Ambasaderi w’u Bushinwa yasobanuye icyatumye Perezida Xi agirwa umuyobozi w’ikirenga

Yanditswe na Kanamugire Emmanuel
Kuya 16 Ugushyingo 2016 saa 11:25
Yasuwe :
0 0

Ambasaderi w’u Bushinwa mu Rwanda, Pan Hejun yasobanuye ko impamvu ishyaka ry’aba-Communiste rigira Perezida Xi Jinping, umuyobozi w’ikirenga ari ukugira ngo gufata ibyemezo bigamije iterambere ry’igihugu birusheho koroha.

Ibi Amb.Pan yabisobanuye mu kiganiro n’abanyamakuru ku itariki ya 15 Ugushyingo 2016, mu rwego rwo kubasobanurira byinshi ku byemezo byafashwe mu nama y’ishyaka ry’aba-Communiste.

Mu kwezi gushize nibwo Perizida Xi yagizwe uwo bita ‘Core Leader’, ibintu bitakiriwe kimwe n’abantu batandukanye hirya no hino ku Isi.

Amb. Pan yasobanuye ko ririya zina ryahawe Xi rimugira inkingi ya mwamba mbere y’uko inama y’ishyaka iterana umwaka utaha, igashyiraho komite ifatwa nk’umusingi w’ubutegetsi mu Bushinwa.

Ibi kandi bishyira Xi ku rutonde rw’abandi bayobozi bamubanjirije bahawe ububasha bw’ikirenga barimo Mao Zedong na Deng Xiaoping.

The Newtimes dukesha iyi nkuru ivuga Amb. Pan yagize icyo avuga ku bagiye bibaza niba Xi azahabwa manda ya gatatu cyangwa agashyira ubutegetsi mu maboko y’abantu benshi.

Aha Amb. Pan yagaragaje ko ububasha bwinshi bwahawe Xi bugamije kumufasha we na komite y’abantu barindwi, koroherwa no gufata ibyemezo bigamije kwihutisha iterambere.

Kuva Xi yaba Perezida mu myaka ine ishize, ububasha bwe bwagiye bwiyongera aho yagiye ahabwa kuyobora ibintu bitandukanye birimo n’itsinda ry’abantu bashinzwe impinduka mu bukungu, ndetse yigira umuyobozi w’ikirenga w’ingabo.

Deng Xiaoping wayoboye u Bushinwa kuva mu 1978-1989 niwe wazanye izina ‘Core Leader’ ahita aryiyita we na Mao Zedong na Jiang Zemin, bivuze ko bari bafite ubudahangarwa kandi ntawe ukwiye kubavuguruza.

Hu Jintao wabanjirije Perezida Xi we ariko ntiyigeze ahabwa ririya zina.

Ishyaka ry’aba-Communiste (The Communist Party of China) niryo ryashinze kandi riyobora Repubulika y’u Bushinwa ryonyine nubwo hari andi mashyaka agera ku munani yemewe n’amategeko.

Ambasaderi w’u Bushinwa mu Rwanda, Pan Hejun na Perezida w'u Bushinwa, Xi Jinping

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza