Amerika n’ibihugu bifatanyije byasutse ibisasu kuri Syria

Yanditswe na Mukaneza M.Ange
Kuya 14 Mata 2018 saa 11:03
Yasuwe :
0 0

Leta Zunze Ubumwe za Amerika, u Bwongereza n’u Bufaransa byarashe ibisasu ku bice bikekwa ko ariho Leta ya Syria ibika ibisasu by’ubumara.

Ibi bitero by’indege byagabwe nyuma y’uko byemejwe ko mu cyumweru gishize ubutegetsi bwa Syria bwakoresheje intwaro z’ubumara ku baturage bayo mu mujyi wa Douma, ibikorwa bidakwiye kwihanganirwa.

Minisiteri y’Ingabo ya Amerika yatangaje ko ibitero bya mbere byagabwe ahagana saa munani z’ijoro zo muri Syria, byahereye mu murwa mukuru Damascus ndetse n’ahantu habiri hegereye umujyi wa Homs.

Nk’uko BBC yabyanditse, ni cyo gitero gikomeye ibihugu byo mu Burengerazuba bw’isi bigabye ku butegetsi bwa Perezida Bashar al-Assad kuva intambara y’abasivili yatangira mu myaka irindwi ishize.

Mu ijambo yavuze kuri uyu wa Gatanu saa tatu z’ijoro muri Amerika, Perezida Donald Trump, yavuze ko igihugu cye gifatanyije n’u Bwongereza n’u Bufaransa bahisemo gukoresha ububasha bwabo mu kurwanya ibikorwa by’ubunyamaswa.

Ati “Intego y’ibikorwa byacu muri iri joro ni ugushyiraho uburyo bukomeye bwo guca intege ikorwa, ikwirakwizwa n’ikoreshwa ry’intwaro z’ubumara.”

Minisitiri w’Intebe w’u Bwongere, Theresa May, nawe yemeje ko igihugu cye kifatanyije na Amerika n’u Bufaransa muri ibi bitero, kubera ko babonaga nta bundi buryo bwakemura ikibazo cya Syria.

Yagize ati “Ibi ntibigamije kwivanga mu ntambara y’abasivizili, nta n’ubwo bigamije guhindura ubutegetsi. Ni ibitero byihariye kandi bizagabwa ahantu runaka, kandi bitazagira uruhare mu gutuma imvururu muri aka gace irushaho gukomera, kandi twakoze ibishoboka byose mu kugabanya umubare w’abasivili bishobora kugeraho.”

Ni mu gihe Perezida Emmanuel Macron w’u Bufaransa we yavuze ko Syria yarenze umurongo utukura, ubwo mu cyumweru gishize abatari bake bicishwaga intwaro z’ubumara.

Abantu batandukanye barimo barimo Angela Merkel w’u Budage, Minisitiri w’intebe wa Canada, Justin Trudeau n’Umunyamabanga mukuru wa OTAN, Gen Jen Stoltenberg, n’abayobozi mu bihugu birimo Espagne, Turukiya na Israel bagaragaje ko ibi bitero byari bikenewe, kuko umuntu wese ukoresha intwaro z’ubumara adakwiye kwihanganirwa.

U Burusiya n’u Bushinwa byababaye

Perezida w’u Burusiya, Vladimir Putin n’ibindi bihugu birimo u Bushinwa, Iraq n’u Burusiya byagaragaje ko harimo kurengera, ndetse umusaruro uzavamo ari ubwiyongere bw’umutekano muke muri aka karere.

Ibitero kandi byanamaganwe n’Umunyamabanga mukuru w’Umuryango w’Abibumbye, Antonio Guterres, wavuze ko igihe ari ikibazo kireba umutekano n’amahoro hari amabwiriza aba agomba gukurikizwa, bityo ibihugu bibarizwa muri uyu muryango bikwiye kwifata mu gihe gikomeye nk’iki.

Perezida wa Syria, Bachar el-Assad, yatangaje ko ibitero byamugabweho bimwongereye imbaraga zo kugumya guhangana n’iterabwoba. Na Putin w’u Burusiya yemeje ko ingabo ze zizakomeza kubimufashamo.

Amerika, u Bwongereza n'u Bufaransa byafatanyije kurasa ibisasu kuri Syria
Ibice byatangiye kuraswaho muri Syria

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza