00:00:00 IGIHE NETWORK KN KINYARWANDA EN ENGLISH FR FRANCAIS

Afurika iracyari inyuma mu bikorwa by’ikingira, u Bushinwa bwohereje indege rutura hafi y’ikirere cya Taiwan: Agezweho mu mahanga

Yanditswe na IGIHE
Kuya 2 Ukwakira 2021 saa 08:48
Yasuwe :
0 0

Ishami ry’Umuryango w’Abibumbye ryita ku Buzima, OMS, ryatangaje ko ibihugu 50, byiganjemo ibyo muri Afurika, bitageze ku ntego yo gukingira nibura 50% by’abaturage babyo, yari yashyizweho na OMS mu ntangiriro z’uyu mwaka.

Kimwe cya kabiri cy’ibihugu bya Afurika bimaze gukingira abaturage babyo bari munsi ya 2%, mu gihe mu bihugu nk’u Bwongereza bimaze gukingira 66%, u Burayi bakaba 62% na ho muri Amerika bakaba 55%.

Ibi byagizwemo uruhare n’uko ibihugu bimwe bikize bitageze ku ntego byari byihaye yo gushyigikira gahunda ya Covax, aho byari byiyemeje gutanga inkingo miliyoni 670 muri uyu mwaka, ariko bikazatanga inkingo miliyoni 430 gusa.

OMS yari yatangaje ko mu gihe Afurika yakingira 40% by’abaturage bayo, byagira ingaruka nziza mu guhangana n’iki cyorezo, ariko ivuga ko hakenewe inkingo miliyoni 500 kugira ngo Afurika igere kuri iyo ntego.

Amerika yemeye kuzatanga inkingo miliyoni 500 byitezwe ko zizaterwa mu bihugu bya Afurika, mu gihe bitakorwa gutyo, Afurika yazakingira 40% by’abaturage bayo nibura muri Werurwe umwaka utaha.

Afurika ikomeje gusigara inyuma mu bikorwa by’ikingira rya Covid-19

=================================================

U Bushinwa bwohereje indege karahabutaka hafi y’ikirere cya Taiwan

Leta y’agace ka Taiwan, yatangaje ko indege 38 z’u Bushinwa, zirimo n’izishobora gutwara intwaro kirimbuzi, zagaragaye hafi y’ikirere cya Taiwan, bitaguma Leta y’ako gace ikora ku ntwaro zayo ndetse ikanategura uburyo bw’ubwirinzi.

Ntabwo u Bushinwa bwagejeje indege zabwo muri Taiwan mu buryo bwuzuye, ariko bwazigejeje mu gice kizwi nka ‘Air Defense Identification Zone’ kiba kitaruye ikirere cy’igihugu cyangwa agace runaka, ariko indege zihanyuze zigenzurwa n’icyo gihugu byegeranye, mu rwego rwo kwirindira umutekano.

Nta kintu u Bushinwa buratangaza kuri izi ndege, ariko mu munsi ishize bwakunze kujya bugurutsa izi ndege muri aka gace mu rwego rwo kwerekana uburakari kuri Leta y’agace ka Taiwan cyangwa Amerika, cyane cyane iyo ibihugu byombi byabaga biri mu myitozo ya gisirikare.

U Bushinwa bufata Taiwan ituwe n’abaturage miliyoni 22 nk’agace kayo kiyomoye, bukavuga ko buzakisubiza hakoreshejwe imbaraga zirimo n’iz’intambara bibaye ngombwa.

Ku rundi ruhande, Itegeko Nshinga rya Amerika risaba Leta y’icyo gihugu guha Taiwan intwaro zo kwirinda mu gihe izikeneye, ari nayo mpamvu aka gace kaza mu twa mbere twakira intwaro zigezweho za Amerika.

Indege z'u Bushinwa zagaragaye hafi y'ikirere cya Taiwan biteza impagarara

=================================================

Abantu ibihumbi 700 bamaze kwicwa na Covid-19 muri Amerika

Leta Zunze Ubumwe za Amerika zimaze gutakaza abantu barenga ibihumbi 700, bishwe n’icyorezo cya Covid-19 cyageze muri icyo gihugu mu ntangiriro z’umwaka ushize.

Amerika iyoboye ibindi bihugu mu kugira impfu nyinshi z’abishwe na Covid-19, biyongereye muri iyi minsi bitewe n’abaturage banze kwikingiza, aho Abanyamerika bakabaka miliyoni 70 batarahabwa urukingo na rumwe.

Amerika ikurikiwe na Brazil imaze gupfusha abantu barenga ibihumbi 590 mu gihe u Buhinde buza ku mwanya wa gatatu, aho bumaze gupfusha abantu ibihumbi 480.

Kugeza ubu abantu barenga miliyoni 4,5 bamaze kwicwa na Covid-19 ku Isi, ariko bigakekwa ko imibare ya nyayo ishobora kuba irenga miliyoni 18 kuko ibikorwa byo kugenzura no kubarura abishwe na Covid-19, ndetse hakabarurwa n’abatarapfiriye kwa muganga, bitagenze neza mu bihugu byose. Ibi bikajyana n’ubwiyongere budasanzwe bwagaragaye mu myaka micye ishize.

Abantu barenga ibihumbi 700 bamaze kwicwa na Covid-19 ku rwego rw'Isi

===============================================

Hari gukorwa ubushakashatsi ku kinini gishobora gukiza abarwayi ba Covid-19

Ubushakashatsi bwakozwe n’ibigo bya Merck and Ridgeback Biotherapeutics bwagaragaje ko ikinini kitwa molnupiravir gifite ubushobozi bwo kurinda umuntu ibyago byo kwicwa na Covid-19 ku kigero cya 50.

Amakuru avuga ko iki kinini cyajya kinyobwa kinyujijwe mu kanwa nk’uko bisanzwe bigenda ku bindi binini byinshi, kikajya gihabwa umuntu warwaye Covid-19, ariko bikaba byiza kugihabwa hakiri kare umuntu atari yaremba cyane.

Abashakashatsi batandukanye bakunze kuvuga ko inkingo zonyine zishobora kunanirwa kuzarandura Covid-19, ariko batangaza ko mu ihe haboneka umuti ushobora kuzunganira, bishobora kugira uruhare mu kurandura iki cyorezo.

Kugeza ubu uyu muti uri kugenzurwa n’Urwego rwa Amerika rushinzwe Imiti n’Ibiribwa, FDA, kugira ngo uzahabwe uburenganzira bwo gutangira gukoreshwa muri icyo gihugu, aho byitezwe ko wahita unatangira gukoreshwa mu bindi bihugu byo ku Isi.

Ikinini cya Biotherapeutics gishobora kuzajya cyifashishwa mu kuvura Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .