Amashirakinyoma kuri Joan Quigley, umupfumu waraguriye Perezida Ronald Reagan mu myaka irindwi ari ku butegetsi

Yanditswe na Ndahayo Emmanuel
Kuya 5 Gashyantare 2021 saa 08:22
Yasuwe :
0 0

Kuba Umukuru w’Igihugu ni inshingano zibona umugabo zigasiba undi, cyane ko buri gihugu kigira Umukuru wacyo umwe rukumbi. Bikunze guhwihwiswa ko hari abayobozi mu myanya ya politiki baba bafite abapfumu babaragurira umunsi ku wundi, gusa bigakorwa mu buryo bw’ibanga rikomeye.

Kuba abayobozi mu nzego za politiki bagana inzira y’ubupfumu, kuraguza, gutekereza n’indi mihango iyobokwa n’abakoresha imbaraga zidasanzwe byitwa ibihuha kuko ahanini bikorerwa ahiherereye. Biranagoye kumva umuyobozi hirya no hino ku isi watuye akavuga kuri izi ngingo.

Gusa hari ingero z’aho byagiye bigaragara, kuko nk’iyo usuye inzu ndangamurage y’i Kanombe, hamwe bita kwa Habyarimana, utekererezwa amateka maremare y’ukuntu yari umuyoboke w’idini Gatolika ariko akanagendera cyane mu mihango ya Gihanga, kuraguza n’ibindi. Yewe ngo yari atunze inzoka nini yari ifite ahantu yagenewe aho mu rugo yari atuyemo. Gusa ibi ntabwo tubitindaho, ahubwo twigarukire ku ngingo y’umunsi.

Burya rero, kuraguza ntabwo ari iby’abirabura gusa. Ikimenyimenyi ni uburyo Nancy Davis Reagan, umugore wa kabiri wa Perezida Ronald Reagan wayoboye Leta Zunze Ubumwe z’Amerika kuva mu 1981 kugera 1989 yari umwemera wa cyane w’imigenzo ya gipfumu.

Nancy ashobora kuba yaratekerezaga ko umugabo we wari umaze igihe gito atorewe kuyobora Amerika yari afite ibikenewe byose byatuma yuzuza inshingano ze nk’Umukuru w’Igihugu, ariko ibi byahindutse ku wa 30 Werurwe 1981 ubwo Perezida Reagan yahushwaga na John Warnock Hinckley Jr., umusore w’imyaka 26 warashe amasasu atandatu ashaka guca agahigo ko kwica Perezida w’Igihugu gikomeye nka Amerika, kugira ngo ahari umukobwa yari yarihebeye noneho azahere ubwo amukundira ubwamamare yari agiye guhabwa n’icyo gikorwa giteye isoni.

Kubona mu byo Umukuru w’Igihugu agenerwa hatarimo ubwizerwe bw’umutekano ahabwa, ibyo bikajyana n’ibindi birimo kutamenya neza ingaruka z’ibyemezo afata mu buryo bwuzuye, byatumye Nancy ahinda umushyitsi, ariko ntiyaheranwa n’agahinda ahubwo ashaka igisubizo kirambye cy’ubwo buzima yagombaga kumaramo imyaka umunani yose.

Hinckley wahinduye imitekerereze ya Nancy Reagan yari umugabo wihariye. Uyu musore yakuriye mu muryango wifashije cyane, gusa ageze mu ishuri ntiyakunda ibyaho icyakora akiyumvamo impano yo kwandika indirimbo. Kera kabaye amaze gukura, Hinckley yagize igitekerezo cyo kuva iwabo akerekeza i Los Angeles mu murwa w’ibyamamare muri Amerika, agenda afite intego yo kwandika indirimbo bikamubera umwuga n’akazi ka buri munsi.

Ku bwa ya nzira itabwira umugenzi ariko Hinckley ntiyahiriwe, kuko aho i Los Angeles yahasanze abandi bahanga muri uwo mwuga abura aho amenera, biza kurangira azinze utwangushye arataha, asubira iwabo kuhivuriza ibibazo by’agahinda n’ibindi byo mu mutwe yari avanye i Los Angeles.

N’ubwo Hinckley atahiriwe n’ubuzima amaze gukura, yari yaragize ubuzima bwiza cyane mu buto n’ubugimbi bwe. Uyu musore yakuriye mu muryango ukize washoboraga kumuha ibyo yifuza byose, ariko muri byose akaba yarakuze akunda kureba filime cyane, zirimo iyo yari yararebye mu 1976 yitwaga ’Tax Driver’.

Iyi filime yarakunzwe cyane muri Amerika ariko kuri Hinckley byabaye agahebuzo. Uyu musore yarebye iyi filime inshuro zirenga 13 zose kandi buri uko ayirebye, akanyurwa n’isura ya Jodie Foster wayikinnye yitwa Iris Steensma, aho yari umwana w’imyaka 12 washimuswe agakorerwa ibikorwa by’ihohoterwa.

Ubwiza bwa Foster ni ubwa kera kuva mu bwana bwe

Ibya ya ngurube yivuruguse mu byondo igasa na byo, Hinckley yaje kurenga ibyo gukunda filime no kuyifata nk’ibintu biri aho gusa byakinwe, ahubwo atangira gukunda bya nyabyo uyu Foster wayikinagamo.

Hinckley yaramukunze biramurenga, nawe arenga ibyo kwijijisha atangira gushaka uko azabonana n’iki kizungerezi bakaganira, ndetse yewe akanamubera umwari w’inzozi ze bazibanira iteka ryose.

Yatangiye amwandikira utubaruwa duto, birarenga akajya amuhamagara, birarenga akajya abikora kenshi, gusa ku bw’amahirwe make ibi byose bikabyara ubusa, kuko Foster uwo wari icyamamare atumwaga neza iyo myitwarire y’umusore kabutindi uri kumwirikaho bene ako kageni kandi nta hantu na hamwe bari bahuriye.

Hari kera rero ubwo abantu bari bagikunda koko, kuko Hinckley yaje gufata icyemezo kigoye cyo gukurikirana Foster wari ugiye kwiga muri Kaminuza yiyubashye ya Yale aho muri Amerika, kugira ngo nibura ajye amubona hafi aho n’ubwo yaba yitambukira bisanzwe, dore ko iby’imbuga nkoranyambaga bitari byakagerwaho aho umuntu ashobora kubona amafoto y’undi uko abishaka igihe cyose, cyane cyane ay’ibyamamare nka Foster wari mu bagezweho muri icyo gihe.

Wibaze nawe umusore wakurikiranye umukobwa hafi imyaka itanu yose, akabasha kumuvugisha inshuro nke ariko ntibigende neza, agakomeza guhatiriza amwandikira utubaruwa natwo tukaregerwa abayobozi b’ishuri; byageze aho Hinckley asa nk’utangiye gucika intege, gusa yiyemeza gukora igikorwa cya nyuma simusiga cyagombaga guhindura ibintu mu buryo bwuzuye.

Mu busesenguzi bwe, Hinckley yarisuzumye asanga imwe mu mpamvu zikomeye zatumaga atagira igikundiro imbere ya Foster ari uko atari icyamamare nkawe. Foster yari umukobwa mwiza kandi w’icyamamare, ku buryo Hinckley yabonye ko agomba guhindura umuvuno agashaka uko yaba icyamamare vuba na bwangu kugira ngo agere ku ntego ye.

Nyuma yo gutekereza byimbitse, Hinckley yaje gusanga afite ubushobozi bucye cyane bwatuma akora ikintu kimwe ku buryo bucya igihugu cyose cyamumenye, gusa aza kwanzura ko aramutse yishe umuntu uzwi na bose nka Perezida wa Amerika, bishobora gutuma amenyekana vuba bityo akanagera ku nzozi ze na Foster mu buryo bwihuse, kuko ibyo gutegereza yari amaze kubirambirwa.

Yatangiye gukurikirana ingendo za Perezida Jimmy Carter wendaga kusa ikivi cye, aza gutungurwa cyane n’uburyo yigeze kumugera iruhande hafi ye cyane, ibintu yumvaga bitapfa gushoboka.

Iki gikorwa cyamuteye akanyabugabo, atangira no gushaka ibitabo byinshi bigaruka ku rupfu rwa Perezida John F. Kennedy wari warishwe mu 1963. Hejuru y’ibi, uyu musore yanaguze imbunda, atangira no kwiga kuyirasisha agahamya intego.

Rimwe rero, ku gicamunsi cyo ku wa 30 Werurwe 1981, Hinckley yamenye ko Perezida Reagan wari ukiri mushya, aza kuba ari kuri Washington Hilton Hotel aho yari butange ijambo, ubundi akaza kujya mu modoka ye nyuma yaho agasubira mu Biro bye. Yitwaje imbunda ye, Hinckley yabashije guca mu rihumye abapolisi n’abandi barinda umutekano wa Perezida, agera ubwo ahagarara neza neza ku nzira Reagan yari bunyuremo asubiye ku modoka ye. Hinckley yageze muri metero enye uturutse aho Perezida yari bunyure, kandi ubwo yari yitwaje imbunda irimo amasasu.

Hinckley yari afite ibibazo byo mu mutwe

Mbere yo kujya muri icyo gikorwa ariko, uyu musore yari yandikiye ibaruwa Foster, n’ubwo itamugereyeho igihe, amubwira ko ibi byose agiye kubikora kugira ngo amushimishe, maze wenda bizarangire undi amwemereye urukundo.

Muri iyo baruwa, yaragize ati "Mu mezi menshi ashize, nakwandikiye imivugo, amabaruwa n’ubutumwa bw’urukundo nizeye ko ushobora kunyiyumvamo. N’ubwo twavuganye kuri telefoni, sinigeze ngira ubushobozi bwo kukwegera ngo nkwibwira [...] Impamvu ngiye gukora iki gikorwa ni uko ntagishoboye gutegereza kugushimisha".

Hinckley yahagaze yemye ndetse ntacyo yikeka kugeza ubwo Perezida Reagan yasohokaga muri hoteli, agakomeza urugendo rwa metero umunani n’amaguru mbere y’uko yinjira mu mudoka yari imugetereje.

Muri urwo rugendo, ubwo Reagan yarimo gutambuka apepera itangazamakuru n’abandi bantu bacye bari aho ku ruhande, yaje kwegera igice Hinckley yari ategererejemo amugera iruhande ku buryo ibyo yavugaga yashoboraga kubyumva. Uyu musore yahise amenya neza ko ayo ari yo mahirwe ya nyuma afite yo kurasa agahamya Perezida, maze akuramo intwaro ye ayimutunga ashize amanga arasa amasasu atandatu yose mu gihe kitarenze amasegonda abiri.

Perezida Reagan ari gusuhuza abaturage mbere gato yo kuraswa
Uko byari byifashe Reagan akimara kuraswa

Ku bw’amahirwe, Reagan yagezweho n’isasu rimwe ndetse aza kuvurwa arakira neza, ariko kuri Nancy Reagan, wahise asanganira umugabo we mu bitaro avuye muri White House, iki gikorwa cyari agahomamunwa.

Usibye no kuba yari umugabo we, Nancy ntiyigeze yakira uburyo umuntu ashobora kugira igitekerezo cyo kurasa Umukuru w’Igihugu kandi akabigeraho nta wundi muntu n’umwe ubimenye ngo anabikumire, birushaho kumwereka ko hari icyuho kinini mu mibereho ifatwa nk’iri ku rwego rwo hejuru y’Umukuru w’Igihugu cya Amerika.

Kuva mu 1972, uyu mugore yari asanzwe aziranye n’undi witwa Joan Quigley, wavugaga ko afite ubushobozi bwo kureba amerekezo y’inyenyeri n’ibibera mu kirere, maze akabona uko ibintu bizagenda mu gihe kiri imbere, mbega nka kwa kundi umupfumu araguza ukajya kumva aragize ati "bizagenda gutya na gutya nukora ibi n’ibi".

Rimwe rero ubwo bari mu kiganiro, Nancy ari gutekerereza Quigley ibyabaye ku mugabo we, yaje kumubaza niba ibyabaye hari icyo yari bubikoreho, maze undi amusubiza ko iyo aza kuba yaritegereje ubuzima bwa Reagan akabuhuza n’ibyo amerekezo y’inyenyeri agaragaraza, nta kabuza yari bumenye neza umugambi wo kwica Reagan ndetse akanawuburizamo.

Nancy yabanje kugwa mu kantu gusa ashimishwa n’iyo nkuru nziza, y’uko hari umuntu ushobora kumenya ibigiye kuba ku mugabo we, ndetse byaba ari bibi akaba yanabikumira mbere y’uko biba.

Ni uko Quigley yaje kubona akazi muri White House, akajya abwira Nancy ibishobora kuba ku mugabo we akoresheje ibyo umuntu yagereranya n’indagu ze (ya merekezo y’inyenyeri), Nancy nawe akabigeza ku mugabo we ndetse rimwe na rimwe, nk’uko Quigley yakunze kubitangaza, hari ubwo ibyemezo runaka byabaga byafashwe ariko bikaza guhinduka kubera inama zatanzwe nawe.

Aba bombi bavuganaga hagati y’inshuro ebyiri n’eshatu ku munsi, ndetse kari akazi keza kuko kaheshaga Quigley, utarigeze ushaka umugabo, umushahara ugera ku 3 000$ buri kwezi. Bivugwa ko Perezida Reagan na Quigley babonanye inshuro imwe gusa, ubwo bari mu musangiro wari wabereye muri White House mu mwaka wa 1985.

Joan Quiley yaraguriye Perezida Reagan mu myaka irindwi yose

Ibyemezo bikomeye byafashwe na Perezida Reagan abikesha Quigley

Nyuma y’uko umubano w’ibanga hagati ya Nancy na Quigley utangiye gushyirwa mu bikorwa, uyu mugore yatangiye kugenzura ubuzima bwose bwa Perezida Ronald Reagan.

Rimwe ubwo Nancy yasobanuraga icyamuteye gukorana na Quigley, yagize ati "Ni abantu bacye bashobora kumva uko biba bimeze iyo umugabo wawe arashwe hafi yo gupfa, kandi buri gihe agahora imbere y’imbaga y’abantu, ibihumbi by’abantu, kandi umwe muri bo ashobora kuba afite imbunda...nakoraga uko nshoboye kose kugira ngo ndinde umutekano w’umugabo wanjye akomeze kubaho".

Bwa mbere iby’umubano wa Nancy na Quigley bimenyekana, byatangajwe na Donald Regan wari Umuyobozi w’Abakozi muri White House hagati ya 1985 na 1987, mu gitabo yanditse akacyita ’For the Record: From Wall Street to Washington’. Muri icyo gitabo, yavuze ko hari umugore wari utuye i San Francisco, atari yakamenye izina icyo gihe, wabanzaga guha umugisha ibikorerwa byose muri White House.

Yaragize ati "Mu by’ukuri buri cyemezo gikomeye cyafashwe na Reagan mu gihe nari nkikora muri White House, cyabanzaga guhabwa umugisha n’umugore w’i San Francisco wakoreshaga amerekezo y’inyenyeri mu kugena niba imibumbe y’Isanzure iri mu murongo umwe n’ibigiye gukorwa".

Ubwo amakuru yari amaze kujya hanze, Reagan n’umugore we bagerageje gutesha agaciro ibikorwa bya Nancy gusa nawe ntiyari yiteguye guceceka, kuko yashyize hanze igitabo ’What Does Joan Say?: My Seven Years As White House Astrologer to Nancy and Ronald Reagan’, aho avuga ko yagikomoye kuri Ronald Reagan wakundaga kubaza Nancy ’icyo Joan [Quigley] yavuze ku byemezo bikomeye byabaga bigiye gufatwa’.

Muri icyo gitabo, Quigley yagize ati "Nari nshinzwe kugena igihe ibiganiro n’abanyamakuru bya Perezida bibera. Nagenaga kandi igihe cyo gutanga Imbwirwaruhame ze nyinshi, ibiganiro bigaragaza uko igihugu gihagaze, n’igihe Air Force One (indege igendamo Perezida wa Amerika) igomba guhagarukira. Ni njye wahisemo igihe ibiganiro mpaka byahuje Reagan na Jimmy Carter byari bubere, ndetse n’ibiganiro bibiri byamuhuje na Walter Mondale. Nateganyaga igihe ingendo ze zo mu mahanga zibera, n’ingendo ngufi ndetse n’umunsi we w’ikiruhuko".

Mu bindi bikomeye yakoze, birimo ko ari we wagennye igihe cyo kubaga kanseri Reagan yari arwaye mu 1985. Uyu mugore kandi avuga ko yafashije Reagan guhindura politiki ya Amerika ku cyahoze ari Leta Zunze Ubumwe z’Abasoviyete (yaje gucikamo ibihugu birimo n’u Burusiya), kuko yamubwiye ko indagu ze zimwereka ko abayobozi b’u Burusiya ari abantu barajwe ishinga no kubaka amahoro, ndetse nyuma yaho, ibihugu byombi byatangiye kugirana ubwumvikane.

Ikindi cyabayeho gikomeye ni inama Quigley yagiriye Reagan yo gutinza urugendo yagombaga kugirira mu gihugu cy’u Budage, aho yari busure irimbi rya Bitburg rishyinguyemo abasirikari bahoze ari aba-Nazi. Icyo gihe koko ngo Reagan yatindije urugendo rwe mu gihe kigera ku isaha yose.

Bivugwa ko ibi bikorwa Quigley yakoraga yari yarabirazwe n’umubyeyi we, nawe ngo wizeraga ko ibimenyetso by’amerekezo y’inyenyeri bifite uko bigena imibereho y’ibibera ku Isi.

Ku rundi ruhande, umubano wa Reagan na Quigley watangiye mbere cyane ahagana mu 1966, ubwo yari umwe mu bakorerabushake bafashije Reagan kwiyamamariza kuyobora Leta ya California.

Uyu mugore yaje kwitaba Imana muri 2014 afite imyaka 87.

Jodie Foster wari warahogoje umutima wa John Warnock Hinckley, yari afite ubwiza buhebuje
Ubwo Foster yarimo gukina filime
John Warnock Hinckley yavuzweho kugira ibibazo byo mu mutwe, ari na byo byatumye akora ibikorwa byo kurasa Perezida
Perezida Reagan n'umugore we Nancy Reagan

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .