00:00:00 IGIHE NETWORK KN KINYARWANDA EN ENGLISH FR FRANCAIS

Afghanistan: Abatalibani banzuye ko nta bakobwa bazigana n’abahungu

Yanditswe na Bukuru JC
Kuya 12 Nzeri 2021 saa 06:06
Yasuwe :
0 0

Minisitiri w’uburezi muri Afghanistan muri Guverinoma nshya y’Abatalibani, Abdul Baqi Haqqani yatangaje ko batazabuza abakobwa kwiga kugeza muri za kaminuza, ariko ko batazigera bemera ko abahungu n’abakobwa bigana.

Haqqani yabitangaje kuri iki Cyumweru mu kiganiro n’abanyamakuru, nyuma y’iminsi mike hashyizweho Guverinoma igizwe n’abagabo gusa.

Kujya ku butegetsi kw’Abatalibani kwateye ubwoba benshi biganjemo ab’igitsinagore, ko bashobora kugarura politiki ibasubiza inyuma nk’iyo bari barimitse ubwo bari bari ku butegetsi mu myaka 20 ishize, aho nta mukobwa wemererwaga kwiga cyangwa gukora imirimo ituma agaragara mu ruhame.

Haqqani yavuze ko batazongera kubuza abakobwa kwiga ariko ko batazemera amashuri atuma abahungu n’abakobwa bigana.

Ati “Ntabwo tuzemera ko abahungu n’abakobwa biga hamwe. Ibyo byo ntabwo tuzabyemera. Imana ishimwe kuko dufite umubare munini w’abarimu b’abagore, nta kibazo tuzahura nacyo kuri iyi ngingo. Hazakorwa ibishoboka byose kugira ngo abanyeshuri b’abakobwa bigishwe n’abarimu b’abagore.”

Mu mashuri makuru na za Kaminuza, Haqqani yavuze ko hazashyirwaho amabwiriza y’uburyo abakobwa bagomba kwambara bikwije. Amasomo yigishwa mu mashuri nayo azavugururwa.

Tariki 15 Kanama uyu mwaka nibwo abatalibani basubiye ku butegetsi muri Afghanistan nyuma yo kugenda kw’ingabo z’Aamerika zari zihamaze imyaka 20.

Abakobwa bo muri Afghanistan ntabwo bazongera kwemererwa kwigana n'abahungu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .