Ubushakashatsi bwerekanye ko Covid-19 ishobora kuba yaraturutse mu nyamaswa yinjira mu bantu

Yanditswe na Tuyishimire Raymond
Kuya 30 Werurwe 2021 saa 08:46
Yasuwe :
0 0

Ubushakashatsi bwakozwe n’impuguke z’Ishami ry’Umuryango w’Abibumbye ryita ku Buzima, OMS, bwatangaje ko bishoboka cyane ko inkomoko y’icyorezo cya COVID-19 yaturutse ku nyamaswa, aho kuba muri laboratwari nk’uko byari byaketswe mbere.

Ubushakashatsi bwakorewe muri laboratwari yo mu Bushinwa, mu Mujyi wa Wuhan, ufatwa nk’izingiro rya Covid-19, bwagaragaje ko ubwandu bwa Covid-19 bwagiye bukwirakwira buvuye mu nyamaswa, maze bukagera ku bantu binyuze ku zindi nyamaswa.

Inyamaswa ziri gukekwa cyane ni uducurama, twasanzwemo virus ijya gusa nk’iyateye Covid-19. Utu ducurama ngo dushobora kuba twaranduye iyi virus tuyivanye ku zindi nyamaswa, ubundi tukayikwirakwiza mu bantu kuko two tubegereye.

Izindi nyamaswa zikekwa ni imbeba, kuko na zo zishobora gutwara agakoko gatera Covid-19.

Amakuru y’ibanze kuri ubu bushakashatsi yatangajwe n’Ibiro Ntaramakuru by’Abanyamerika, AP, gusa ubushakashatsi ntiburarangira neza, kuko “bukirimo gusuzumwa no gusesengurwa”.

OMS ivuga kubona inkomoko ya nyayo y’icyorezo cya Covid-19 ari intambwe ikwiye mu kwirinda ibyorezo by’ahazaza binyuze mu gukusanya amakuru n’ibindi bitandukanye.

Ubu bushakashatsi buje buvuguruza ibyavuzwe n’ibihugu birimo Leta Zunze Ubumwe za Amerika, byashinje u Bushinwa kugira uburangare bwatumye Covid-19 ikwirakwira ku Isi.

Impuguke za OMS zasuye iyi laboratwari muri Mutarama, zisanga atari yo zingiro ry'icyorezo cya Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .