00:00:00 IGIHE NETWORK KN KINYARWANDA EN ENGLISH FR FRANCAIS

Amerika yarashe ibisasu bya karahabutaka muri Iraq na Syria

Yanditswe na Bukuru JC
Kuya 28 Kamena 2021 saa 08:59
Yasuwe :
0 0

Igisirikare cya Leta Zunze Ubumwe za Amerika, cyifashishije indege kabuhariwe mu kurasa ibisasu biremereye, cyarashe ibirindiro bibiri muri Syria n’ikindi kimwe muri Iraq, ivuga ko ari iby’imitwe y’iterabwoba ishyigikiwe na Iran, yari imaze iminsi irasa ku birindiro by’ingabo za Amerika.

Nubwo nta mibare y’abaguye muri ibi bitero yatangajwe n’Igisirikare cya Amerika, bikekwa abarwanyi batanu b’imitwe ya Kataib Sayyid al-Shuhada na Kataib Hezbollah, ikoresha ibirindiro byarashwe na Amerika, bitabye Imana, icyakora Ibiro Ntaramakuru bya Syria, Sana, byavuze ko mu bapfuye harimo umwana umwe n’abandi baturage batatu.

Amerika ishinja Iran gufasha imitwe y’iterabwoba yarashwe, ibikorwa ivuga ko byakajije umurego nyuma y’iraswa rya Gen. Qasem Soleiman wishwe n’indege za Amerika muri Mutarama umwaka ushize.

Ni ubwa kabiri Perezida Joe Biden wa Amerika ategetse ko Amerika irasa ku mitwe y’iterabwoba, ibintu bidasanzwe kuri ba Perezida ba Amerika mu mwaka wabo wa mbere ku butegetsi.

Amerika isigaje abasirikare 2 500 muri Iraq, mu gihe iri no mu bikorwa byo kuvana ingabo zayo muri Afghanistan, aho abasesenguzi bemeza ko kugabanya ingabo mu Burasirazuba bwo Hagati bizajyana no kongera ibitero by’indege mu bice Amerika idafitemo ingabo kandi ikifuza kuharwanira.

Iran yari imaze igihe mu biganiro na Amerika bigamije kugarura icyo gihugu mu masezerano yo kugenzura ikoreshwa ry’intwaro za kirimbuzi cyari giherutse gushyiraho umukono mu 2015, ariko Perezida Donald Trump akaza kuyikuramo.

Amerika yarashe imitwe y'iterabwoba muri Iraq na Syria

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .