00:00:00 IGIHE NETWORK KN KINYARWANDA EN ENGLISH FR FRANCAIS

Afurika y’Epfo igiye gushyiraho ikigo kizakora inkingo za Covid-19

Yanditswe na Muhonzire Sylvine
Kuya 22 Kamena 2021 saa 09:06
Yasuwe :
0 0

Perezida wa Afurika y’Epfo, Cyril Ramaphosa, yavuze ko igihugu cye kigiye gutangira gukora inkingo za Covid-19 cyifashishije uburyo bw’ikoranabuhanga rya mRNA, kuko gukomeza gutegereza izo hanze ya Afurika batazi igihe zizazira biri gutuma benshi bakomeza kubura ubuzima.

Yabivuze mu kiganiro Ishami ry’Umuryango w’Abibumbye ryita ku Buzima, ryagiranye n’itangazamakuru ku wa 21 Kamena 2021 i Geneva mu Busuwisi ku cyicaro gikuru cya OMS nkuko France 24 ibitangaza.

Perezida Ramaphosa yavuze ko Afurika y’Epfo ku bufatanye na OMS igiye gushyiraho ikigo cy’ikoranabuhanga gikora inkingo za Covid-19, zizakoreshwa muri iki gihugu no ku Mugabane wa Afurika muri rusange kuko muri iki kigo ariho ibindi bihugu bikennye n’ibiri mu nzira y’amajyambere bizigira uko byakora inkingo.

Yagize ati “Tubona ko nidukomeza kwishingikiriza ku nkingo zikorerwa hanze ya Afurika amaso azahera mu kirere. Kuko ni yo zije ntizizira igihe kandi abantu bakomeza gupfa buri munsi.”

Yakomeje avuga ko abantu bamaze gukingirwa muri Afurika bangana na 2% mu gihe 37% by’abarwayi bose ba Covid-19 kuri uyu mugabane ari abo muri Afurika y’Epfo.

Ati “2% gusa by’abaturage bo ku Mugabane wa Afurika ni bo babonye urukingo kandi narwo rwa dose imwe, mu gihe Leta Zunze Ubumwe za Amerika n’u Burayi bo bateganya kuba bakingiye 70% by’abaturage babo mu mezi make ari imbere.”

Perezida Ramaphosa yavuze ko ubu busumbane buzakurwaho n’uko ibihugu bya Afurika nabyo bizatangira kwikorera inkingo za Coronavirus.

Inkingo za Pfizer-BioNTech na Moderna, zagaragaweho kugira ubushobozi bwo kurinda Covid-19 kuruta izindi, zikoreshejwe ikoranabuhanga rya mRNA kandi ikigo Afurika y’Epfo igiye gushyiraho kizaba gikora inkingo zo muri ubu bwoko gusa.

Umushinga wo gushyiraho iki kigo uzakorwa na sosiyete z’ikoranabuhanga rishingiye ku bumenyamuntu zo muri Afurika y’Epfo zirimo Biovac na Afrigen Biologics Vaccines, Kaminuza zitandukanye n’Ikigo cya Afurika gishinzwe kurwanya Indwara (Africa CDC).

Umuyobozi wa OMS, Dr. Tedros Adhanom Ghebreyesus, yavuze ko ibi bizatanga umusaruro ku nkingo mu gihe gito.

Ati “Tugomba gukora icyo dushoboye cyose kugira ngo twongere inkingo ndetse tunazitange biciye muri gahunda ya Covax.”

Iki kigo nikimara kubakwa hazaba hasigaye ko ibigo bya Moderna na Pfizer byakoze inkingo za Covid-19 bitanga ikoranabuhanga rya mRNA ryakoreshejwe hakorwa izi nkingo, kugira ngo zitangire zikorerwe muri Afurika.

Biteganyijwe ko hagati y’amezi icyenda na 12 ari imbere inkingo za Covid-19 zizaba zatangiye gukorwa muri Afurika y’Epfo.

Afurika y'Epfo igiye gutangiza ikigo cy'ikoranabuhanga kizakora inkingo zo guhangana n’icyorezo cya Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .