00:00:00 IGIHE NETWORK KN KINYARWANDA EN ENGLISH FR FRANCAIS

Aba-Taliban basabye abayobozi bahunze gutahuka, umweyo mu bakoranye na Trump... Agezweho mu mahanga

Yanditswe na Ferdinand Maniraguha
Kuya 9 Nzeri 2021 saa 08:34
Yasuwe :
0 0

Minisitiri w’Intebe mushya wa Afghanistan muri Leta iyobowe n’Aba-Taliban, Mullah Mohammad Hasan Akhund, yasabye abayobozi bahoze muri Leta yatsinzwe, kugaruka gufatanya n’abandi kubaka igihugu.

Akhund yavuze ko biteguye gushakira umutekano abo bayobozi n’abandi bakozi bose bahunze igihugu, bafite ubwoba ko kigiye guhinduka isibaniro ry’intambara n’umutekano muke.

Hari benshi bagize ubwoba ubwo Aba-Taliban bafataga ubutegetsi mu kwezi gushize. Abaturage ba Afghanistan abenshi bazi Aba-Taliban nk’abantu babi bakurikije imyaka itanu babayoboye kugeza mu 2001 ubwo ingabo za Amerika zabakuragaho hakoreshejwe intwaro.

Akhund mu kiganiro yahaye Aljazeera, yavuze ko umwanya w’ubugizi bwa nabi warangiye muri Afghanistan, ubu icyo bashyize imbere ngo ni ukubaka igihugu.

Ati “Twatakaje byinshi haba amafaranga n’ubuzima bw’abantu. Igihe cyo kumena amaraso no kugirira nabi abaturage muri Afghanistan cyararangiye.”

Ubwo Aba-Taliban bafataga ubutegetsi, abenshi mu baturage ba Afghanistan bakoranye na Amerika n’ibindi bihugu cyangwa imiryango mpuzamahanga, bahise bakuramo akabo karenge batinya kugabwaho ibitero n’Abatalibani bihorera. Akhund yavuze ko nta kwihorera kuzabaho.

Ati “Nta n’umwe uzabasha kwerekana ko yahungabanyijwe bitewe no kwihorera kandi ibyo biramutse bigenze bityo, bivuze ko umuntu azaba yemerewe gukora icyo ashaka. Umutwe wacu ufite ikinyabupfura kandi ugenzura bya hafi ingabo zawo. Nta n’umwe kugeza ubu turahohotera.”

Yakomeje agira ati “Ndizeza abaturage ba Leta igendera ku mahame y’idini ya Islam by’umwihariko abanya-Afghanistan, turashaka ibyiza n’iterambere. Dukeneye umusanzu wa buri wese muri uyu mushinga w’umugisha.”

Mullah Mohammad Hasan Akhund yavuze ko nta kwihorera kuzabaho ku bahoze mu buyobozi cyangwa abakoranye na Amerika

USA: Umweyo mu bategetsi bahoze bakorana na Trump

Ubutegetsi bwa Perezida Joe Biden uyobora Leta Zunze Ubumwe za Amerika, bwatangiye kunyuza umweyo mu bahoze bakorana na Donald Trump bakiri mu myanya y’ubuyobozi itandukanye cyane cyane mu nama ngishwanama z’ubuyobozi bw’amashuri ya gisirikare.

Abantu 18 bahoze bakorana na Donald Trump barimo abakoze mu biro by’umukuru w’igihugu nka Kellyane Conway na Sean Spicer, basabwe kwegura mu myanya barimo cyangwa bakayirukanwamo.

Jen Psaki ushinzwe itangazamakuru mu biro bya Perezida Biden, yemeje ko hari abayobozi baganirijwe basabwa kwegura, kuko Biden ashaka abayobozi bujuje ibisabwa mu nzego zose.

Abasabwe kwegura bose bari bari mu nama njyanama z’amashuri makuru ya gisirikare muri Amerika.

Bamwe mu basabwe kwegura babinenze, bavuga ko ari ukubibasira nk’abahoze bakorana na Trump aho kuzira ubushobozi nkuko Leta ya Biden ibivuga.

Hari n’abavuze ko bishobora kuba ari uburyo Biden ari gukoresha arangaza abantu kubera ubwiyongere bw’abandura COVID-19, kuzamuka kw’ibiciro ku masoko n’ibibazo bya Afghanistan nyuma yo kuvayo kw’ingabo za Amerika.

Ubutegetsi bwa Biden bwasabye abahoze bakorana na Trump bari mu buyobozi bw'inama z'ubutegetsi z'amashuri ya gisirikare, kwegura cyangwa bakeguzwa

Guinée yahagaritswe muri CEDEAO

Umuryango uhuza ibihugu byo mu Burengerazuba bwa Afurika, CEDEAO wahagaritse Guinée Conakry mu bikorwa byawo nyuma y’ihirikwa ry’ubutegetsi ryakozwe na Lt Col Mamady Doumbouya.

Ni umwanzuro wafatiwe mu nama y’ikoranabuhanga yahuje abakuru b’ibihugu bigize uwo muryango yabaye kuri uyu wa Gatatu, nyuma y’amasaha 72 ubutegetsi bwa Perezida Alpha Conde buhiritswe.

Nubwo Guinée yahagaritswe mu bikorwa bya CEDEAO, nta bihano by’ubukungu yahise ifatirwa nk’ihagarikwa ry’ubucuruzi n’ibindi bihugu cyangwa gufungirwa imipaka n’ibihugu bihana imbibi.

Nta bihano kandi byafatiwe abantu ku giti cyabo nk’abagize uruhare mu ihirika ry’ubutegetsi, ngo babe babuzwa gukora ingendo z’indege nkuko byajyaga bikorwa ku bandi.

CEDEAO kandi yasabye abahiritse ubutegetsi kurekura byihuse Perezida Alpha Conde. Bahise bohereza itsinda ry’intumwa zigomba kugera i Conakry kuri uyu wa Kane, kuganira n’abahiritse ubutegetsi.

Guinée yafatiwe ibihano na CEDEAO nyuma y'iminsi habayeho ihirikwa ry'ubutegetsi

OMS yasabye ibihugu biteganya gutanga dose ya gatatu y’urukingo rwa Covid-19 kuba bibihagaritse

Ishami ry’Umuryango w’Abibumbye ryita ku buzima (OMS), ryasabye ibihugu biteganya gutanga dose ya gatatu y’urukingo rwa Covid-19 mu kongerera abaruhawe ubudahangarwa, kuba bibihagaritse kugeza mu 2022.

Umuyobozi Mukuru wa OMS, Tedros Adhanom Ghebreyesus, kuri uyu wa Gatatu yavuze ko byaba bibabaje sosiyete n’inganda zikora inkingo zemereye ibihugu bimwe na bimwe gutanga dose ya gatatu, kandi hari ibindi byasabye iya mbere cyangwa iya kabiri bitarayibona.

Yagize ati “Sinshobora guceceka mu gihe sosiyete n’ibihugu bifite ijambo ku itangwa n’ikorwa ry’inkingo bitekereza ko ibihugu bikennye bigomba gutegereza ibisigazwa. Abakora mu nzego z’ubuvuzi, abageze mu za bukuru n’abandi bafite ibyago kurusha abandi mu bihugu bikennye bafite uburenganzira bwo kurindwa nkuko ahandi bimeze.”

Ibihugu bikize birimo Leta Zunze Ubumwe za Amerika, Denmark, Israel, u Budage, u Bufaransa, Espagne n’ibindi byatangiye gutekereza ku gutanga urukingo rwa gatatu ku bantu bafite ibyago byo kuzahazwa na Covid-19 barimo abageze mu za bukuru.

Tedros yasabye ibihugu bishaka gutanga dose ya gatatu y'urukingo rwa Covid-19 kuba bibihagaritse kugira ngo ibitarakingira na rimwe bibone inkingo

Koreya y’Epfo: Imbwa yahawe umudali kubwo kurokora nyirayo

Imbwa yitwa Baekgu yo muri Koreya y’Epfo yambitswe umudari uhabwa abakoze ibikorwa by’indashyikirwa mu gutanga ubutabazi bw’ibanze, nyuma yo kugira uruhare kugira ngo nyirayo wari wabuze aboneke.

Iyo mbwa ibana na nyirayo, umukecuru w’imyaka 90 mu gace ka Hongseong muri Koreya.

Inzego z’ubuyobozi muri ako gace zatangaje ko uwo mukecuru n’imbwa ye baburiwe irengero tariki 25 Kanama uyu mwaka. Inzego z’ubutabazi zatangiye kumushakisha ariko ziraheba.

Hashize amasaha 40, uwo mukecuru n’imbwa ye baje kugaragara mu mirima y’umuceri, umukecuru yaheze mu migende ibamo amazi yuhira uwo muceri.

Polisi yavuze ko iyo hatabaho ubutwari bwa Baekgu, uwo mukecuru kumutabara byari bigoye. Kugira ngo bamenye aho ari, bohereje mu kirere indege imenya ahari ubushyuhe bw’ikinyabuzima nk’umuntu cyangwa irindi tungo.

Ubwo indege yageraga aho iyo mbwa na nyirabuja bari, yafashe ubushyuhe bw’umubiri w’imbwa kuko umukecuru we yari yaguye mu mugende kandi yatangiye no gukonja.

Abashinzwe gushakisha bahise bajya kureba aho ubwo bushyuhe bwabonetse, basanga ni imbwa na nyirabuja bahari barabatabara.

Inzego z’ubuyobozi zambitse iyo mbwa umudari, zivuga ko iyo itaza kuguma hafi y’uwo mukecuru, batari kubasha gutabara.

Baekgu yambitse umudari kubwo kugira uruhare mu itabarwa rya nyirabuja

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .