Amb. Rugwabiza yagaragarije Loni ko AU yakemura amakimbirane muri Afurika

Yanditswe na Mathias Hitimana
Kuya 11 Mutarama 2017 saa 06:02
Yasuwe : XX
0

Ambasaderi w’u Rwanda mu Muryango w’Abibumbye, Valentine Rugwabiza, yabwiye Akanama k’umutekano kawo, ko Umuryango wa Afurika yunze ubumwe, AU, ufite ubumenyi, ubunararibonye n’ubushobozi bwo gukumira amakimbirane no kuyakemura vuba.

Inama y’aka kanama ka Loni yateranye kuri uyu wa Kabiri, tariki ya 10 Mutarama 2016, yigaga ku gukumira amakimbirane no guharanira amahoro arambye.

Rugwabiza yavuze ko ubushobozi AU ifite burenze inzira zose binyuramo kugira ngo Umuryango w’Abibumbye utange ubufasha bwo kugarura amahoro muri Afurika.

Byongeye, Ambasaderi w’u Rwanda avuga ko ubufatanye bw’imiryango yombi, AU na Loni, no gukorera hamwe mu gukumira amakimbirane, bukwiye kuganirwaho kandi ingamba zifatiwe hamwe zigashyirwa mu bikorwa.

Yibukije ko mu mwanzuro w’abakuru b’ibihugu bya Afurika, wafatiwe i Addis Ababa muri Ethiopia mu 2013, biyemeje ko bagiye guharanira kugera ku ntego ya Afurika izira amakimbirane kandi biyemeza ko ariwo murage bifuza kuzasigira abanyafurika b’ejo hazaza.

Ati “Biyemeje kurangiza intambara muri Afurika bitarenze 2020. Kurwanya amakimbirane ni cyo kiri imbere muri Afurika Yunze Ubumwe, ariyo mpamvu Akanama ka Loni gashinzwe umutekano kakorana bya hafi na Afurika kugira ngo haharanirwe amahoro n’umutekano mu buryo bukwiye.”

Rugwabiza yerekanye ko hari iby’ingenzi bikeneye ubufatanye birimo, kuba umuryango mpuzamahanga ugomba gufatanya na Afurika mu biganiro birimo imikorere yawo no kuri politiki mpuzamahanga zitagira ingaruka mbi kuri Afurika n’abayituye.

Yasabye ko hashyirwaho ibiganiro bihoraho hagati y’Akanama k’amahoro ka AU n’aka Loni gashinzwe umutekano ku gukumira amakimbirane no kuyakemura.

Yagize ati “Dutekereza ko ubufatanye burenzeho hagati y’izi mpande zombi buzongera ubwuzuzanye bigatuma habaho imikorere myiza izagabanya gutatanya ingufu.”

Yongeyeho ko hakwiye ubufatanye mu kwirinda icyateza amakimbirane kandi hagashyigikirwa uburyo bwo gutabara abasivili mu gihe bari mu kaga.

Ambasaderi w'u Rwanda muri Loni, Valentine Rugwabiza

Yanasabye ko habaho gusuzuma neza icuruzwa ry’intwaro ku mugabane wa Afurika, ahanini usanga rikorwa mu buryo butemewe n’amategeko.

Amb. Rugwabiza yanagarutse ku kongera kubaka amahoro arambye ahabaye amakimbirane, atanga urugero ku Rwanda avuga ko Guverinoma ya nyuma ya Jenoside yibanze cyane mu guharanira uburinganire bw’abaturage bose, kurandura amoko no kwimika ubwiyunge bushingiye ku butabera no kugarura icyizere cy’inzego.

Muri iyi nama, Umunyamabanga mukuru wa Loni mushya, Antonio Guterres, yavuze ko hakwiye imbaraga zidasanzwe zo kubaka amahoro arambye, bikarenga gukumira, gukemura amakimbirane no kugarura amahoro, bikagera ku kubaka amahoro n’iterambere birambye.

Yagize ati “Twataye igihe kinini n’amafaranga menshi dushakira umuti ibibazo kuruta kubikemura. Abantu bishyura ikiguzi kinini. Twese dukeneye muri rusange uburyo bushya.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza