba kubw’Abarusiya, Assad n’ubutegetsi bwe ntibari kubasha gukomeza kugaba ibi bitero.’’

Ibibiganiro biri kugeragezwa mu gihe nka Turikiya yo yatangaje ko yamaze kwirukana abarwanyi ba Islamic State ku mupaka wayo na Syria, nyuma y’ibitero bikomeye imaze iminsi igaba ishaka guhashya aba barwanyi bari batangiye kuyikoramo iterabwoba.

Intambara muri Syria yatangiye ubwo muri Werurwe 2011 mu Mujyi wa Deraa mu Majyepfo y’Igihugu, abanyeshuri banditse ku nkuta z’ikigo cyabo amagambo y’impinduramatwara, baza gufatwa bakorerwa iyicwarubozo.

Byateje imyigaragambyo, inzego z’umutekano zirasa ku bigaragambya bamwe bahasiga ubuzima, bituma benshi birara mu mihanda. Imyigaragambyo yakwiriye igihugu cyose, bamwe batangira gusaba Perezida Assad kwegura, ariko guverinoma ikoresha imbaraga z’umurengera mu kubatatanya.

Abarwanya ubutegetsi batangiye kwibasirwa, bituma biyemeza gufata intwaro ngo birengere, batangira no kwirukana inzego z’umutekano mu duce batuyemo.

Urugamba rwaje kwivangamo na Islamic State na abhat al-Nusra nk’ishami rya Al Qaeda muri Syria, ikibazo gifata indi ntera ubwo cyinjirwagamo na Amerika n’u Burusiya kandi bagashyigikira impande zihanganye, ku buryo abantu barenga 400 000 bamaze kwicwa naho abasaga miliyoni 11 bakavanwa mu byabo.

Sergey Lavrov na mugenzi we John Kerry

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved