00:00:00 IGIHE NETWORK KN KINYARWANDA EN ENGLISH FR FRANCAIS

Afghanistan: Batatu bishwe barashwe bazira gucuranga mu bukwe

Yanditswe na Dufitumukiza Salathiel
Kuya 31 Ukwakira 2021 saa 12:09
Yasuwe :
0 0

Abantu batatu bishwe barashwe abandi babiri barakomeretswa bikomeye, bazira gucuranga umuziki usanzwe mu bukwe.

AFP yatangaje ko umwe mu bafitanye isano n’abarashwe yavuze ko Abataliban ari bo baje muri ubwo bukwe bakarasa bamaze kumva hacurangirwa iyo miziki.

Ubwo Aba-Taliban baheruka ku butegetsi hagati ya 1996 na 2001 indirimbo zitari iz’Idini zari zibujijwe. Nubwo Guverinoma yahakanye ko atari yo yatumye abarashe kubikora ndetse ikaba itarashyira mu mategeko yayo ko iyo miziki ibujijwe, n’ubundi iracyafatwa nk’itemewe kuko inyuranyije n’amategeko akaze y’Idini ya Islam ubwo butegetsi bwimakaje.

Umuvugizi wa Guverinoma, Zabihullah Mujahid, yabwiye itangazamakuru ko abagabye icyo gitero batabikoze batumwe n’Ubutegetsi bw’Aba-Taliban kandi ko babiri bamaze gutabwa muri yombi.

Yakomeje ati “Mu mikorere y’Amatwara y’Abayisilamu nta n’umwe ufite uburenganzira bwo kubuza umuntu umuziki cyangwa ikindi icyo ari cyo cyose, usibye kumwihanangiriza. Iyo umuntu yifashe akica undi, naho yaba ari umwe muri twe (Aba-Taliban), ni icyaha kandi tuzabageza mu rukiko bagezwe imbere y’amategeko.”

Muri Nzeri uyu mwaka, Aba-Taliban bishe barashe abantu bane bakekwagaho ubushimusi, imirambo yabo imanikwa ku mihanda yo mu Mujyi wa Herat.

Nyuma y’aho basohoye itangazo ribuza abogoshi guconga ubwanwa bw’abagabo kuko binyuranyije n’amahame y’Idini.

Aba-Taliban ntibemera indirimbo zitari iz'ijyanye n'iyobokamana ryabo kuva na kera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .